ވިޔަފާރި / އިކޮނޮމިކް ޑިވެލޮޕްމެންޓް މިނިސްޓްރި

ފިހާރަތަކާއި ރެސްޓޯރެންޓަކަށް 24 ގަޑިއިރު ޑެލިވަރީ ކުރެވޭނެ

މާލޭގެ ރެސްޓޯރެންޓެއް: ފިހާަރަތަކާއި ކާބޯތަކެތި ވިއްކާ ތަންތަން ހުޅުވާ ގަޑިތަކަށް ވަނީ ބަދަލު ގެނެސްފައި.--ފޮޓޯ:އަހުމަދު އަވްޝަން/މިހާރު

އިދުހާމް ނައީމް، މިހާރު

01 ޖުލައި 2021 - 21:22

1 comments

މާލެ ސަރަހައްދުގެ ފިހާރަތަކާއި ކާބޯތަކެތީގެ ހިދުމަތް ދޭ ތަންތަނުން 24 ގަޑިއިރު ޑެލިވަރީގެ ހިދުމަތް ފޯރުކޮށްދެވޭނެ ކަމަށް އިކޮނޮމިކް މިނިސްޓްރީން މިއަދު ބުނެފި އެވެ.

އެ މިނިސްޓްރީން ކުރި އިއުލާނެއްގައި ބުނީ މިއަދުން ފެށިގެން ވިޔަފާރިތައް ހުޅުވައިގެން ހިދުމަތް ދެވޭނީ ފަތިހު 4:00 އިން ރޭގަނޑު 8:00 އަށް ކަމަށެވެ. އަދި އެ ނޫން ވަގުތުތަކުގައި ޑެލިވަރީގެ ހިދުމަތް ދެވޭނެ ކަމަށް އެ މިނިސްޓްރީން ބުންޏެވެ.

މިއީ ކޮވިޑް-19ގެ ސަބަބުން އެޅި ފިޔަވަޅުތަކަށް ސަރުކާރުން މިއަދުން ފެށިގެން ލުއި ދީފައިވާތީ ގެނައި ބަދަލެކެވެ. މިއާއެކު ކާފިއު ނޫން ވަގުތުތަކުގައި ފާހެއް ނެތަސް ޑެލިވަރީގެ ހިދުމަތް ދެވޭނެ އެވެ. ނަމަވެސް ކާފިއު ވަގުތު އެ ހިދުމަތް ދެވޭނީ ފާސް އޮންނަ ފަރާތްތަކަށެވެ.

ވިޔަފާރިތަކަށް ޑެލިވަރީގެ ހިދުމަތް ދިނުމަށާއި ޒަރޫރީ ބޭނުންތަކަށް ހާއްސަ ފާހެއް ދޫކުރާނެ އެވެ. މި ފާސް ނެތް ވިޔަފާރިތަކުން ކާފިއު ވަގުތު ކޮންމެހެން ބޭރަށް ނުކުންނަން ޖެހިއްޖެ ހާލަތެއްގައި ޕޮލިސް ޕޯޓަލް މެދުވެރިކޮށް "މިސެލޭނިއަސް" ފާސް ނެގޭނެ ކަމަށް އިކޮނޮމިކް މިނިސްޓްރީން ބުންޏެވެ.

ކުރިން ވިޔަފާރިތަކަށް އިކޮނޮމިކް މިނިސްޓްރީން ފާސް ދޫކުރި ނަމަވެސް މިއަދުން ފެށިގެން ވިޔަފާރިތަކަށް ފާސް ދޫކުރާނީ ފުލުހުންނެވެ.