ޕޭޕަރު ލީކުވިޔަސް، ތާވަލާ އެއްގޮތަށް ރާއްޖޭގައި އޭލެވެލް އިމްތިހާނު ކުރިއަށް ދާނެ: އެޑިއުކޭޝަން

އެޑެކްސެލް އިން އަންގަންދެން މިހާރު ތާވަލުކުރެވިފައިވާ ގޮތަށް ދިވެހިރާއްޖޭގައި އޭލެވެލް އިމްތިހާނު ކުރިއަށް ގެންދާނެ

ދަރިވަރުންތަކެއް އޯލެވެލް އިމްތިހާނު ހަދަނީ: މިހާރު ކުރިއަށްދާ އޭލެވެލް އިމްތިހާނުގެ ޕޭޕަރު ލީކު ވިޔަސް ކުރިއަށް ގެންދާނެ ކަމަށް ވަނީ ބުނެފައި.-- މިހާރު ފައިލް ފޮޓޯ

މާއިދާ މުހައްމަދު ރަޝާދު، މިހާރު

30 އެޕްރީލް 2021 - 17:47

7 comments

ރާއްޖޭގައި މިހާރު ކުރިއަށްދާ އޭލެވެލް އެޑެކްްސެލް އިމްތިހާނުގެ ބައެއް ސުވާލު ކަރުދާސްތައް ލީކުވެފައިވާ ކަމަށް ވާހަކަ ދެކެވުނަސް ތާވަލުކޮށްފައިވާ ގޮތަށް ރާއްޖޭގައި އިމްތިހާނު ކުރިއަށް ގެންދަން ނިންމާފައިވާ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

އޭލެވެލްގެ ބައެއް ޕޭޕަރުތައް ލީކުވެފައިވާ ކަމުގެ އަޑުތައް އެރީ އިއްޔެ އެވެ. އޭގެ ތެރޭގައި ރާއްޖޭގައި މިއަދު މެންދުރު ފަހު އޮތް އެޑެކްސެލްގެ ބަޔޮލޮޖީ ޕޭޕަރާއި އިއްޔެ މެންދުރު 1:30 ގައި އޮތް ފިޒިކްސް ޕޭޕަރު ވެސް ހިމެނެ އެވެ.

އެކަމާ ގުޅިގެން މިނިސްޓްރީން ނެރުނު ބަޔާނެއްގައި ބުނީ އޭލެވެލް އިމްތިހާނުގެ ސުވާލު ކަރުދާސްތައް ރައްކާތެރިކަމާއެކީ ބެލެހެއްޓުމުގެ ކަންކަން ރާއްޖޭގައި އުސޫލުތަކާ އެއްގޮތަށް ކުރިއަށް އެބަދާ ކަމަށެވެ. އަދި ރާއްޖޭގެ އެއްވެސް ސެންޓަރަކުން މި އިމްތިހާނުގެ ޕޭޕަރެއް ލީކުވެފައި ނުވާ ކަމުގެ ޔަގީންކަން ވެސް މިނިސްޓްރީން ވަނީ ދީފަ އެވެ.

މިނިސްޓްރީން ބުނި ގޮތުގައި ރާއްޖޭގެ އެއްވެސް ސެންޓަރަކުން މިއިން ޕޭޕަރެއް ލީކު ނުވި ނަމަވެސް ބޭރުގެ ބައެއް އޮންލައިން ޕްލެޓްފޯމްތަކުގައި މި ޕޭޕަރުތައް ލީކުވެފައިވާ ކަމަށް އެބަ ވާހަކަ ދެކެވެ އެވެ. އެހެންވެ، އެޑެކްސެލުން އަންނަނީ އެ މައްސަލަ ބަލަމުންނެވެ.

އެކަމާ ގުޅިގެން ފިޔަވަޅެއް އަޅަން އެޑެކްސެލުން އަންގަންދެން މިހާރު ތާވަލުކޮށްފައިވާ ގޮތަށް އިމްތިހާނު ކުރިއަށް ގެންދަން ނިންމާފައިވާ ކަމަށް ވެސް މިނިސްޓްރީން ބުނެ އެވެ.

"މިކަމާ ގުޅިގެން އެހެން ގޮތަކަށް އަމަލުކުރުމަށް އެޑެކްސެލް އިން އަންގަންދެން މިހާރު ތާވަލުކުރެވިފައިވާ ގޮތަށް ދިވެހިރާއްޖޭގައި އޭލެވެލް އިމްތިހާނު ކުރިއަށް ގެންދާނެ ކަމުގައި ދެންނެވީމެވެ،" މިނިސްޓްރީގެ ބަޔާނުގައި ބުންޏެވެ.

ރާއްޖޭގައި އޭލެވެލް އިމްތިހާނު ފެށީ މިދިޔަ ހޯމަ ދުވަހު އެވެ.