މަންމަ ދިން 50 ޑޮލަރާ އެކު ދިލް "ޖާޒިއާ" ގައި އުދުހެނީ

ރާއްޖޭގެ ކުޅިވަރުގެ އެއްވަނަ ބްރޭންޑަކަށް "ޖާޒިއާ" ވުމުގެ ހުރިހާ ޝުކުރެއް އޭނާ އަދާކުރަން އޮތީ ލޯބިވާ މަންމައަށެވެ. މަންމަ ދިން 50 ޑޮލަރަކީ އެ ވިޔަފާރީގެ ފެށުމެވެ. ކުންފުނީގެ ފުރަަތަމަ ކެޕިޓަލަކަށް ޖާޒިއާގެ ކޯ ފައުންޑަރު ހަސަން ދިލްޝާން (ދިލް) ގެ މަންމަ ދިން އެ 50 ޑޮލަރުގެ މަތީގައި އެ ވިޔަފާރި އެންމެ އުހަށް ދަތުރު ކޮށްފައި ވުމަކީ އޭނާ އަށް މިއަދު ލިބޭ އެންމެ ބޮޑު ފަހުރެވެ.

"މަންމަ އަތުގައި ޑޮލަރުކޮޅެއް ހުރީމަ ނެގީ 50 ޑޮލަރު،" ދިލް ބުންޏެވެ.

ޖާޒީގެ ޑިޒައިންތައް ޕްރެޒެންޓް ކޮށްދޭން މޮކްއަޕް ސެޓަށް ހަރަދު ކުރީ 48 ޑޮލަރެވެ. މިއަދު އެއީ ރާއްޖޭގައި ކުޅިވަރުގައި އެންމެ މަޝްހޫރު ވިޔަފާރީގެ ބްރޭންޑެވެ. ކުންފުނީގެ ބްރޭންޑު ވެލިއު އުޅެނީ މިލިއަނުން މަތީގަ އެވެ. ޖާޒިއާއޭ ބުނެފި ނަމަ ނޭނގޭ ބަޔަކު ނެތެވެ. ޖާޒީއެއް ތައްޔާރު ކުރަން ވެއްޖެ ނަމަ ހުރިހާ ކްލަބުތަކުންނާއި ޒުވާނުންގެ ދުލުކުރީގައި އޮތީ ޖާޒިއާ އެވެ.

ދިލްގެ ވިޔަފާރީގެ ހުރިހާ ވެސް ކާމިޔާބީއަކީ އޭނާގެ މަންމަކަން ދުވަހަކު ވެސް ހަނދާން ނައްތާލަން ބޭނުން ނުވާ އެއް ކަމަކީ މަންމަ އަށް އޮތް ލޯތްބާއި އިހްތިރާމު ދައްކުވައިދޭ މަދަހަ "ރޮއްވައިފި ލޯތައް" ވީޑިއޯގެ ލީޑް އެކްޓަރެއްގެ ގޮތުގައި ހަރަކާތްތެރި ވުމެވެ. އެ މަދަހައިގެ ވީޑިއޯގައި ވެސް ފެނުނީ މަންމައަށްޓަކައި ދިލްގެ ހިތުން ޖާގަ ދީފައިވާ މިންވަރެވެ. އޯގާތެރިކަމާއި ލޯތްބެވެ. މަންމަ ގެއްލިއްޖެ ނަމަ ދިލްގެ ހިތަށް ކުރާނެ އަސަރުތަކެވެ.

ދިލްގެ މަންމަގެ އެހީތެރިކަމާ އެކު އުފެއްދި ޖާޒިއާއަކީ ރާއްޖޭގެ ކުޅިވަރުގެ ކިޓް ޕްރޮވައިޑާއެއްގެ ގޮތުގައި ބޮޑު ނަމަކަށް މިއަދު ވެއްޖެ އެވެ.

ޖާޒިއާ 2019 ގައި އުފައްދުމުގެ ކުރިން ވެސް ރާއްޖޭގައި ޖާޒީ ފަރުމާކޮށް އުފައްދާ ކުންފުނިތައް ހަރަކާތްތެރިވި އެވެ.

