އަނިލް ކަޕޫރް ހުރީ އަނެއްކާ ވެސް މަދޫރީއާ އެކު މަސައްކަތްކުރަން ބޭނުންވެފައި

އަހުމަދު އަދްޝަން، މިހާރު

17 މެއި 2021 - 08:04

އަދިވެސް ބަތަލާ މަދޫރީ ޑިކްސިޓާ އެކު މަސައްކަތްކޮށްލަން ބޭނުންވާ ކަމަށް އަނިލް ކަޕޫރް ބުނެފި އެވެ.

ހިންދީ ސިނަމާގެ އެންމެ މަގުބޫލު އެއް ޖޯޑުގެ ގޮތުގައި ފާހަގަކުރެވުނު ދެ ތަރިން އެކީގައި އެންމެ ފަހުން ކުޅުނު ފިލްމަކީ 2019 ގެ "ޓޯޓަލް ދަމާލް" އެވެ. އަނިލް އާއި މަދޫރީ އަކީ އެކީގައި ކާމިޔާބު ގިނަ ފިލްމުތަކެއް ކުޅެފައިވާ ދެ ތަރިންނެވެ.

ހޮނިހިރު ދުވަހު ފާހަގަކުރި މަދޫރީގެ 54 ވަނަ އުފަން ދުވަހުގެ ތަހުނިޔާ ޓްވިޓާ އިން ފޮނުވަމުން އަނިލް ބުނީ މަދޫރީ އެންމެ އުފާވާ ކަމަށް ފެންނަނީ އެކުވެރިންނާ އެކު ސެޓްތަކުން ކަމަށެވެ. އެހެންވެ އަލުން ދެ މީހުން އެކީގައި ސެޓަކަށް ދާން ބޭނުންވާ ކަމަށް ބުންޏެވެ.

Happy Birthday, @MadhuriDixit ! As actors I feel all of us are happiest on the sets, especially if you are working with friends...so I’m looking forward to being on set with you again!
Wishing you all the health & happiness always!! pic.twitter.com/IE0qe9kRSO
— Anil Kapoor (@AnilKapoor) May 15, 2021

މަދޫރީ އަކީ މިހާރު ކަލާޒް އިން ގެނެސްދޭ "ޑާންސް ދީވާނޭ 3" އިން ފެންނަ ޖަޖެކެވެ.

އޭނާ އެންމެ ފަހުން ބޮޑު ސްކްރީނުން ފެނިފައި ވަނީ 2019 ގެ "ކަލަންކް" އިންނެވެ. މަދޫރީ ވަރަށް އަވަހަށް ނެޓްފްލިކްސް އިން ސްޓްރީމްކުރަން ހަމަޖެހިފައިވާ ވެބް ސީރީޒް "ފައިންޑިން އަނާމިކާ" އިން ފެނިގެން ދާނެ އެވެ. އޭގައި އޭނާއާ އެކު އަނިލްގެ ކޮއްކޮ ސަންޖޭ ކަޕޫރް ވެސް ހިމެނެ އެވެ.

މަދޫރީ އާއި އަނިލް އެކީގައި ކުޅުނު ފިލްމުތަކުގެ ތެރޭގައި "ކޭލް"، "ބޭޓާ"، "ތޭޒާބް"، "ޖަމާއީ ރާޖާ"، "ރާމް ލަކަން" އަދި "ކަރްމާ" ފަދަ ފިލްމުތައް ހިމެނެ އެވެ.

ޒުވާން ކަމަށް ބަދަލެއް ނާންނަ އަނިލް، 64، ގެ އެންމެ ފަހުގެ ފިލްމަކީ މިދިޔަ އަހަރު ނެޓްފްލިކްސް އިން ގެނެސްދިން "އޭކޭ ވާސަސް އޭކޭ" އެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ޖުގް ޖުގް ޖިއޯ" އާއި "އެނިމަލް" ހިމެނެ އެވެ.