ކާބުލްގެ ހޮސްޕިޓަލަށް ދިން ހަމަލާ އަށް ފަހު ސިފައިންގެ މީހަކު ކުޑަ ކުއްޖަކު އުރާލައިގެން ދަނީ. --ފޮޓޯ:އީޕީއޭ
13 މެއި 2020 - 12:53
9 comments
ކާބުލް (މެއި 13) - އަފްޣާނިސްތާނުގެ ވެރިރަށް ކާބުލްގެ ހޮސްޕިޓަލެއްގެ އަންހެނުންގެ ވޯޑަށް ހަތިޔާރު އަޅައިގެން ތިބި ބަޔަކު ދިން ހަމަލާގައި ތުއްތު ދެ ކުދިންނާއި 12 މައިންނާއި އެތައް ނަރުހުންނެއް މަރުވެފައިވާ ކަމަށް އޮފިޝަލުން ބުނެފި އެވެ.
މި ހަމަލާގައި އިތުރު 15 މީހަކު ޒަޚަމްވި އެވެ. ހޮސްޕިޓަލަށް ދިން ހަމަލާގެ ޒިންމާ އެއްވެސް ބަޔަކު އަދި އުފުލައިފައެއް ނުވެ އެވެ. ތާލިބާނުން ބުނެފައި ވަނީ އެއީ އެ މީހުން ދިން ހަމަލާއެއް ނޫން ކަމަށެވެ. އަނެއްކޮޅުން އަފްޣާނިސްތާނުގެ އިރުމަތީގެ ނަންގަރްހާރުގައި ކޮމާންޑަރެއްގެ ޖަނާޒާ އަށް ދިން ހަމަލާގައި ވަނީ 24 މީހުން މަރުވެފަ އެވެ. އެ ހަމަލާގެ ޒިންމާ ވަނީ އިސްލާމިކް ސްޓޭޓް (އައިއެސް) އިން އުފުލައިފަ އެވެ.
ކާބުލްގެ ހޮސްޕިޓަލްގެ އަންހެނުންގެ ވޯޑް ހިންގަނީ ބައިނަލްއަގުވާމީ މެޑިކަލް ޗެރިޓީއެއް ކަމަށްވާ މެޑިސިންސް ސެންސް ފްރަންޓިއާސް (އެމްއެސްއެފް) އިންނެވެ. އެ ވޯޑުގައި ބައެއް ބިދޭސީން ވެސް މަސައްކަތް ކުރެ އެވެ.
ވޯޑަށް ދިން ހަމަލާއިން ސަލާމަތްވި ޑޮކްޓަރަކު ބުނީ ހަނގުރާމަވެރިން ހަމަލާ ދިން އިރު ހޮސްޕިޓަލުގައި 140 މީހުން ތިބޭނެ ކަމަށެވެ. އެއީ ސަރުކާރުގެ ހޮސްޕިޓަލަކަށްވުމުން ވަރަށް ގިނަ މީހުން ޑޮކްޓަރަށް ދައްކަން އެތަނަށްދާ ކަމަށްވެ އެވެ.
އަފްޣާން ސްޕެޝަލް ފޯސަސް އިން ވަނީ 100 އަންހެނުންނާއި ކުޑަ ކުދިން ސަލާމަތްކޮށްފަ އެވެ. އޭގެ ތެރޭގައި ތިން ބިދޭސިން ވެސް ހިމެނެ އެވެ. ހަނގުރާމަވެރިން ހަތިޔާރު ހިފައިގެން ހޮސްޕިޓަލަށް ވަދެފައި ވަނީ ފުލުހުންގެ ޔުނިފޯމް އަޅައިގެންނެވެ. ހަމަލާ ދިން ހުރިހާ ހަނގުރާމަވެރިން ވެސް ވަނީ މަރާލައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ކަރުކެހިބެ
13 May 2020
ދީނުން ވަރަށް ގިނަ ކަންކަމަށް ހުއްޖަތު އެބަޔަކު ބޭނުން ގޮތަކަށް އެބަ ދައްކައެވެ. މައްސަލަ ހުރި ދިމާލެއް މުޅިން ސާފެއް ނޫނެވެ.