"އޭރު ވެސް ތިބި މި މަސައްކަތް ކުރާ މީހުން. ސޯޝަލް މީޑީއާ އިން ފެނޭ ވިއްޔާ. އެކަމަކު ފެންނާނީ ކޮންމެވެސް ތަނެއްގައި ޖާޒީ ބާއްވައިގެން ފޮޓޯ ނަގާފައި ދެން [ސޯޝަލް މީޑިއާގައި] ޕޯސްޓް ކޮށްފައި ހުންނަ ތަން،" އުމުރުން 40 އަހަރުގެ ދިލް ބުންޏެވެ.

ދިލްގެ އިތުރުން އާދަމް އަމީނާއި ޝާހިދު އަހުމަދުގެ ޕާޓްނާޝިޕްގެ ދަށުން ޖާޒިއާ ރަޖިސްޓަރީ ކުރީ، ޖާޒީގެ ފަރުމާ އާއި ޕްރެޒެންޓް ކޮށްދޭ ގޮތާއި މާކެޓިންގައި ވެސް ތަފާތެއް ގެނެސްދިނުމަށެވެ.

މޮކްއަޕް ސެޓްގައި ޖާޒީގެ ޑިޒައިންތަކުގެ ޕްރެޒެންޓިން ހުށަހަޅައިދީ، ޖާޒިއާ ވައިގައި ހިފައިގެން ދިއުމުން، އެހެން ކުންފުނިތަކުން ވެސް އެ ސްޓައިލްގެ ޕްރެޒެންޓިން އާއި މާކެޓިން ސްޓްރެޓެޖީތަށް ވެސް ބޭނުންކުރަން ފެށި އެވެ. އަދި ޖާޒިއާގެ ނަމާ ވައްތަރު ނަންތައް ކިޔާ އެހެން ކުންފުނިތަށް ވެސް ސްޕޯޓްސް ކިޓް އުފެއްދުމުގެ އިންޑަސްޓްރީ އަށް ނުކުތެވެ.

"އެކަމަކު ޖާޒިއާ ވީ އެ އެންމެންނަށް ވެސް ބެންޗުމާކަކަށް،" ހިތްހަމަޖެހުމާ އެކު ދިލް ބުންޏެވެ.

"ޖާޒިއާ" ކިޔަން ޖެހުނީ ކީއްވެ؟

ޖާޒިއާގެ އެއް ހިއްސާދާރު އަމީން، އޮންލައިންކޮށް އެއްޗެހި ވިއްކަން ކުރިން ހިންގި ޕޭޖަށް ކިޔަނީ "ކާޑިވާ" އެވެ. އެ ނަމާ ގުޅުވައިގެން އާ ކުންފުނީގެ ނަން ކިޔުމުގެ ވިސްނުން ތިން ހިއްސާދާރުން ވެސް ގެންގުޅުނެވެ.

"ޖާޒީގެ ވާހަކަ ކޮންމެ ގޮތެއް ވިޔަސް އަންނާނެ. ބޭނުންވީ އެ ނަން ބުނީމާ މިއީ ކޮން މަސައްކަތެއް ކުރާ ބައެއްކަން އެނގެން،" ދިލް ބުންޏެވެ.

ކާޑިވާ އާއި ޖާޒީގެ ނަން ގުޅުވައި ޖާޒި-ވާގެ ނަން ކިޔުމުގެ މަޝްވަރާގައި ތިއްބައި އެ ތިން މީހުންގެ ވެސް ރައްޓެސަކު ދިނީ އޭނާގެ ނަމާ ގުޅުވައި "ޖާ-ޒިއާ" ކިޔުމަށެވެ.

"ޒިއާ ކިޔާ އަންހެން ރައްޓެއްސެއް. އޭނަ ބުނެފި ދެން ޖާޒިއާ ކިޔަންވީ ނޫންހޭ. އޭނާގެ ނަމާ ގުޅުވާފައި އޭނާ އެހެން ބުނެލީ،" ދިލްމެންގެ ޖާޒީ ކުންފުންޏަށް ޖާޒިއާގެ ނަން ދިން ގޮތް ދިލް ކިޔައި ދިނެވެ.

