އަންނަ އަހަރުގެ ލޯކަލް ކައުންސިލްތަކުގެ އިންތިޚާބުގައި އެމްޑީޕީގެ ޓިކެޓު ދޭނެ މީހުން ކަނޑައަޅަން ބާއްވާ ޕްރައިމަރީގައި ބައިވެރިވެވޭނީ އަދި ވޯޓު ދެވޭނީ މި އަހަރުގެ ނިޔަލަށް އެ ޕާޓީގެ މެމްބަރުންގެ ގޮތުގައި ތިބި މީހުންނަށް އެކަނި ކަމަށް އެމްޑީޕީން މިއަދު ބުނެފި އެވެ.
ކައުންސިލް އިންތިޚާބު އަންނަ އަހަރުގެ އޭޕްރީލް މަހު ބާއްވަން އިލެކްޝަންސް ކޮމިޝަނުން ވަނީ ނިންމައި، އެކަން އާންމުކޮށްފަ އެވެ. އެކަމަކު އިންތިޚާބަށް ކުރިމަތިލާން އަދި ހުޅުވައެއް ނުލަ އެވެ.
އެމްޑީޕީން ކުރި އިއުލާނެއްގައި ވަނީ ކައުންސިލް އިންތިޚާބުގައި އެ ޕާޓީގެ ޓިކެޓް ދޭނެ މީހުން ކަނޑައަޅަން ބާއްވާ ޕްރައިމަރީގައި ވާދަ ކުރެވޭނީ އަދި ވޯޓު ދެވޭނީ ވެސް އަންނަ އަހަރު ފެށުމުގެ ކުރިން އެ ޕާޓީގެ މެމްބަރުންގެ ގޮތުގައި ތިބޭ މީހުންނަށް ކަމަށެވެ.
އެކަމަކު އެމްޑީޕީގެ ޕްރައިމަރީ ބާއްވާނެ ތާރީޚެއް އަދި އިއުލާނެއް ނުކުރެ އެވެ.
ކުރިއަށް އޮތް ކައުންސިލް އިންތިޚާބުގައި 980 ކައުންސިލަރުން އިންތިޚާބު ކުރާނެ އެވެ.