ރައްޔިތުން މަޖިލީހުން މިއަދު އާންމުކުރި އެއެމްޕީއާރުސީގެ ބޮޑު ހިޔާނާތުގެ ތުހުމަތުވާ ފަރާތްތަކުގެ ލިސްޓުގައި ނަން ހިމެނޭކްރިމިނަލް ކޯޓް އަދި ޖުވަނައިލް ކޯޓުގެ ކުރީގެ ފަނޑިޔާރު އަބްދުލް ބާރީ ޔޫސުފާއި މިހާރުގެ އޮޑިޓާ ޖެނެރަލް ހަސަން ޒިޔަތު އަދި ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިން.--
12 މެއި 2021 - 18:07
5 comments
ރައްޔިތުން މަޖިލީހުގެ އިދާރާ އިން މިއަދު އާންމުކުރި އެއެމްޕީއާރުސީގެ ބޮޑު ހިޔާނާތުގެ ތުހުމަތުވާ މީހުންގެ ލިސްޓުގައި މިނިވަން މުއައްސަސާތަކުގައި އެހާރާއި މިހާރު ވެސް އެ ތަންތަނުގައި އުޅުއްވާ އިސް ބޭފުޅުންގެ ނަންތައް ހިމެނިއްޖެ އެވެ.
އެމްއެމްޕީއާރުސީގެ ހިޔާނާތުގެ ފައިސާގައި ޖެހިފައިވާ ކަމަށް ތުހުމަތު ކުރެވޭ އަދި މަންފާ ލިބުނު މީހުންގެ ތެރެއިން ދައުލަތުގެ މަގާމުތަކުގައި ކުރިން ތިބި އަދި މިހާރު ވެސް މަގާމުތަކުގައި ތިއްބެވި 119 ބޭފުޅެއްގެ ނަން ހިމެނޭ ލިސްޓަކާއި އަދި މުޅި ހިޔާނާތުގެ ތެރޭގައި ހިމެނޭ 281 މީހެއްގެ ލިސްޓެއް ވަނީ އާންމުކޮށްފަ އެވެ.
މިނިވަން މުއައްސަތާކަށް ނިސްބަތްވާ 11 ބޭފުޅެއްގެ ނަން މި ލިސްޓުގައިވެ އެވެ.
މި ދެ ލިސްޓްގައި ވެސް ހިމެނެނީ ހަމައެކަނި ނަންތަކެވެ. މިހާރު އަދާކުރައްވާ ވަޒީފާ އާއި ކުރީގެ ވަޒީފާ ވެސް ހިމަނައިފައިވެ އެވެ. އެކަމަކު އެ ފައިސާ ލިބިފައި ވަނީ ކޮންކޮން ގޮތަކަށްތޯ އާއި އެއީ ކިހާވަރެއްކަން މަޖިލީހުގެ އިދާރާގެ ލިސްޓަކުން އެނގޭކަށް ނެތެވެ. އެކަމަކު، ރޭ ލީކުވި އެސެޓް ރިކަވަރީ ކޮމިޝަންގެ ރިޕޯޓުގައި އެ ތަފުސީލް ކޮންމެވެސް ވަރަކަށް ހުއްޓެވެ.
މަޖިލީހުގެ އިދާރާގެ ލިސްޓްގައި ބުނެފައިވާ ގޮތުން، މިއީ އަދި ތަހުގީގު ވެސް ނުނިމޭ ލިސްޓެކެވެ. މި ލިސްޓްގައި ހިމެނޭ ބައެއް މީހުންގެ ނަމާ ދިމާލުގައި މައުލޫމާތު އެއްކުރާ ކަމަށާއި ތަހުގީގު ކުރިއަށް ދާ ކަމަށް ވެސް އޮތީ ޖަހައިފަ އެވެ. މަޖިލީހުން މި ލިސްޓް އާންމުކުރީ، އެ މީހުންގެ ނަން އާންމުކުރިޔަސް ތަހުގީގަށް އެޅިދާނެ ހުރަހެއް އޮތް ކަމަށް ނުބެލެވޭތީ އެވެ.