އެ ހިސާބުން "ޖާޒިއާ" އެއީ އެންމެ ކަމުދާ ނަމަކަށް ތިން ހިއްސާދާރުންނަށް ވެސް ވި އެވެ.

ދިލް ބުނި ގޮތުގައި އޭނާއަކީ އަބަދުވެސް ކޮންމެ މަސައްކަތެއް ވެސް އެންމެ ފުރިހަމަކޮށް ކުރެވޭތޯ ބަލާ މީހެކެވެ. އެ އާދަ އޭނާގެ ގައިގައި ހަރުލީ ބޮޑުބޭބެ ޓީވީއެމްގެ މަޝްހޫރު މުއާވިޔަތު އަލީގެ ކިބައިންނެވެ. މުއާވިޔަތަކީ އޭރު ޓީވީއެމްގެ ޝޯތަކުގެ ސްޓޫޑިއާ އާއި ސްޓޭޖާއި ގައުމީ އެކި މުނާސަބަތުތަކަށް ތައްޔާރުކުރާ ލޯގޯތަކުގެ ޑިޒައިނިންގައި ވެސް މަޝްހޫރު ނަމެކެވެ.

"އަންކަލްއަކީ ވަރަށް ފުރިހަމަކޮށް ކަންކަން ކުރާ މީހެއް. ޑިޒައިނިންގައި ވެސް އެކަން ފެންނާނެ. އަހަންނަށް ވެސް ޑިޒައިނިންގެ ތެރެއަށް ވަނުމަށް ހިތްވަރުދީ ވަރަށް ބޮޑު މޯޓިވޭޝަނެއް ދިން މީހެއް އަންކަލްއަކީ،" ގޭތެރެއިން ޑިޒައިނިންގެ ތެރެއަށް ވަން ދިލް ބުންޏެވެ.

ދިލްއަކީ އާކިޓެކްޗަރެއް ވެސް މެ އެވެ. ހައުސިން މިނިސްޓްރީގައި މަސައްކަތް ކުރި ދުވަސްވަރު އެ ހުނަރު އޭނާގެ ލީޑް އިންޖިނިއަރަށް ފާހަގަކުރެވިގެން ދިން ހިޔާލެއްގެ މައްޗަށް އާކިޓެކްޗަރަކަށް ވި އެވެ.

"[ލީޑް އިންޖިނިއަރު] ބުނީ ދިލް ވަރަށް މޮޅެއް ނޫންހޭ ޑިޒައިކޮށް ފުރިހަމައަށް އޭތި ހުށަހަޅައި ދޭން. ތިމަންނައަށް ފެނެޔޭ އާކިޓެކްޗާ ދާއިރާއިން ކިޔަވަން،" ދިލް ކިޔައި ދިނެވެ.

އިމާރާތް ކުރަހައި ޑިޒައިން ކުރުމުގެ ދާއިރާގައި ހައުސިން މިނިސްޓްރީ އާއި އެޗްޑީސީގައި ވެސް މަސައްކަތް ކުރި ދިލް އޭނާގެ ހުނަރުގެ ފިހީގެ ކުލަ ޖެއްސީ ދިވެހި ޖާޒީގަ އެވެ. އެކަމަކު އެ މަސައްކަތުގައި ފުރަތަމަ ދެ ޕްރޮޖެކްޓް އޭނާގެ އަތުގައި އަޅައެއް ނުގަތެވެ.

"ތަންކޮޅެއް ކުރިން އެފްއޭއެމުން އިއުލާން ކުރަނީ ޖާޒީ ޑިޒައިނަށް. އަންކަލް [މުއާވިޔަތު] އަހަރެން ކައިރީ ބުނީ ދިލް ވެސް އެ އަށް ލާންވީ ނޫންހޭ. އޭނާ ވެސް ޑިޒައިން ކުރި އަހަންނަށް ނުދައްކާ. އަހަރެން ވެސް ޑިޒައިން ކުރިން އޭނާ އަށް ނުދައްކާ،" ދިލް ބުންޏެވެ.

