ހައި ކޯޓުގެ ދެކުނާއި އުތުރު ގޮފީގެ ޝަރީއަތް އެއް ވަގުތެއްގައި ފުރަތަމަ ފަހަރަށް މާދަމާ ހިންގަން ނިންމައިފި އެވެ.
އައްޑޫ އާއި ހދ. ކުޅުދުއްފުށީގައި ގާއިމުކޮށްފައިވާ ހައި ކޯޓުގެ ދެ ގޮފީގެ ޝަރީއަތް މީގެ ކުރިން ހިންގަނީ ކޮންމެ ގޮތްޕަކަށް ފަނޑިޔާރުންގެ ވަފުދެއް ވަކިން ގޮސްގެންނެވެ. އެގޮތަށް ފަނޑިޔާރުންގެ ވަފުދުތައް ޒިޔާރަތްކުރަނީ ވެސް ފަހަރަކު ގޮތްޕަކަށެވެ.
އެކަމަކު މާދަމާ އިން ފެށިގެން އަންނަ ބުރާސްފަތި ދުވަހުގެ ނިޔަލަށް ދެ ގޮފީގެ ޝަރީއަތްތައް އެއްކޮށް ހިންގާނެ ކަމަށް ހައި ކޯޓުން ބުންޏެވެ. އެ ކޯޓުން ބުނީ ޝަރީއަތްތައް ހިންގުމަށްޓަކައި ފަނޑިޔާރުންގެ ދެ ވަފުދެއް އައްޑޫ އާއި ކުޅުދުއްފުށްޓަށް މިހާރު ގޮސްފައިވާ ކަމަށެވެ.
ހައި ކޯޓުގެ ދެ ގޮފި ގާއިމުކުރަން ކޯޓުތަކުގެ ގާނޫނަށް ގެނައި އިސްލާހާ އެކު ފުރަތަމަ ހަމަޖެއްސީ ކޮންމެ ގޮތްޕެއްގައި ތިން ފަނޑިޔާރުން ދާއިމީކޮށް ތިބޭ ގޮތަށެވެ. އެކަމަކު އެގޮތަށް ހެދުމުން އޭރު ނުވަ ފަނޑިޔާރުންގެ ބެންޗެއް އޮތް މާލޭގެ ހައި ކޯޓަށް ފަނޑިޔާރުން ދަތިކަން ކުރިމަތިވި އެވެ. އެހެންވެ، ފަނޑިޔާރުން ދާއިމީކޮށް ގޮފިތަކުގައި ނުތިބޭ ގޮތަށް ސުޕްރީމް ކޯޓުން ފަހުން ވަނީ ހަމަޖައްސައިފަ އެވެ.
އޭގެފަހުން ކޯޓުތަކުގެ ގާނޫނަށް އިސްލާހު ގެނެސް، ހައި ކޯޓުގައި މިހާރު 11 ފަނޑިޔާރުން ތިއްބަވަ އެވެ.