މިނިވަންކަން ގެއްލުނު ކޮންމެ ފަހަރަކު އެކަމަށް މަގުފަހިކޮށްދިނީ އެއްބައިވަންތަކަން ގެއްލުން: ރައީސް

ރާއްޖޭގެ މިނިވަންކަން ގެއްލުނު ކޮންމެ ފަހަރަކު އެކަމަށް މަގުފަހިކޮށްދިނީ އެއްބައިވަންތަކަން ގެއްލި ބައިބައިވުން އުފެދުން ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

މިއަދު ފާހަގަކުރާ ރާއްޖޭގެ 56 ވަނަ މިނިވަން ދުވަހާ ގުޅިގެން ދެއްވި ހިތާބުގައި އެ މަނިކުފާނު ވިދާޅުވީ، ރާއްޖޭގެ މިނިވަންކަމުގެ ޖިހާދުގައި ގައުމީ ބަތަލުން ހޯއްދެވި ކާމިޔާބީގެ އަސްލަކީ ރައްޔިތުން އެ މިނިވަންކަން ދިފާއުކުރަން ބޭނުންވި ވަރާއި މިނިވަންކަމަށް ލޮޅުމެއް އަރައިފާނެ ކޮންމެ ކަމަކަށް އަމަލާއި ބަހުން ނޫނެކޭ ބުނުން ކަމަށެވެ.

"ރާއްޖޭގެ މިނިވަންކަން ގެއްލި އަޅުވެތިކަމުގެ މަޅީގައި ޖެހުނު ކޮންމެ ފަހަރަކު އެ ކަމަށް މަގުފަހިކޮށްދީފައި ވަނީ އަޅުގަނޑުމެންގެ ތެރެއިން އެއްބައިވަންތަކަން ގެއްލި ބައިބައިވުން އުފެދުން،" ރައީސް ވިދާޅުވި އެވެ.

ދިވެހިންގެ ގައުމީ އަދި އިޖުތިމާއީ އެއްބައިވަންތަކަމުގެ ތަރަހައަކީ އިސްލާމް ދީނުގެ ސައްހަ އަގީދާގައި ސާބިތުވެ ތިބުން ކަމަށާއި ދީނީ އެއްބައިވަންތަކަން އިތުރަށް ހަރުދަނާ ކޮށްދެނީ، ދިވެހިންގެ މެދުގައި މަޒުހަބީ ތަފާތުތަކެއް ނެތުމުން ކަމަށް އެ މަނިކުފާނު ވިދާޅުވި އެވެ.

ރައީސްގެ މިނިވަން ދުވަހުގެ ހިތާބުގައި ވަނީ ހަރުކަށި ފިކުރާއި އިސްލާމް ދީނަށް ފުރައްސާރަ ކުރުމުގެ ނުރައްކަލާ ބެހޭގޮތުން ވެސް ވާހަކަފުޅު ދައްކަވައިފަ އެވެ.

އިސްލާމް ދީނަކީ ހައްގަކާ ނުލައި މީހުންގެ ލޭ ހުއްދަކުރާ ދީނެއް ކަމުގައި ދެކިގެން، އެ ވިސްނުން ފަތުރައި އާންމުކުރުމަށް ދިވެހިންގެ ތެރެއިން މަދު ބަޔަކު ފާޅުގައި މަސައްކަތް ކުރާ ކަމަށް ރައީސް ވިދާޅުވި އެވެ. އެއީ ރާއްޖެ މިިނިވަންކަން މަތީގައި ބާއްވަން އެދޭ ކޮންމެ މީހަކު ފާޅުގައި އެކަމަކާ ދެކޮޅަށް ތެދުވަން ޖެހޭ ކަމެއް ކަމަށް އެ މަނިކުފާނު ވިދާޅުވި އެވެ.

ހަރުކަށި ފިކުރުގެ އިތުރުން ދީނަށް ފުރައްސާރަ ކުރުމަކީ ވެސް މުޖުތަމައު ބައިބައި ކުރާ ކަމެއް ކަމަށް ރައީސްގެ ހިތާބުގައި ވިދާޅުވި އެވެ.