އެ ފަހަރު އެފްއޭއެމުން އިހުތިޔާރު ކުރީ ކާކުގެ ފަރުމާއެއްކަން ނޭނގުނަސް ދިލް އަށް ޔަގީންވީ އޭނާގެ ޑިޒައިން ނޮމިނޭޓް ވެސް ނުވާ ކަމެވެ. އެ ހިސާބުން ވެސް ފަހަތަކަށް ނުޖެހުނެވެ. އަނެއްކާ ވެސް އޭގެ އަހަރުތަކެއް ފަހުން ގައުމީ ޓީމުގެ ޖާޒީ ޑިޒައިން ކުރަން ހުޅުވައިލުމުން ދިލް ހުށަހެޅި އެވެ. އެ ފަހަރު ވެސް އޭނާ އަށް ކާމިޔާބެއް ނުވި އެވެ.

"އެ ފަހަރު ވިން ކުރި ޖާޒީގެ ޑިޒައިނާއި އަހަރެން ޑިޒައިން ކުރި ޖާޒީ އަށް ބަލައި އަހަރެންގެ ޕާޓްނާސް ވެސް ބުނި އަސްލު ދިލްގެ ޑިޒައިން މާ ރީއްޗޭ. އެކަމަކު އަހަންނަށް ވިން ނުކުރެވުނީ އެ ހުށަހަޅައި ދޭން ޖެހޭ ގޮތަށް ހުށަހަޅައި ނުދެވުނީމަ،" ދިލް ބުންޏެވެ.

ޖާޒިއާގެ ކުޑައިގެ ދަށުން ފަހުން ދިލް ގެނެސްދިނީ އެ ތަފާތެވެ. ހުށަހަޅައިދިނުން ހިތްގައިމު ކޮށްލި އެވެ. އޭނާގެ ހިތްގައިމު ޑިޒައިންތައް ހުށަހަޅައިދިން ގޮތުން ކްލަބްތަކާއި އެސޯސިއޭޝަންތަކާ އެންމެ ރަށްޓެހި ބްރޭންޑަކީ މިހާރު ޖާޒިއާ އެވެ.

ގައުމީ ފުޓްބޯޅަ ޓީމުގެ ކިޓް ޕްރޮވައިޑާއަކީ ވެސް މިހާރު ޖާޒިއާ އެވެ. ފީފާގެ ރައީސް ޖިއާނީ އިންފަންޓީނޯ އަށް އެފްއޭއެމްގެ ރައީސް އަހްމަދު ތޯރިގް (ޓޮމް) ދާދި ފަހުން ހަދިޔާ ކުރެއްވި ދިވެހި ގައުމީ ޖާޒީގެ މޭމަތީގައި ވަނީ ދިވެހި ބްރޭންޑް ޖާޒިއާގެ ލޯގޯ އެވެ. ފީފާގެ ދާރުލްއާސާރުގައި ބަހައްޓަން ހަވާލު ކުރި ދިވެހި ގައުމީ ޖާޒީގައި ވެސް ވަނީ ދިވެހި އެ ބްރޭންޑެވެ.

ޖާޒިއާގެ ކިޓްގައި "ސިޑިބަރި" ން މައްޗަށް!

ރާއްޖޭގެ ކުޅިވަރުގެ މީޑީއާ ކަވަރޭޖަކީ ހަމައެކަނި މެއިންސްޓްރީމް މީޑީއާގެ ވަސީލަތްތައް ކަމަށް ބެލި ދުވަސްވަރެއް ވެސް ފެނުނެވެ. އެކަމަކު، ޖާޒީއާގެ ކުޑައިގެ ދަށުން ދިލް ވެސް ހިއްސާވެ އެ ވިސްނުން ވެސް އެހެން ހަރުފަތަކަށް ގެންގޮސްދިނެވެ ދިވެހި ކުޅިވަރުގައި މިހާރު އެންމެ މަޝްހޫރު އެއް ނަން "ސިޑިބަރި" ވުޖޫދަށް ގެނައުމަކީ ވެސް ދިލްގެ މަސައްކަތެކެވެ.

