ޚަބަރު / ކަނޑުމަތީގެ ހާދިސާ

ލަންކާއިން ކަނޑުވި ކަމަށް ބެލެވޭ މީހަކު ރާއްޖޭން ސަލާމަތްކޮށްފި

ޑިންގީގައި އޮޔާ ދަނިކޮށް ސަލާމަތް ކުރި ފިރިހެން މީހާ

އާމިނަތު ޝިފްލީން، މިހާރު

16 ފެބުރުއަރީ 2021 - 19:36

2 comments

އޮޔާ ދިޔަ ޑިންގީއެއްގައި އެކަނިމާއެކަނި އިން މީހަކު ވ. އަންބަރާ ބޭރުން މިއަދު ފެނިގެން ސަލާމަތްކޮށްފި އެވެ.

އެ މީހާ ފެނުނީ އެ ސަރަހައްދުން ދަތުރުކުރި ސަފާރީއަކަށެވެ. އަދި މިއަދު ހަވީރު 5:10 ހާއިރު ސިފައިންނަށް ރިޕޯޓު ލިބުމާއެކު، ކޯސްޓްގާޑު ލޯންޗުން ވަނީ، އެ މީހާ ސަލާމަތްކޮށްފަ އެވެ.

އެމްއެންޑީއެފުން ބުނިގޮތުގައި އެ މީހާ އަތުގައި ހުރި ލިޔެ ކިޔުންތަކަށް ބަލާއިރު އެއީ ސްރީ ލަންކާ މީހެއް ކަމަށް ބެލެވެ އެވެ.

އެ މީހާ އިން ޑިންގީގެ ޑިޒައިނާއި އޭގެ ރަޖިސްޓްރީ ނަންބަރުން ބެލެވޭ ގޮތުގައި އެއީ ލަންކާ އުޅަނދެކެވެ. ރަޖިސްޓްރީ ނަންބަރުން ބޮޑަށް ބެލެވެނީ އެއީ ލަންކާގެ ނިގަމްބޯގައި ރަޖިސްޓްރީކޮށްފައިވާ އުޅަނދެއް ކަމަށެވެ.

ޑިންގީގައި އިން މެދުއުމުރުގެ ފިރިހެން މީހާ އިނީ ވަރަށް ބޮޑަށް އަނަރޫފަވެފަ އެވެ.

އެމްއެންޑީއެފުން ބުނީ ކޯސްޓްގާޑުގެ ބެލުމުގެ ދަށުން، ޑިންގީއާ އެކު އެ މީހާ މިހާރު ވ. ފެލިދޫއަށް ގެންދިޔުމުގެ މަސައްކަތް ކުރަމުން އަންނަ ކަމަށެވެ.