ރާއްޖޭގެ މިނިވަންކަން ގެއްލި އަޅުވެތިކަމުގެ މަޅީގައި ޖެހުނު ކޮންމެ ފަހަރަކު އެ ކަމަށް މަގުފަހިކޮށްދީފައި ވަނީ އަޅުގަނޑުމެންގެ ތެރެއިން އެއްބައިވަންތަކަން ގެއްލި ބައިބައިވުން އުފެދުން،" ---ރައީސް

"އެހެންކަމުން، މީހުންގެ މެދުގައި އަނެކުންނާ ދޭތެރޭ ނަފްރަތު އުފެއްދުމަށް ހިންގާ އަމަލުތަކާއި އިސްލާމް ދީނަށް އިހާނެތިކުރުމުގެ އަމަލުތައް ހުއްޓުވުމަކީ ގައުމުގެ މިނިވަންކަމާއި ހަމަޖެހުން ދެމެހެއްޓުމަށްޓަކައި ކޮންމެ ފަރުދަކު ވެސް އިސްކަން ދޭންޖެހޭނެ ކަމެއް. މިއީ އެއްވެސް ހާލެއްގައި އަޅުގަނޑުމެންގެ މެދުގައި އޮވެގެން ނުވާނެ އިޖުތިމާއީ ވަރަށް ބޮޑު ދެ މައްސަލަ،" ރައީސް ވިދާޅުވި އެވެ.

އެ ދެ މައްސަލަ އަށް އޮތް ހަމައެކަނި ހައްލަކީ ގާނޫނީ ފިޔަވަޅު އެޅުން ނޫން ކަމަށާއި އިސްލާމް ދީނުގެ ސައްހަ އަގީދާގެ ދަށުން ދަރިން ތަރުބިއްޔަތު ކުރުމަކީ ވެސް މުހިންމު ކަމެއް ކަމަށް ވިދާޅުވި އެވެ. އެހެންކަމުން، ރައީސް އިބްރާހިމް މުހައްމަދު ސޯލިހު ވިދާޅުވިގޮތުގައި، ތައުލީމީ ނިޒާމުގެ ތެރެއިން މައްސަލަ ހައްލު ކުރަން ސަރުކާރުން އަންނަނީ މަސައްކަތްތަކެއް ކުރަމުންނެވެ.

ދީނީ ކަންކަމާ ގުޅުވައި ބައިބައިވުން އުފައްދާ ވާހަކަ މިއަދު ރައީސް ދެއްކެވި އިރު، ރައްރައްޔިތުންގެ މަޖިލީހުގައި މިހާރު އޮތް ނަފްރަތުގެ ބިލާ ގުޅިގެން އާންމުންގެ މެދުގައި ވަނީ ވަރަށް ބޮޑަށް ހިޔާލުތަފާތުން އުފެދިފަ އެވެ. އެ ބިލަކީ އާންމު ތަނެއްގައި ވަކި މީހަކީ ކާފަރެއް ކަމަށް ނުތަތަ ދީނާ ދެކޮޅު މީހެއް ކަމަށް ބުނުމަކީ ކުށަކަށް ހަދަން ހުށަހެޅި އިސްލާހެކެވެ. ނަމަވެސް، އެ ބިލަކީ ދީނާ ދެކޮޅު އިސްލާހެއް ކަމަށް ބުނެ ސަރުކާރަށް ވަރަށް ބޮޑަށް ފާޑުކިޔުން އަމާޒުވި އެވެ.

އެ ބިލާ މެދު ކުރީގެ ރައީސް އަދި އެމްޑީޕީގެ ރައީސް ނަޝީދުގެ ފެކްޝަނާއި ރައީސް އިބްރާހިމް މުހައްމަދު ސޯލިހުގެ ފެކްޝަނާ ދެމެދު ދެބަސްވުންތައް އުފެދިފައިވާއިރު، ބިލު މިހާރު ވަނީ އަނބުރާ ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ފޮނުވައިފަ އެވެ.