"އަހަންނަކީ ވެސް ކިޔަން އެހާ ބޭނުންވާ މީހެއް ނޫން. އަހަންނަށް ހީވަނީ ވަރަށް ގިނަ އެހެން މީހުންނަށް ވެސް އެހެންވާނެހެން،" ކުޅިވަރު ކަވަރޭޖަށް ހާއްސަ ސޯޝަލް މީޑިއާ ޕޭޖް ސިޑިބަރީގެ އެއް ފައުންޑަރު ބުންޏެވެ.

އެހެންވެ، ކުރު ލިޔުންކޮޅަކުން ޖަހާލާ ޕޯސްޓަކާ އެކު، މުޅި ވާހަކަ ހުށަހަޅައިދިނުމުގެ ހިޔާލު ސިޑިބަރިން އުފަން ކުރުވި އެވެ.

"ސިޑިބަރީގެ އައިޑިއާއަކީ 'ބްލީޗާ ރިޕޯޓް'. އޭގައި ހުންނާނެ ކުޑަކުޑަ އެތިކޮޅެއް ލިޔެލާފައި ދެން ޑިޒައިން ކޮށްފައި ހުންނަ ފޮޓޯއިން ހުށަހަޅައި ދީފައި،" ދިލް ބުންޏެވެ.

ކުޅިވަރު ކަވަރޭޖްގައި ސޯޝަލް މީޑިއާގައި އެހާ ފުޅާކޮށް ރާއްޖޭގައި އެކަން ފެށީ "ސިޑިބަރި" ން ކަމަށް ދިލް ގަބޫލު ކުރެ އެވެ.

"ދިވެހިންނާ ވަރަށް ގުޅޭ ސްޓައިލަކަށް އެ ސްޓައިލްގެ ކަވަރޭޖު ވީ،" އޭނާ ބުންޏެވެ.

ސިޑިބަރީގެ ޑިޒައިންތަކުގައި އެންމެ ފުރަތަމަ އަމަލީ ގޮތުން ދިލް ވެސް ބައިވެރިވި އެވެ. ސިޑިބަރީގެ މަސައްކަތުން އޭނާ މިހާރު ދުރުގައި ހުއްޓަސް 10 ވަރަކަށް މުވައްޒަފުން "ސިޑިބަރި" ކުރިއަށް ގެންދިއުމުގައި މިހާރު އުޅެ އެވެ.

"ފުރަތަމަ ފެށި އިރު އަމިއްލަ އަށް އިންފޮމޭޝަންތައް ހޯދައިގެން ފެށި. ފަހުން ކުޅުންތެރިން އަމިއްލަ އަށް ވެސް އެއްޗެހި ފޮނުވަން ފަށައިފި. ސިޑިބަރިން އެ ހުށަހަޅައިދޭ ގޮތަށް އެ ޕްރެޒެންޓް ކޮށްދޭން އެ ކުޅުންތެރިންނަށް ނޭނގިދާނެ. އެހެންވެ އެ ކުޅުންތެރިންނަށް ވެސް ފެނުނީ ސިޑިބަރިއޭ އެ ދައުރު ތިމަންނަމެންނަށް އަދާކޮށް ދޭނީ،" ދިލް ބުންޏެވެ.

ޖާޒިއާގެ "ފަންބޯޅަ" ރާއްޖޭގެ އަމިއްލަ ފުރަތަމަ ބޯޅަ!

ޖާޒިއާގެ ނަމުގައި ހެދި ފޭސްބުކް ޕޭޖަކާއި ވެބްސައިޓުން ފެށި މަސައްކަތުގައި އެ ކުންފުނިން ފުރަތަމަ ހުޅުވީ ބޭރުގެ ފްކެޓަރީތަކަށް ޖާޒީތަކުގެ ޑިޒައިން ފޮނުވައިގެން ތައްޔާރުކުރާ ޖާޒީ ވިއްކަން ހުޅުވި ކުޑަކުޑަ ފިހާރައެކެވެ.