ޝާޑު
13 May 2020
މައްސަލަ ހުރީ ސިކުނޑިގާ.
އާދަމް ބާއީ
13 May 2020
މިގަޑީގާ މިމީހުން ހާދަ ނުލަފާއެކޭ މިއަރުވާލަނީ. މިމީހުންނަށް ކުޅިދައްކާލަންޖެހޭނެ.
ސީރިއަސްކޮށް
13 May 2020
މިދެން ކިހާ ބޮޑުވެއްޖެ މުސީބާތެއް!!!
ނުބައި ނުލަފާކަން
13 May 2020
ހުރި ނުލަފާކަން ނިކަން ބަލާށެވެ. ކޮން ކުށެއް އޮތް ބަޔަކު ތި މަރާލީ. ތިއީތަ ޖިހާދު ކުރުމަކީ.. ޝައިތާނުން.
ސައިމާ
13 May 2020
ވެއިޓް. އިސްލާމިކް ސްޓޭޓޭ މިކިޔާ ބައިގަނޑުގެ ނަމުން އިސްލާމިކް ކަނޑާލާ. އޭގެ ބަދަލުގައި ބާރބޭރިކް ސްޓޭޓޭ ކިޔަންވީ. އިސްލާމުންނަކީ ކުޑަކުދިންނާ އަންހެނުން މަރާބައެއްނޫން. ނިކަން މޮޅުކަމެއްކަމަށް ހީވީތާ؟ އަދި ހަމަލާދެނީވެސް މުސްލިމުންނަށް. އަދުއްވުންނަކަށްނޫން.
falcon_autho
13 May 2020
އެވާހަކަ ޔޫރަޕުގެ އަދި އެމެރިކާގެ މީޑިއާ ތަކުން ކުރިއަށް އޮތް ހަފްތާގެ ކޮންމެ ގަޑިއަކުން އެއްފަހަރު ކިޔާނެ. ބޭނުމަކީ ނުބައި ބައެއްގެ ގޮތުގައި މުސްލިމުން ދެއްކުން. ސަބަބަކީ އިސްލާމް ދީން ފުޅާވަމުންދާތީ އެކަމުގެ ބިރު "އިސްލާމީ" ނަންޖަހައިގެންތިބި މުނާފިގުންނަށާއި ކާފަރު ހަސަދަވެރިންނަށް ބޮޑުވުން. އެހެންކަމުން އައި.އެސް.އޭ ކިޔައި ޖަމާއަތެއް އުފަންކޮށް އެވެރިންނަށް ފައިސާއާއި ހަތިޔާރު ދީގެން ހިންގާ ކަންކަން. މިގައުމުގައިވެސް ތިޔަ އައިއެސްގެ ދިވެހިން.
ބަދުނާމް
13 May 2020
މިއީ މުސްލިމުން ބަދުނާމް ކުރަން އެމެރިކާ އާއި ޔަހޫދީން ހިންގާ ޖަމާޢަތްތަކުން ހިންގާ ލާއިންސާނީ އަމަލުތައް. އިސްލާމް ދީނުގައި ކުޑަކުދިންނާއި އަންހެނުން ކީއްކުރަން އެއްވެސް މީހަކު ހައްޤަކާއި ނުލައި މެރުމަކީ އެއްވެސް ގޮތަކަށް ހުއްދަކުރާ ކަމެއްނޫން.
12345
13 May 2020
މިވެސް މުސްލިމުންނޯ. މިތާވެސް މިކަހަލަ ވިސްނުމުގެ ބަޔަކު އުޅޭ. މިއީ ދީންކަމަށް މިމީހުންގެ ސިކުޑިއަށް ވައްދަނީ އިބްލީސް.