މުދާ ލިބުން ދަތިވެފައިވާ މައްސަލަ އަށް ހައްލު ހޯދަން މަޝްވަރާ ފަށައިފި

ރާއްޖެ އަށް އެންމެ ގިނަ މުދާ އެތެރެކުރާ ތިން އިމްޕޯޓަރުން ކަރަންޓީން ކުރުމާ ގުޅިގެން، މުދާ ލިބުން ދަތިވެފައިވާ މައްސަލަ އަށް ހައްލު ހޯދަން މަޝްވަރާ ކުރަމުން އަންނަ ކަމަށް އިކޮނޮމިކް މިނިސްޓްރީން މިއަދު ބުނެފި އެވެ.

ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ން މެންދުރު ބޭއްވި މީޑިއާ ބްރީފިންގައި، ރެޖިސްޓްރާ އޮފް ކޮމްޕެނީސް މަރިޔަމް ވިސާމް ވިދާޅުވީ، ލިލީ އާއި ބީއެޗްއެމް އަދި އެމްއެޗްއޭގެ މުވައްޒަފުންތަކެއް ކޮވިޑް-19 އަށް ޕޮޒިޓިވްވެ، ގުދަންތައް ބަންދުކޮށްފައި ވާތީ، ވަކިވަކި އިމްޕޯޓަރުންނާ މަޝްވަރާ ކޮށްގެން، މި ހާލަތުގައި ކުރެވިދާނެ ކަންކަން ބަލަމުން އަންނަ ކަމަށެވެ.

"މިނިސްޓްރީން ވަކިވަކި ހޯލްސޭލަރުންނާ އެކީގައި ވެސް ވާހަކަ ދައްކަމުން މި އަންނަނީ ކޮން ކަންތައްތަކެއް ފުރިހަމަ ކޮށްގެންތޯ އޮޕަރޭޝަން އަނެއްކާ ވެސް ފެށޭނީ. އެ މަސައްކަތް ދަނީ ކުރިއަށް. ހަމަ އެއާއެކީގައި ހޭންޑް އިން ހޭންޑް އެބަ ކުރިއަށް ގެންދެވޭ އަޅުގަނޑުމެންގެ ޓީމުން ޑިސްއިންފެކްޝަނާ ގުޅޭ ކަންކަން،" ވިސާމް ވިދާޅުވި އެވެ.

Bodu 3 importarun quarantine kurumaa eku mulhi raajjeyge viyafaari ah lolhun araifi

The most trusted news source in the Maldives

Mihaaru

އޭނާ ވިދާޅުވި ގޮތުގއި، ލިލީ އާއި ބީއެޗްއެމް އަދި އެމްއެޗްއޭގެ މުވައްޒަފުންތަކެއް ކޮވިޑް-19 އަށް ޕޮޒިޓިވްވުމުން އެޗްޕީއޭގެ އިލްތިމާސްތަކަށް އަމަލުކުރަމުން ދާއިރުގައި ވިޔަފާރީގެ އޮޕަރޭޝަންތަކަށް ވަރަށް ބޮޑެތި އުނދަގޫތަކެއް ވަނީ ކުރިމަތިވެފަ އެވެ ކަމަށެވެ. މިހާރު ބަލަމުން އަންނަނީ، އޭނާ ވިދާޅުވި ގޮތުގައި، ސީދާ އޮޕަރޭޝަން އެކީ އެކައްޗަކަށް ނުފެއްޓޭ ފަރާތްތަކަށް ވެސް އެކަން ކުރެވޭނެ އެހެން ގޮތްތައް ބެލުމެވެ.

އެ ކުންފުނިތަކަށް ސަރުކާރުން އެހީތެރިކަން ދީގެން އޮޕަރޭޝަން ކުރިއަށް ގެންދެވޭނެ ގޮތެއް ބަލަމުން އަންނަ ކަމަށް ވިސާމް ވިދޅާުވި އެވެ.

ވިޔަފާރިވެރިން ބުނާގޮތުގައި ލިލީ އާއި ބީއެޗްއެމް އަދި އެމްއެޗްއޭ އަކީ ރާއްޖޭގެ ރިޓެއިލް މާކެޓަށް ބޭނުންވާ 60-70 ޕަސެންޓް މުދާ އެތެރެކުރާ ހޯލްސޭލަރުންނެވެ. އެ ތަންތަނުން އެތެރެކުރާ ގިނަ މުދަލަކީ އާންމު ބޭނުންތަކަށް ބޭނުންވާ ސާމާނެވެ.

ބާޒާރުމަތީގައި ހޯލްސޭލް ކުރާ ބޮޑު ފިހާރައަކުން ބުނީ ލިލީ އާއި ބީއެޗްއެމާއި އެމްއެޗްއޭ އަކީ ބާޒާރުމަތީގައި ދެން ހުރި ފިހާރަތަކަށް ވެސް މުދާ ސަޕްލައިކޮށްދޭ މައި ތިން ހޯލްސޭލަރު ކަމަށް ވާއިރު، އެ ތިން ތަން މިވަގުތު ބަންދު ކުރުމުން، މުދާ ލިބުން އެއްކޮށް ހުއްޓިފައިވާ ކަމަށެވެ. އެ ފިހާރައިން ބުނީ، ރަށްރަށަށް ބޭނުންވާ މައިގަނޑު މުދާ ލިބުން މިހާރު އެއްކޮށްހެން ހުއްޓިފައިވާ ކަމަށާއި ރަށްރަށާއި މާލޭގެ ރީޓެއިލް ފިހާރަތަކުން ފޮނުވާފައިވާ ވަރަށް ގިނަ ލިސްޓްތަކަށް ހުރީ މުދާ ނުނެގި ކަމަށެވެ.