ޚަބަރު / ރާއްޖެ-ޗައިނާ

ރައީސް އަރިހަށް ޗައިނާގެ ސަފީރު ވަދާއީ ޒިޔާރަތް ކުރައްވައިފި

ޗަައިނާ އިން ރާއްޖެއަށް ކަނޑައަޅުއްވާފައިވާ ސަފީރު ޖަންގް ލިޖޮންގްގެ ދައުރު ހަމަވުމުން، ރައީސް އިބްރާހިމް މުހައްމަދު ސޯލިހުއަށް އަލްވަދާއު ކިޔުއްވައިފި. އޭނާގެ ދައުރުގައި ރާއްޖެއަށް ކުރެއްވި ހިދުމަތަށް ރައީސް ޝުކުރުއަދާކުރެއްވި.

ޗައިނާ ސަފީރު ޖަންގް ލިޖޮންގް (ވ)، ރައީސް އިބްރާހިމް މުހައްމަދު ސޯލިހުއަށް މިއަދު ކުރެއްވި ބައްދަލުވުމުގައި ނަގާފައިވާ ފޮޓޯ އެއް -- ފޮޓޯ: ރައީސް އޮފީސް

ލަމްޔާ އަބްދުﷲ، މިހާރު

07 އެޕްރީލް 2021 - 16:35

2 comments

ރައީސް އިބްރާހިމް މުހައްމަދު ސޯލިހުގެ އަރިހަށް، ރާއްޖޭގައި ހުންނަވާ ޗައިނާގެ ސަފީރު ޖަންގް ލިޖޮންގް މިއަދު ވަދާއީ ޒިޔާރަތް ކުރައްވައިފި އެވެ.

ރައީސް އޮފީހުގައި ބޭއްވި ބައްދަލުވުމެއްގައި، ސަފީރުގެ ދައުރުގައި ރާއްޖެ އަށް ދެއްވި އެއްބާރުލުމަށާއި އެހީތެރިކަމައް ޝުކުރުއަދާކުރެއްވި ކަމަށް ރައީސް އޮފީހުން ބުންޏެވެ.

ކޮވިޑް-19 އާ ގުޅިގެން ދިމާވި ހާލަތުގައި ޗައިނާ އިން ރާއްޖެއަށް ދިން އެހީތެރިކަމަށް އެ ގައުމަށް ރައީސް އިބްރާހިމް މުހައްމަދު ސޯލިހު ޝުކުރު އަދާކުރެއްވި އެވެ. ވަކިން ހާއްސަކޮށް ޗައިނާ އިން އުފެއްދި ސައިނޮފާމް ވެކްސިންގެ 200،000 ޑޯޒާއި އެހެން ސިއްހީ ސާމާނު ދިނުމުން ވެސް، ޗައިނާ ސަފީރަށް ރައީސް ޝުކުރުއަދާކުރެއްވި އެވެ.

ދެ ގައުމުން ގުޅިގެން ކުރަމުން އަންނަ މަސައްކަތްތަކާ ގުޅިގެން ދެ ބޭފުޅުން މަޝްވަރާކުރެއްވި ކަމަށް ރައީސް އޮފީހުން ބުންޏެވެ. އޭގެ ތެރޭގައި އިޖުތިމާއީ-އިގުތިސާދީ ތަރައްގީގެ މަޝްރޫއުތަކާއި ސިއްހަތު އަދި ވިޔަފާރިއާ ގުޅުން ހުރި މަޝްރޫއުތައް ހިމެނެ އެވެ.

ރާއްޖެ އަށް ޗައިނާ އިން ކަނޑައެޅި ސަފީރުގެ ހައިސިއްޔަތުން މަސައްކަތް ކުރެއްވުމުގެ ފުރުސަތު ލިބިވަޑައިގަތުމުން އުފާކުރައްވާ ކަމަށް ޖަންގް ލިޖޮންގް މި ބައްދަލުވުމުގައި ވިދާޅުވި ކަމަށް ރައީސް އޮފީހުން ބުންޏެވެ.