އެވަޓަން ސަލާމަތް ކުރަން ލަމްޕާޑް ހަވާލު ވެއްޖެ

މާސީސައިޑް (ޖެނުއަރީ 31) - އިނގިރޭސި ޕްރިމިއާ ލީގުގެ ކްލަބް އެވަޓަންގެ ކޯޗުކަމާ ހަވާލުވާން ފްރޭންކް ލަމްޕާޑް އެއްބަސް ވެއްޖެ އެވެ.

ލަމްޕާޑް އެވަޓަންއާ ގުޅެން އެއްބަސްވީ ދެ އަހަރާ ބައިގެ މުއްދަތަކަށެވެ. މިދިޔަ ހުކުރު ދުވަހު އެވަޓަން އިން ކުރިޔަށް ގެންދިޔަ ފައިނަލް އިންޓަވިއު އަށް ފަހު މަގާމާ ހަވާލުވުުގެ މަސައްކަތްތައް އިއްޔެ ނިމިފައިވާ ކަމަށް މީޑީއާތަކުން ރިޕޯޓް ކުރެ އެވެ.

އެވަޓަންގެ ކޯޗުގެ މަގާމު ހުސްވީ ރަފައޭލް ބެނިތޭޒް މި މަހުގެ ކުރީކޮޅު މަގާމުން ވަކިކުރުމާ ގުޅިގެންނެވެ. ބެނިތޭޒްއާ އެކު ސީޒަންގެ ކުރީކޮޅު ޓީމު ރަނގަޅު ފޯމެއްގައި އޮތް ނަމަވެސް، ފަހުން އިންޖަރީ އާއި ކޮވިޑުގެ މައްސަލަތަކާ ހުރެ ބެނިތޭޒް އަށް ވަނީ ޓީމާ އެކު އެދެވޭ ނަތީޖާއެއް ނުނެރެވިފަ އެވެ.

ބެނިތޭޒް އަށް ފަހު ކޯޗެއް ހަމަޖެހެންދެން ޓީމަށް އިރުޝާދު ދިނީ އެސިސްޓެންޓް މެނޭޖަރު ޑަންކަން ފާގަސަން އެވެ. އަދި މި ވަގުތު އެޓީމު އޮތީ ޕްރިމިއާ ލީގުގައި މިހާތަނަށް ކުޅުނު 20 މެޗުން 19 ޕޮއިންޓް ހޯދައިގެން ޓޭބަލްގެ 16 ވަނައިގައި، ރެލިގޭޝަން ޒޯނަށް ވުރެ ހަތަރު ޕޮއިންޓް ކުރީގަ އެވެ.

ކުރީގެ ޗެލްސީގެ މިޑްފީލްޑަރު ލަމްޕާޑް ކޯޗިން ކެރިއަރު ފެށީ ޑާބީ ކައުންޓީންނެވެ. ޖެހިގެން އައި ސީޒަނުގައި ޓްރާޏްސްފާ ބޭންގައި އޮތް ޗެލްސީއާ ހަވާލުވެ، ލަމްޕާޑް ވަނީ އެ ޓީމުގެ ޒުވާން ގިނަ ކުޅުންތެރިންނަށް ފުރުސަތު ދީގެން ފުރަތަމަ ސީޒަނުގައި ވެސް ލީގުގެ ހަތަރު ވަނައިގައި ނިންމައިފަ އެވެ. ޖެހިގެން އައި ސީޒަނުގައި މަޝްހޫރު ގިނަ ކުޅުންތެރިންގެ ސޮއި ހޯދައިގެން ވެސް ނަތީޖާ ދަށް ވުމުން އޭނާ މަގާމުން ވަކިކުރީ މިދިޔަ އަހަރުގެ ޖެނުއަރީގަ އެވެ.

އެވަޓަން އިން މިއަދުގެ ވަގުތެއްގައި ރަސްމީކޮށް ލަމްޕާޑް ޓީމާ ގުޅުނުކަން އިއުލާން ކުރަން ތައްޔާރު ވަމުން ދާކަމަށް ރިޕޯޓްތައް ބުނާއިރު، އެވަޓަން އިން ދަނީ މެންޗެސްޓާ ޔުނައިޓެޑަށް ކުޅޭ ނެދަލެންޑްސް މިޑްފީލްޑަރު ޑޮނީ ވެން ޑި ބީކް އެޓީމަށް ގެންނަން ތައްޔާރު ވަމުންނެވެ. ލޯން ފީއަކާ އެކު މި ސީޒަނުގެ ނިޔަލަށް މުސާރަ އެއްކޮށް ދޭގޮތަށް ވެން ޑި ބީކް އެވަޓަން އަށް ގެންދަން ދެ ކުލަބުން ވެސް އެއްބަސްވުމަކަށް އައިސްފައި ވާކަމަށް މީޑިއާ ރިޕޯޓްތައް ބުނެ އެވެ. ވެން ޑި ބީކް ގެންނަނީ ލަމްޕާޑުގެ ލަފަޔަކަށެވެ.

ލަމްޕާޑާ އެކު އެވަޓަން އެންމެ ފުރަތަމަ ކުޅޭނީ އަންނަ ހޮނިހިރު ދުވަހުގެ ރޭ އެފްއޭ ކަޕް ހަތަރުވަނަ ބުރުގައި އަމިއްލަ ދަނޑުގައި ބްރެންޓްފޯޑާ ދެކޮޅަށެވެ. އެއަށް ފަހު އަންނަ ހަފްތާގެ އަންގާރަ ދުވަހުގެ ރޭ ރަށުން ބޭރުގައި ނުކުންނާނީ ނިއުކާސަލް ޔުނައިޓެޑާ ދެކޮޅަށެވެ.