ފޯބްސްގެ ފަސް ތަރީގެ އެވޯޑު މިފަހަރު ވެސް ރާއްޖޭގެ ހަ ރިސޯޓަކަށް

ފޯބްސްގެ ލިސްޓްގައި ހިމެނުނު އެއް ރިސޯޓް ކަމަށް ވާ ކަނުހުރާ: ރާއްޖެއަކީ ކޮވިޑް ތެރޭގައި ޓޫރިޒަމް ހުޅުވާލި އެންމެ ކާމިޔާބު މަންޒިލް

އިދުހާމް ނައީމް، މިހާރު

27 ފެބުރުއަރީ 2021 - 11:49

3 comments

ދުނިޔޭގެ މަޝްހޫރު މަޖައްލާއެއް ކަމަށްވާ ފޯބްސްގެ ޓްރެވަލް ގައިޑުން ދޭ ފަސް ތަރީގެ އެވޯޑު މި އަހަރު ވެސް ރާއްޖޭގެ ހަ ރިސޯޓަކަށް ލިބިއްޖެ އެވެ.

މި އެވޯޑުތައް ލިބުނީ މިދިޔަ އަހަރު ވެސް އެ ލިސްޓުގައި ހިމެނުނު ހަ ރިސޯޓަށެވެ. އެއީ ޝެވަލް ބްލާންކް ރަންދެލި އާއި ފޯ ސީޒަންސް ކުޑަ ހުރާ އާއި ކަނުހުރާ މޯލްޑިވްސް އާއި ވަން އެންޑް އޮންލީ ރީތިރަށާއި ވޯއްމުލި އަދި ވެލާ ޕްރައިވެޓް އައިލެންޑެވެ.

ފޯބްސް އިން މި ލިސްޓުގައި ހިމަނަނީ ދުނިޔޭގެ ހުރިހާ މަންޒިލަކުން އެންމެ ފާހަގަކޮށްލެވޭ ރިސޯޓުތަކާއި ހޮޓާތަކެވެ. މިއީ ގިނަ އަދަދެއްގެ ޓޫރިސްޓުން ދަތުރުކުރަން އެންމެ ރަނގަޅު މަންޒިލް ކަނޑައެޅުމުގައި ބަލާ ލިސްޓެކެވެ.

ފޯބްސްގެ ލިސްޓުގައި މި އަހަރު ރާއްޖޭގެ 16 ރިސޯޓެއް ވަނީ ހިމަނައިފަ އެވެ. އޭގެ ތެރެއިން ހަ ރިސޯޓަކަށް ހަތަރު ތަރީގެ އެވޯޑު ދީފައިވާއިރު ހަތަރު ރިސޯޓެއް ވަނީ "ރެކޮމެންޑް" ކޮށްފަ އެވެ.

ފޯބްސް ލިސްޓުގައި ހިމެނުނު އިތުރު ރިސޯޓުތައް

- ބަންޔަން ޓްރީ ވައްބިންފަރު: ހަތަރު ތަރި

- ތާޖު އެގްޒޯޓިކާ: ހަތަރު ތަރި

- ޖުމެއިރާ ވިޓަވެލި: ހަތަރު ތަރި

- ކޮންރަޑް މޯލްޑިވްސް ރަންގަލި: ހަތަރު ތަރި

- ޖޯލި މޯލްޑިވްސް: ހަތަރު ތަރި

- ޕާކް ހަޔާތު މޯލްޑިވްސް ހަޑަހާ: ހަތަރު ތަރި

- ސިކްސް ސެންސަސް ލާމު

- ތާޖު ކޮރަލް ރީފް

- އަމިއްލަ ފުށި

- އަނަންތަރާ ކިހަވަށް

ފޯބްސް ޓްރެވަލް ގައިޑަށް ރިސޯޓުތައް ހޮވަނީ އެ މަޖައްލާގެ ރިޕޯޓަރުން ޓޫރިސްޓުންގެ ގޮތުގައި ރިސޯޓުތަކަށް ގޮސް ކުރާ ތަޖުރިބާތަކަށް ބަލައިގެންނެވެ. އެވޯޑު ދިނުމުގައި ވެސް އެ ރިސޯޓަކުން ފޯރުކޮށްދޭ ހިދުމަތްތަކަށް ބަލާނެ އެވެ.

ކޮވިޑް-19ގެ ސަބަބުން މިދިޔަ އަހަރު ދުނިޔޭގެ ޓޫރިޒަމަށް ބޮޑެތި ގެއްލުންތަކެއް ވި އެވެ. އަދި އެ ދާއިރާ އަލުން ކުރިއެރުވުމުގައި އެންމެ ކާމިޔާބުކަމާ އެކު މަސައްކަތް ކޮށްފައިވަނީ ރާއްޖެއިންނެވެ.