އަނިޔާގެ ސަބަބުން ޕޮގްބާއަށް ގައުމީ ޓީމުގެ ޖާގަ ގެއްލިއްޖެ

ޕެރިސް (ނޮވެމްބަރު 9) - ފްރާންސް ގައުމީ ޓީމާ އެކު ކުރި ފަރިތަކުރުންތަކުގައި، އިނގިރޭސި ކްލަބް މެންޗެސްޓާ ޔުނައިޓެޑަށް ކުޅެމުން އަންނަ ޕައުލް ޕޮގްބާއަށް އަނިޔާވެ، ވޯލްޑް ކަޕް ކޮލިފައިންގައި ކުރިޔަށް އޮތް ދެ މެޗުގައި ނުކުޅެވޭނެ ކަމަށް އެ ގައުމުގެ ފުޓުބޯޅަ ފެޑެރޭޝަނުން ބުނެފި އެވެ.

ފަރިތަކުރުންތަކުގައި ޕޮގްބާއަށް އަނިޔާވެފައިވާ އިރު، އޭނާއާ އެކު މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ ޑިފެންޑަރު ރަފޭލް ވަރާން ވެސް ހުރީ އަނިޔާގަ އެވެ.

ޝޫޓިން ޕްރެކްޓިސްގައި ޕޮގްބާގެ ކަނާތު ފައިގެ ފަލަމަސްގަނޑަށް އަނިޔާވުމާ އެކު، އޭނާ ދަނޑުން ފައިބަން ޖެހުނީ ފްރާންސް ޓީމުގެ ޑޮކްޓަރުގެ އެހީއާ އެކު އެވެ.

ރަޝިއާގައި 2018 ވަނަ އަހަރު އޮތް ފީފާ ވޯލްޑް ކަޕް ފްރާންސުން ކާމިޔާބުކުރިއިރު ޕޮގްބާއަކީ ޓީމުގެ މުހިއްމު ކުޅުންތެރިއެކެވެ. އޭނާ ވަނީ އެ އަހަރުގެ ފައިނަލުގައި ކްރޮއޭޝިއާ ކޮޅަށް ގޯލު ވެސް ޖަހައިފަ އެވެ.

އަންނަ އަހަރުގެ ވޯލްޑް ކަޕް ކޮލިފައިން ގުރޫޕް ޑީގެ އެއްވަނައިގައި 12 ޕޮއިންޓާ އެކު ފްރާންސް މި ވަގުތު އޮތްއިރު، ގުރޫޕުގައި ބާކީ އޮތް ދެ މެޗުން އެ ޓީމު ކޮލިފައި ވާން ބޭނުން ވަނީ އެންމެ މޮޅެކެވެ. ފްރާންސަށް ބާކީ އޮތީ ހޮނިހިރު ދުވަހުގެ ރޭ އަމިއްލަ ދަނޑުގައި ކަޒަކިސްތާނާ ދެކޮޅަށް ކުޅޭ މެޗާއި، އަންގާރަ ދުވަހުގެ ރޭ ރަށުން ބޭރުގައި ފިންލެންޑާ ދެކޮޅަށް ކުޅޭ މެޗެވެ.

މި ގުރޫޕުގެ ދެވަނައިގައި ނުވަ ޕޮއިންޓާ އެކު އޮތް ޔޫކްރޭނަށް ބާކީ އޮތީ ބޮސްނިޔާއާ ދެކޮޅަށް ރަށުން ބޭރުގައި ކުޅެން ޖެހޭ މެޗު އެކަންޏެވެ.

އިންޓަނޭޝަނަލް ބްރޭކަށް ފަހު ޕޮގްބާ އަނިޔާއިން ރަނގަޅުވި ނަމަވެސް، މެންޗެސްޓާ ޔުނައިޓެޑުން ކުޅޭ ފުރަތަމަ މެޗުގައި އޭނާ އަށް ނުކުޅެވޭނެ އެވެ. އަމިއްލަ ދަނޑުގައި ލިވަޕޫލާ ދެކޮޅަށް ކުޅެ ލީގުގައި 5-0 އިން ބަލިވި މެޗުގައި ދެވަނަ ހާފުގައި ކުޅެން ނުކުމެ އެންމެ 15 މިނިޓުތެރޭ ހޯދި ރަތް ކާޑަކާ އެކު އޭނާ ހުރީ ތިން މެޗުގެ ސަސްޕެންޝަނެއްގަ އެވެ. ޓޮޓެންހަމް އާއި މެންޗެސްޓާ ސިޓީއާ ދެކޮޅަށް ޔުނައިޓެޑް ކުޅުނު މެޗުގައި ޕޮގްބާ އަށް ނުކުޅެވުނު އިރު، ބްރޭކަށް ފަހު ޔުނައިޓެޑް ފުރަތަމަ ނުކުންނާނީ ލީގުގައި ވަޓްފޯޑާ ދެކޮޅަށެވެ.

އެންމެ ފަހުން ސިޓީއާ ދެކޮޅަށް ކުޅުނު މެޗުގައި އަނިޔާގެ ސަބަބުން ޔުނައިޓެޑްގެ ފޯވަޑް އެޑިންސަން ކަވާނީ ވެސް ޓީމުގައި ނުހިމެނިއިރު، އިންގްލެންޑުގެ ފުލްބެކް ލޫކް ޝޯގެ ބޮލަށް އެ މެޗުގައި ލިބުނު އަނިޔާއަކާ ގުޅިގެން އޭނާ ވަނީ ބަދަލު ކޮށްފަ އެވެ.