ޖާޒިއާގެ ފުރަތަމަ އައުޓްލެޓަކީ މާރުކޭޓްގެ ގޮޅިއަކަށް ވުރެ ވެސް ކުޑަކުޑަ ފިހާރައެއް ކަމަށް ދިލް ބުންޏެވެ. ފަހުން ޖާޒިއާގެ މަގުބޫލުކަން ބޮޑުވެ ކުންފުނި ވެސް ފުޅާވެ، ފިހާރަތަކުގެ ސައިޒު ވެސް ބޮޑުވި އެވެ. މިހާރު ޖާޒިއާގެ އަމިއްލަ ފެކްޓަރީއެއް ވެސް މާލޭގައި އެބަހުއްޓެވެ.

ކުޅިވަރު ސާމާނު އުފެއްދުމުގެ މަސައްކަތުގައި ޖާޒިއާ އިން އިތުރު ގިޔަރެއް މައްޗަށް ޖައްސާލީ ފުޓްސަލް އަށް ހާއްސަކޮށް ހެދި ރާއްޖޭގެ ފުރަތަމަ ބޯޅައިންނެވެ. ފީފާގެ މިންގަނޑަށް ފެތޭ ބޯޅައިގެ މަސައްކަތުގައި އޭދަފުށީގެ މުންކޮ އާއި އަސްހަދު (އަސްޖޭ) ގެ އެހީތެރިކަން ދިލް ފާހަގަ ކުރި އެވެ.

މި އަހަރު ބޭއްވި އޮފީސް ލީގުގައި ބޭނުންކުރީ ޖާޒިއާއިން ދިވެހި ރުކުގެ ފަންވަތުގެ ފަރުމަ ދައްކުވައި ދޭ "ފަންބޯޅަ" އެވެ.

"ބޯޅައިގެ މަސައްކަތުގައި އެންމެ ފުރަތަމަ ބެލީ ފީފާގެ މިންގަނޑަށް ފެތޭ ގޮތަށް ބޯޅަ ތައްޔާރުކުރަން. މާނައަކީ ފީފާގެ ސްޓޭންޑަޑް ލޭބަލް ޖެހުމުގެ އެތޯރިޓީ ލިބިގެން އެކަން ކުރަން. ޗައިނާގެ ކުންފުންޏަކާ އެކު ވާހަކަ ދެއްކީމަ އެ މީހުން ބުނި ފީފާގެ ލޭބަލް ތިމަންނަމެންކަށް ނުޖެހޭނެއޭ،" ފަންބޯޅައިގެ މަސައްކަތް ކުރިއަށް ދިޔަ ގޮތް ކިޔައި ދެމުން ދިލް ބުންޏެވެ.

"ދެން އަޅުގަނޑުމެން ފީފާ އަށް މެއިލްއެއް ކުރީ ފީފާގެ ސްޓޭންޑަޑަށް ބޯޅަ އުފެއްދުމުގެ ލައިސަންސް ދީފައި އޮންނަނީ ކޮން ފެކްޓަރީތަކަކަށްތޯ ބަލަން. އެ ފަހަރު 25 ފެކްޓަރީއެއްގެ ލިސްޓް ފީފާއިން ފޮނުވި،"

ފީފާގެ އެ ލިސްޓްގައި ދުނިޔޭގެ އެންމެ ގިނައިން ބޯޅަ އުފައްދާ ފެކްޓަރީތައް ހުންނަ ޕާކިސްތާނުގެ އެންމެ ބޮޑު ފެކްޓަރީ ވެސް ހިމެނުނެވެ.

"ޕާކިސްތާނުގެ ފެކްޓަރީ އަށް އަޅުގަނޑުމެން ފޮނުވީ. އެ ފެކްޓަރީއަކީ ފީފާގެ މުބާރާތްތަކަށް ވެސް ބޯޅަ އުފައްދާ ކުންފުންޏެއް. ފީފާ އެޕްރޫވް ލޭބަލް ޖެހުމުގެ ލައިސަންސް ވެސް އޮންނަ ފެކްޓަރީއެއް. ބޯޅައިގެ ޑިޒައިނާއި ފީޗާތައް އެ ފެކްޓަރީ އަށް ފޮނުވާފައި އަޅުގަނޑުމެން އެދުނީ ފީފާގެ މިންގަނޑަށް ބޯޅަ ތައްޔާރުކޮށް، ފީފާގެ އެޕްރޫވް ލޭބަލް ވެސް ޖަހައިދޭން. އެ ކުންފުނިން އަޅުގަނޑުމެންގެ ބޯޅަ ވެސް ތައްޔާރުކޮށް ދިނީ،" ދިލް ބުންޏެވެ.

