ސަރުކާރުގެ މަސް ކުންފުނި މިފްކޯގެ ހުޅުމީދޫ ބަނދަރުގެ ފުރަތަމަ ފޭހުގެ އަމަލީ މަސައްކަތް އެމްޓީސީސީން މިއަދު ފަށައިފި އެވެ.
އެ މަޝްރޫއުގެ މަސައްކަތް ފަށަން މިއަދު ބޭއްވި ރަސްމިއްޔާތުގައި އެމްޓީސީސީގެ ވެރިންނާއި އައްޑޫގެ ކައުންސިލަރުންނާއި ރައްޔިތުންގެ މަޖިލީހުގެ އައްޑޫގެ ބައެއް މެމްބަރުން ވެސް ބައިވެރިވެވަޑައިގެންނެވި އެވެ.
އެމްޓީސީސީއާ ހަވާލުކޮށްގެން ހުޅުމީދޫގެ މިފްކޯ ބަނދަރުގެ މަސައްކަތް ފެށި އިރު، އެ މަޝްރޫއުގެ ދަށުން 471،380 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 1،788 ކިއުބިކް މީޓަރުގެ ސަރަހައްދެއްގެ ބިން ހިއްކުމާއި، 97 މީޓަރުގެ ސަރަހައްދެއްގައި އެއްގަމު ތޮށިލުމުގެ މަސައްކަތް ކުރާނެ އެވެ.
މި މަޝްރޫއަށް ހަރަދުވާނީ 68.80 މިލިއަން ރުފިޔާ އެވެ.
މިފްކޯގެ ބަނދަރުގެ މަސައްކަތް ފެށި އިރު، މިފްކޯގެ މަސް ޕްލާންޓެއް ހުޅުމީދޫގައި ގާއިމުކޮށްފައިވެ އެވެ. އެ މަޝްރޫއަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި މަޝްރޫއެކެވެ.
މި މަހުގެ 10 ވަނަ ދުވަހު ލޯކަލް ކައުންސިލް އިންތިހާބު ބާއްވަން ކުޑަތަންވެފައި ވަނިކޮށް އައްޑޫގައި އެކިއެކި ޕްރޮޖެކްޓަތްކުގެ ފެށުމުގެ ފޯރި އާއި ނިންމައިލި ޕްރޮޖެކްޓްތައް އެ ޕްރޮޖެކްޓްތަކާ ގުޅުން ހުރި ފަރާތްތަކާ ހަވާލުލުރުމުގެ މަސައްކަތްތައް އަންނަނީ ކުރަމުންނެވެ.
