ވިލިމާލޭ ފަޅުގައި އަޅާފައި އޮތް ތެޔޮ ބޯޓެއްގައި ރޯވެ ހަ މީހަކަށް އަނިޔާވެއްޖެ އެވެ.
އެމްއެންޑީއެފުން ބުނީ ބޯޓުގައި ރޯވި އަލިފާން އެ ސަރަހައްދުގައި އޮތް އެހެން އުޅަނދަކަށް ވެސް ފެތުރުނު ކަމަށެވެ. މިރޭ 10:30 ހާއިރު ރޯވި އަލިފާން ގަޑިއެއްހާއިރު ފަހުން ނިއްވާލެވުނު އިރު، ހަ މީހަކު ފިހިގެން ހޮސްޕިޓަލަސް ގެންގޮސްފައިވާ ކަމަށް އެމްއެންޑީއެފުން ބުންޏެވެ. ނަމަވެސް އެ މީހުންނަށް ލިބުުނު ޒަހަމްތަކުގެ ތަފްސީލެއް އަދި ނޭނގެ އެވެ.
އެެމްއެންޑީއެފްގެ މީޑިއާ އޮފިސަރު މޭޖާ އިބްރާހީމް އާޒިމް ވިދާޅުވީ އަލިފާން ރޯވި ބޯޓުގެ އެކަކު ނުފެނިގެން އުޅޭ ކަމަށް ފުރަތަމަ މައުލޫމާތު ލިބުނު ނަމަވެސް މިހާރު އެންމެން ވެސް ފެނިފައިވާ ކަމަށެވެ.
މިދިޔަ މަހު މާލޭ ޓީ ޖެޓީ ސަރަހައްދުގައި އޮތް ތެޔޮ ލޮރީއަކާއި ފަޅުގައި އޮތް ލޯންޗެއްގައި ރޯވެ އެހެން ބައެއް އުޅަނދުތަކަށް ވެސް ބޮޑެތި ގެއްލުންތައް ވެފައިވެ އެވެ. އަދި އޭގެ ދުވަސްކޮޅެއް ކުރިން މާލޭގެ ގުދަނެއްގައި ރޯވެ އެތައް އިމާރާތެއްގައި ރޯވެ އެކަކަކު މަރު ވެސް ވެފައިވެ އެވެ. އޭގެ ފަހުން މިހާރު އަންނަނީ ނުރައްކާތެރި ކެމިކަލް ރައްކާކުރާ ގުދަންތައް ތިލަފުއްޓަށް ބަދަލުކުރުމުގެ މަސައްކަތް ކުރަމުންނެވެ.