އޭނާ ބުނި ގޮތުގައި ޖާޒިއާގެ މަސައްކަތް އޭނާ އާއި އަނެއް ދެ ހިއްސާދާރުން ފެށި ޕްލޭނަކާ އެކު އެވެ. އެ ކުންފުނީގެ ފުރަތަމަ ސްޓްރެޓެޖިކް ޕްލޭނުގެ 20 އަހަރުގެ ތެރޭގައި ހާސިލުކުރަން ބޭނުންވާ ކަންތައްތަކުގެ ތެރެއިން ފުރަތަމަ ފަސް އަހަރުގެ ޓާގެޓް ހާސިލުވެއްޖެ ކަމަށް ދިލް ބުންޏެވެ.

"ވިހ އަހަރުގެ ޕްލޭނެއް މި އޮތީ. ފުރަތަމަ ފަސް އަހަރުގައި ބޭނުންވީ [ސްޕޯޓްސް ވެއާގައި] ރާއްޖޭގެ އެއްވަނަ ބްރޭންޑަށް ވާން. އަލްހަމްދުލިﷲ އެކަން ހާސިލުވެއްޖެ،" ދިލް ބުންޏެވެ.

ދެން އޮތީ ބާކީ މި އޮތް 15 އަހަރަކީ ދުނިޔޭގެ ފެންވަރަށް ޖާޒިއާ ދަތުރުކުރާނެ ދުވަސްތަކެވެ. ކުޅިވަރުގެ އިންޑަސްޓްރީގައި ދުނިޔޭގެ މަޝްހޫރު ބްރޭންޑުތަކާ އެއް ސަފެއްގައި "ޖާޒިއާ" ފެންނަންދެން ދިލްގެ މަސައްކަތަށް މަޑުޖެހުމެއް ނެތް ކަމަށް އޭނާ ބުންޏެވެ.

ދިލް މަސައްކަތުގައި އޭނާގެ ކާމިޔާބުގެ ފަހަތުގައި ތިބީ އާއިލީ ވަރުގަދަ ޓީމެކެވެ. އާޓުގެ ދާއިރާގައި ގިނަ ނަންތަކެއް ހިމޭނާ އާއިލާ އެކެވެ. މަންމަ ޖަމީލާ އާއި ބައްޕަ އިބްރާހިމް އާގިލް އަދި ހާއްސަ ގޮތެއްގައި އޭނާގެ އަންހެނުން އާއިޝަތު ސަމާ އާއި ދަރިފުޅު ސަރާގެ ނަން ފާހަގަ ކުރި އެވެ. އޭނާ އަށް އެހީތެރިވެދޭ އައިއޭސީގެ އަހްމަދު އިގްބާލަކީ ދިލްގެ މަސައްކަތުގައި ސްޓްރެޓެޖިކް އެހީތެރިޔާ އެވެ.

"ޖާޒިއާ" ނަމަކަށްވީ އެ އެންމެންގެ ހެޔޮ ދުއާ އާއި ފީޑްބެކްގެ ސަބަބުން ކަމަށް ދިލް ގަބޫލު ކުރެ އެވެ. އެއާ އެކު، ދިލްގެ މަންމަގެ ކުޑަ ނަމަވެސް އެހީތެރިކަން އެއީ ދިލްގެ ހަނދާނުން ދުވަހަކު ވެސް ކައްސާލާނެ ކަމެއް ނޫނެވެ. ޖާޒިއާގެ ނަން ދުނިޔޭގެ ބްރޭންޑަކަށް ވާ ދުވަހު އަދި އެ އުފާ މާ ބޮޑުވާނެ އެވެ. ކުރިއަށް އޮތީ އެ ދުވަސްތަކެވެ.