ހާއްސަ އެހީއަށް ބޭނުންވާ ކުދިންނަށް އަމާޒުކޮށް ރާއްޖޭގެ 10 ސްކޫލެއްގައި ހިންގާ ސެން ކްލާސްތަކަށް ބޭނުންވާ ތަކެތި، ބީއެމްއެލުން ފޯރުކޮށްދީފި އެވެ.
ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވީ ސެން ކްލާސްތަކަށް އެ ބޭންކުން ހަދިޔާކުރި ސާމާނަކީ އެ ކްލާސްތަކުގައި ކިޔަވާ ދަރިވަރުންގެ ހުނަރު ތަރައްގީކުރަން މުހިންމު ވަސީލަތްތަކެއް ކަމަށެވެ. އަދި މި އެހީ ފޯރުކޮށްދެވުމަކީ ބޭންކަށް ލިބޭ އުފަލެއް ކަމަށް ވެސް އޭނާ ވިދާޅުވި އެވެ.
"މި ވަސީލަތްތަކަކީ މި ކުދިންގެ ގާބިލިއްޔަތުކަމާއި، އެހެން މީހުންނާ ގުޅިގެން މުޖުތަމައުގައި ހަރަކާތްތެރި ވުމަށް ބޭނުންވާ ހުނަރު ތަރައްގީ ކުރުމާއި އެކުދިންގެ ތައުލީމީ ބޭނުންތައް ބަލައިގެން ހޯދާފައިވާ ވަސީލަތްތަކެއް،" ސައީދު ވިދާޅުވި އެވެ.
ބީއެމްއެލްގެ މި އެހީގެ ސަބަބުން، ސްޕެޝަލް އެޑިޔުކޭޝަން ނީޑްސް (ސެން) ކްލާސްތަކުގައި ކިޔަވައިދޭން އިތުރަށް ފަސޭހަތަކެއް ލިބޭނެ އެވެ. އެ ސްކޫލްތަކުގެ ސެން ކްލާސްތަކުގައި ގާތްގަޑަކަށް 300 އެއްހާ ކުދިން އަންނަނީ ތައުލީމް ހާސިލްކުރަމުންނެވެ.
ބީއެމްއެލުން އެހީތެރިކަން ފޯރުކޮށްދިން ސްކޫލްތައް
- ކެލާ ސްކޫލް
- އިހަވަންދޫ ސްކޫލް
- މިލަންދޫ ސްކޫލް
- ނ. އަތޮޅު ސްކޫލް
- މާފުށި ސްކޫލް
- ތޮއްޑޫ ސްކޫލް
- ތ. އަތޮޅު ސްކޫލް
- ގދ. ތިނަދޫ އަބޫބަކުރު ސްކޫލް
- ފުވައްމުލަކު ހާފިޒު އަހުމަދު ސްކޫލް
- ސ. ހިތަދޫ ޝަރަފުއްދީން ސްކޫލް
ބީއެމްލުން ކުރިއަށްގެންދާ "އަހަރެންގެ ބޭންކު" ޕްރޮގްރާމުގެ ދަށުން މިދިޔަ އަހަރު ވެސް ރާއްޖޭގެ އެކި ރަށްރަށަށް އެހީތެރިކަން ފޯރުކޮށްދިނެވެ. އެގޮތުން 140 ޕްރޮޖެކްޓަކަށް ބީއެމްއެލުން އެހީވި އެވެ. މި އަހަރު ވެސް އެ ޕްރޮގްރާމް ކުރިއަށް ގެންދެ އެވެ.
ރާއްޖޭގެ 20 ރަށެއްގައި މުޖުތަމައަށް ފައިދާކުރާނެ ހަރަކާތްތައް ހިންގަން ބީއެމްއެލުން ވަނީ މާލީ އެހީތެރިކަން ވެސް ފޯރުކޮށްދީފަ އެވެ.