މިނިވަން މުއައްސަސާތަކުގައި މިހާރު މަސައްކަތްކުރައްވާ ބޭފުޅުން
މި ލިސްޓުގައި މިނިވަން މުއައްސަސާތަކުގައި މިހާރު ވެސް މަސައްކަތް ކުރައްވަމުން ގެންދަވާ ބޭފުޅަކަށް ހިމަނާފައި ވަނީ އޮޑިޓާ ޖެނެރަލް ހަސަން ޒިޔަތުގެ ނަން އެކަންޏެވެ. ޒިޔަތު އަށް ތުހުމަތުވާ މައްސަލަ އޮތީ މައުލޫމާތު އެއްކުރުމުގެ މަރުހަލާގައި ކަމަށް ވެސް މި ލިސްޓުގައި ބުނެފައިވެ އެވެ.
ސަރުކާރުގެ އިދާރާތަކުގެ މާލީ ކަންކަން އޮޑިޓްކުރައްވާ ޒިޔަތު އޭނާ މަގަމާ ހަވާލުވެވަޑައިގަތީ 2014 ގަ އެވެ. އޭނާއަށް ލިބުނު ކަމަށް ތުހުމަތުކުރަނީ ރައްޔިތުންގެ މަޖިލީހަށް ޕީޕީއެމްގެ ފަރާތުން ވާދަކުރެއްވިއުރުގައި ކެމްޕެއިނަށް އެމްއެމްޕީއާރްސީގެ ހިޔާނާތުގެ ފައިސާ ލިބުނު ކަމަށެވެ.
ނަމަވެސް ހަސަން ވަނީ އެ ވާހަކަތައް މީޑިއާގައި މިއަދު ދޮގުކުރައްވައިފަ އެވެ.
އޭނާ "މިހާރު" އަށް ވިދާޅުވީ، އެމްއެމްޕީއާރުސީގެ ޚިޔާނާތުގެ ފައިސާއެއް ހޯއްދަވާފައި ނުވާނެ ކަމަށާއި ފައިސާ ލިބުނީ 2014 ގައިި ރައްޔިތުންގެ މަޖިލީހުގެ ކެމްޕެއިނަށް ޕީޕީއެމްގެ ފަރާތުން ކަމަށެވެ.
"ދެ ފަހަރެއްގެ މަތިން ޕީޕީއެމް އޮފީހަށް ގެންގޮސްފައި ލިޔުމުގައި ސޮއިކުރުވާފައި އަޅުގަނޑަށް އެ ޕާޓީން ފައިސާ ހަވާލުކުރީ. އޭރު އެމްއެމްޕީއާރުސީގެ މިފަދަ ކަމެއް އުޅޭ ކަމެއް އެއްވެސް މީހަކަށް ނުވެސް އިނގޭ،" ޒިޔަތު ވިދާޅުވި އެވެ.
މިނިވަން މުއައްސަސާތަކުގައި ކުރިން މަސައްކަތް ކުރެއްވި ބޭފުޅުން:
މި މައްސަލައިގައި މިހާރު ތަހުގީގީ މަރުހަލާގައި އުޅެނީ ހިޔާނާތުގެ ލިސްޓުގައިވާ ގޮތުން، ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ދީދީ އަދި އެންޓި ކޮރަޕްޝަން ކޮމިޝަން (އޭސީސީ) ގެ ކުރީގެ ރައީސް ހަސަން ލުތުފީގެ މައްސަލަ އެވެ. އަދި ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ސައީދަށް ކުރެވޭ ތުހުމަތުގެ ތަހުގީގު ފުރަތަމަ މަރުހަލާ މިހާރު ވަނީ ފަށައިފަ އެވެ.
މިނިވަން މުއައްސަސާތަކުގައި ކުރިން އިސްކޮށް މަސައްކަތް ކުރެއްވި ބޭފުޅުންގެ ތެރެއިން އޭސީސީގެ ކުރީގެ އިންވެސްޓިގޭޝަން އޮފިސަރު އަދި އައިލެންޑް އޭވިއޭޝަންގެ ބޯޑު މެމްބަރުކަން ވެސް ކުރެއްވި އަބްދުﷲ އާޒިމަށް މިހާރު އަންނަނީ މި ކްރިމިނަލް ކޯޓުގައި ދައުވާ ކުރަމުންނެވެ.
