ފިލިޕީންސްގެ ރިޔާސީ ކެންޑިޑޭޓަކަށް ރައީސްގެ ދަރިކަނބަލުން

ފިލިޕީންސްގެ ކުރިއަށް އޮތް ރިޔާސީ އިންތިހާބުގައި މިހާރުގެ ރައީސް ރޮޑްރިގޭ ޑުޓާޓޭ ވާދަ ނުކުރައްވައި، އޭނާގެ ބަދަލުގައި ވެރިކަމަށް ވާދަ ކުރައްވާނީ ދަރިކަނބަލުން ސާރާ ޑުޓާޓޭ ކަމަށް، އެ ގައުމުގެ ރަސްމީ ނޫސް އޭޖެންސީން ބުނެފި އެވެ.

ރައީސް ރޮޑްރިގޭ ޑުޓާޓޭ، 76، މިދިޔަ މަހު ވިދާޅުވެފައި ވަނީ، 2022 ގައި އޮންނަ ރިޔާސީ އިންތިހާބުގައި، ނާއިބު ރައީސްގެ މަގާމަށް ވާދަކުރައްވާނެ ކަމަށެވެ. ސަބަބަކީ ފިލިޕީންސްގެ ގާނޫނުއަސާސީ ބުނާ ގޮތުން، އެކަކަށް ވެރިކަމުގައި ހުންނެވޭނީ ހަ އަހަރުގެ އެންމެ ދައުރެއްގަ އެވެ. އެހެންކަމުން ރައީސްކަމުގެ ދެ ވަނަ ދައުރަކަށް ވާދަކުރެއްވުމުގެ ފުރުސަތެއް ނޯވެ އެވެ.

ނަމަވެސް އޭނާ މިހާރު ވިދާޅުވަނީ، އޭނާ އެ މަގާމަށް މިހާރު ކުފޫހަނުވާ ކަމަށް އާންމު ރައްޔިތުން ގަބޫލުކުރަން ފަށައިފި ކަމަށެވެ. އެހެންކަމުން، މިހާރު ގަސްދު ކުރައްވަނީ ސިޔާސީ ކަންކަމުން ދުރަށް ޖެހިވަޑައިގެން، ޒުވާން ޖީލަށް ފުރުސަތު ދެއްވަން ކަމަށް ވެސް، ރައީސް ރޮޑްރިގޭ ޑުޓާޓޭއާ ހަވާލާދީ ރަސްމީ ނޫސް އޭޖެންސީން ބުންޏެވެ.

އޭބީސީ-ސީބީއެން އަށް ދެއްވި އިންޓަވިއުއެއްގައި ރައީސް ރޮޑްރިގޭ ޑުޓާޓޭ ވިދާޅުވި ގޮތުގައި، އޭނާގެ ދަރިކަނބަލުން ރައީސް ކަމަށް ވާދަކުރައްވާ އިރު، ދަރިކަނބަލުންގެ ނާއިބެއްގެ ގޮތުގައި ވާދަކުރައްވާނީ، ބައްޕާފުޅުގެ އެންމެ އިސް މުޝީރު ކްރިސްޓޮފާ ބޮންޖް އެވެ.

ސިޔާސީ މުހައްލިލުން ވިދާޅުވާ ގޮތުގައި ސިޔާސީ ދާއިރާ އިން ދުރަށް ވަޑައިގަންނަވަން ނިންމެވި ކަމުގައި ވިޔަސް، އިންތިހާބުގެ ވަގުތު ޖެހޭއިރު، ހުރިހާ ކަމެއް ބަދަލުވުމަކީ އެކަށީގެންވާ ކަމެކެވެ. ސަބަބަކީ 2016 ވަނަ އަހަރުގެ ރިޔާސީ އިންތިހާބުގައި ވެސް ވާދަ ނުކުރައްވާނެ ކަމަށް ވިދާޅުވެފައި، އެންމެ ފަހު ވަގުތު އިންތިހާބަށް ކުރިމަތިލައްވައި ބޮޑު ތަފާތަކުން އިންތިހާބު ކާމިޔާބު ކުރެއްވުމެވެ.

އާންމުންގެ ހިޔާލު ހޯދުންތަކަށް ބަލާއިރު، 2016 ވަނަ އަހަރު އިންތިހާބު ކާމިޔާބު ކުރެއްވި އިރު، ރައްޔިތުންގެ މެދުގައި އޭނާގެ މަގުބޫލުކަން އޮތް މިންވަރަށް މިހާރު ވެސް މަގުބޫލުކަން އެބަ އޮތެވެ. އެހެންކަމުން، ދަރިކަނބަލުންނާ އެކުގައި ނާއިބު ރައީސްގެ މަގާމަށް ވާދަކުރައްވައިފި ނަމަ، ރައްޔިތުންގެ ބޮޑު ތާއީދަކުން ދެބަފައިން، ފިލިޕީންގެ ރައީސާއި ނައިބު ރައީސްގެ މަގާމަށް އިންތިހާބުވުމުގެ ފުރުސަތު ވަރަށް ބޮޑެވެ.

ސާރާއަކީ މިހާރު ވެސް އެ ގައުމުގެ އެންމެ ބައިބޯ އެއް ސަހަރު ކަމަށްވާ ޑަވާއޯ ސިޓީގެ މޭޔަރެވެ. ރައީސްގެ ދަރިކަނބަލުންނަށް ވުމުގެ އިތުރުން، ސާރާއަކީ ގިނަ ބައެއްގެ މެދުގައި މަގުބޫލުކަން ހޯއްދަވާފައިވާ ބޭފުޅެކެވެ.

ފިލިޕީންސްގެ އިންތިހާބީ މޫސުން މިދިޔަ ހުކުރު ދުވަހު ފެށިއްޖެ އެވެ. ގައުމުގެ އެންމެ މަތީ ވެރިޔާގެ މަގާމުން ފެށިގެން، އެކި ސަހަރުތަކުގެ ކައުންސިލްތަކުގެ މެމްބަރުކަމުގެ މަގާމުތަކާ އެކު، 18 ހާހަށް ވުރެ ގިނަ މަގާމަށް، މި އިންތިހާބުގައި ވާދަކުރުން އޮންނާނެ އެވެ.

އިންތިހާބުގައި ވާދަކުރުމަށް ރަޖިސްޓްރީ ކުރުމުގެ އެންމެ ފަހު ތާރީޚަކީ މި މަހުގެ 8 ވަނަ ދުވަހެވެ. ނަމަވެސް، ވާދަކުރެއްވުމުގެ ފަހު ފުރުސަތެއްގެ ގޮތުގައި، މި އަންނަ އަހަރުގެ ފެބްރުއަރީ މަހުގެ 18 ވަނަ ދުވަހުގެ ކުރިން ރަޖިސްޓްރީ ކުރެވިދާނެ އެވެ. އެ ގައުމުގެ އިންތިހާބުތަކާ ބެހޭ ގާނޫނުގައި އެ ގޮތަށް ފުރުސަތު ދީފައި އޮތުމުން، މިހާރުގެ ރައީސް ރޮޑްރިގޭ ޑުޓާޓޭ ވެސް އިންތިހާބުގައި ވާދަކުރެއްވީ، ރަސްމީ މުއްދަތު ހަމަވުމަށް ފަހުގައި އޮންނަ އެންމެ ފަހު ފުރުސަތުގެ ތެރޭގަ އެވެ.