ލޯފަން މީހުންނަށް ހާއްސަކޮށްގެން އެޗްބީއޯ މެކްސް އަށް އޯޑިއޯ ޑިސްކްރިޕްޝަން

މިދިޔަ އަހަރު ލޯންޗްކުރި އެޗްބީއޯގެ ސްޓްރީމިން ޕްލެޓްފޯމް އެޗްބީއޯ މެކްސް އިން ލޯފަން މީހުންނަށް ހާއްސަކޮށްގެން އޯޑިއޯ ޑިސްކްކްރިޕްޝަންގެ ހިދުމަތް ތައާރަފުކޮށްފި އެވެ.

އެޗްބީއޯ މެކްސްގައި ހުރި ބައެއް ކޮންޓެންޓްތައް އަޑު އަހައިލެވޭ ގޮތަށް ތައާރަފުކުރި ހިދުމަތް ބޭނުންކުރެވޭނީ އެތަނުގެ ވެބްސައިޓުންނާއި މޮބައިލް އެޕުންނެވެ. ޓީވީ އެޕުން އޯޑިއޯ ޑިސްކްރިޕްޝަން ލިބޭ ގޮތަށް ހަދައިފައެއް ނުވެ އެވެ.

އެޗްބީއޯ މެކްސް އިން ބުނީ މި ހިދުމަތުގެ ސަބަބުން އެ ޕްލެޓްފޯމްގައި ހިމެނޭ ކޮންޓެންޓްތަކުގެ ތެރެއިން ބައެއް އެއްޗެހި އަޑު އަހާލައިގެން މިހާރު ހިތްހަމަޖެހިން ހޯދައިލެވޭނެ ކަމަށެވެ. މިއީ ލޯފަން މީހުންގެ އިތުރުން ލޮލުގެ އެކި ކަހަލަ މަައްސަލަތައް ހުންނަ މީހުންނާއި މަސައްކަތްތަކުގައި ބިޒީކޮށް އުޅޭ އިރު ކޮންޓެންޓްތައް ބަލައިލަން ވަގުތު ހުސްކުރަން ދަތިވާ މީހުންނަށް މަސައްކަތުގައި އުޅެމުން އަޑު އަހާލައިގެން ކޮންޓެންޓްތަކުން ކިޔައިދޭ ވާހަކަ ތަޖުރިބާކޮށްލެވޭނެ ގޮތެކެވެ.

މީގެ ކުރިން ވެސް އެޗްބީއޯ މެކްސްގެ ވަރަށް މަދު ކޮންޓެންޓްތަކެއްގެ އަޑު އަހައިލެވޭ ގޮތަށް ހެދި އެވެ. އޭގެ ތެރޭގައި ޔޫފޯރި އާއި ހިޒް ޑާކް މެޓީރިއަލްސް އާއި ޖެނެރޭޝަން އާއި ބެޓްމޭން ވާސަސް ސުޕަމޭން: ޑޯން އޮފް ޖަސްޓިސް އަދި ޑަންކާކްގެ އިތުރުން ބައެއް އެހެން އުފެއްދުންތައް ވެސް ހިމެނެ އެވެ.

އެބްޗީއޯ މެކްސް އިން ލޯފަން މީހުންނަށް ހާއްސަކޮށްގެން އޯޑިއޯ ޑިސްކްރިޕްޝަން ތައާރަފުކުރީ އޭގެ ބެލެނިވެރި ކުންފުނި ވޯނާ މީޑިއާ އާއި އެޑްވޮކެސީ ގްރޫޕްތަކާ އެކު މިދިޔަ އަހަރުގެ އޮކްޓޯބަރު މަހުގެ ތެރޭގައި ވެވުނު އެއްބަސްވުމެއްގެ ދަށުންނެވެ.

އެ އެއްބަަސްވުމުގެ ދަށުން މި މަސް ނިމުމުގެ ކުރިން މަދުވެގެން 1،500 ގަޑިއިރުގެ ޑިސްކްރައިބްޑް ކޮންޓެންޓް އަދި އަންނަ އަހަރުގެ މާޗް ނިމުމުގެ ކުރިން 6،000 ގަޑިއިރުގެ ކޮންޓެންޓް ހިމަނަން އެއްބަސްވެފައިވެ އެވެ.

އޯޑިއޯ ޑިސްކްރިޕްޝަން ހިދުމަތް ތައާރަފުކުރުމާ ގުޅިގެން އެމެރިކަން ކައުންސިލް އޮފް ދަ ބްލައިންޑް (އޭސީބީ) އިން އެކަމަށް މަރުހަބާ ކިޔާފައިވެ އެވެ. އެތަނުން ނެރުނު ބަޔާނެއްގައި ބުނީ މިއީ ހަމަހަމަކަން ގެންނަން ކުރެވޭ މަސައްކަތްތަކަށް ލިބުނު އިތުރު ކުރިއެރުމެއް ކަމަށެވެ.

"މިއިން ކަށަވަރުވި ކަމަކީ އެޗްބީއޯގެ މެކްސްގެ ކޮންޓެންޓްތަކުން ހިތްހަމަޖެހުން ހޯދުމުން ލޯފަން މީހުންނާއި ލޮލުގެ އެކި ކަހަލަ މައްސަލަތައް ހުންނަ މީހުން މަހުރޫމު ނުވާނެކަން." އޭސީބީގެ ރައީސް ޑޭން ސްޕޫން ވިދާޅުވި އެވެ.

މިހާރު ވަރަށް ބޮޑު މަގުބޫލުކަމެއް ހޯދަމުން އަންނަ އެޗްބީއޯ މެކްސް އަކީ މިދިޔަ އަހަރުގެ މެއި 27 ގައި ލޯންޗްކުރި ހިދުމަތެކެވެ. އެ ބޭނުންކުރާ މީހުންގެ އަދަދު މިހާރު 40 މިލިއަނާ ގާތްކުރެ އެވެ. އެކަމަކު އެޗްބީއޯ މެކްސް އަކީ އަދި މުޅި ދުނިޔެ އަށް ފުޅާކޮށްފައިވާ ހިދުމަތެއް ނޫނެވެ.