ދައުވާކުރަން ފޮނުވުމުގެ ކުރިން ފުރިހަމަ ކުރަންޖެހޭ ކަންކަމާ ބެހޭގޮތުން ޕްރޮސެކިއުޓާ ޖެނެރަލާއި ފުލުހުން މަޝްވަރާ ކުރާ މަރުހަލާގައި، މިނިވަން މުއައްސަސާތަކުގައި ކުރިން އިސްކޮށް އުޅުއްވި ދެ ބޭފުޅެއްގެ ނަން ވެސް އެބަ އޮތެވެ. އެއީ ކްރިމިނަލް ކޯޓާއި ޖުވަނައިލް ކޯޓުގެ ކުރީގެ ފަނޑިޔާރު އަބްދުލްބާރީ ޔޫސުފާއި ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިން އެވެ.
އިލެކްޝަން ކޮމިޝަންގެ ކުރީގެ ނައިބު ރައީސް އަހްމަދު އަކްރަމްގެ ނަން ވެސް މި ލިސްޓުގައި އެބަ އޮތެވެ. އޭނާގެ މައްޗަށް ކުރެވޭ ތުހުމަތުގައި ޖިނާއީ ދައުވާ ދޫކޮށްލައި، މަދަނީ ދައުވާ ކުރަން މިހާރު ނިންމާފައިވާ ކަމަށް ލިސްޓުގައި ބުނެ އެވެ.
ހިޔާނާތުގެ ފައިސާ ލިބުނު ކަމަށް ތުހުމަތު ކުރެވޭ މީހުންގެ ތެރެއިން މި ލިސްޓުގައި މައުލޫމާތު އެއްކުރާ މަރުހަލާގައި ހިމެނޭ ނަންތަކަކީ ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދު މުހައްމަދާއި ބްރޯޑްކާސްޓިން ކޮމިޝަންގެ ކުރީގެ މެމްބަރު އިސްމާއިލް ސޮފްވާން އަދި ކުރީގެ އެޓާނީ ޖެނެރަލް މުހައްމަދު އަނިލް އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޖާބެ
16 May 2021
އަދުލު އިންސާފު ވިއްކާމީހުންގެ މުދާވެސް ނެގެންވާނެ ، ޖަލުހުކުމް އަދި ދައުލަތުގެ އެއްވެސް ވަޒީފާއެއް މީގެންމީހަކައް ލިބިގެން ނުވާނެ ދެނެއް
ފޫހި
12 May 2021
80 ހާސް ރުފިޔާ ލިބޭއިރުވެސް ބަނޑުނުފުރުނު ބައެއް މެމްބަރުންނަކީ.
އެދުރުކަލޭގެފާނު
12 May 2021
ތިޔައިގެ ތެރޭގައި ތިޔަފަދަ މީހާގެ ނަޒާހަތްތެރިކަމަށް އުނިކަން އަންނަކަމެއްގައި ނަން ހިމެނޭތީ ބަހަނާ ނުދައްކައި އިސްތިއުފާ ދެއްވަން ކެރޭ މީހުން މަދުވާނެއެވެ. ގިނަ ފަހަރު މަޤާމުތަކަށް އަންނަނީ މީހާގައިގައި ނެތް ފެންވަރުގައި ކޮންމެވެސް ނުފޫޒެއްގެ ތެރެއިން ނޫނީ ރައްޔިތުންނަށް އުޑާބިން އަދި ރޭދުވާ ވަކިކުރަން ނޭގުނަސް އުޑުން ތަރި ބާލައި ދީގެންނެވެ. މިހާރު މޮޅުމީހުން ވަކިވެ އެނގޭނެއެވެ. އިސްތިޢުފާދެއްވަން ކެރޭނީ ވަރަށް ކެރޭ މޮޅު ތަޢުލީމީ މީހަކަށެވެ.
ދިވެހި ބެއްޔާ
12 May 2021
ކޮބާތޯ ކުރީގެ އޭސީސީގެ ނައިބު މުއައްވިޒް ރަޝީދު ގެ ވާހަކަ. ގައިމު ލިސްޓްގަ ނަން އެބަ އޮތް!
ސީޒަން ޖެކުހަން
12 May 2021
ޒިޔަރުގެނަން ތީގާއޮތީމާ ވަރަށް ހިނިއާދޭ.