އީޝަލް: ވިހެއީއްސުރެ މިއަދާ ހަމައަށް ވެސް ތަފާތު!

ހައްވާ އީޝަލް ރިޔާޒު މަގުމަތިން ހިނގާފައި ދާއިރު އެއީ "ތަފާތު ކުއްޖެއް" ކަމަށް ސިފަކޮށް މީހުން ބަލަން ތިބެ އެވެ. އިނގިލި ދިއްކޮށްކޮށްފައި އެއީ ހާދަ "ކުޑަ ކުއްޖެކޭ" އެކަކު އަނެކަކަށް ބުނެލެވެ އެވެ. އީޝަލް އަކީ އުފަންވިއިރު ވެސް "ޓާނާ ސިންޑްރޯމްސް" ނުވަތަ ހެދި ބޮޑުވުމުގެ ޑިސްއޯޑާ ހުރި ކުއްޖެކެވެ.

އެކަމަކު އޭނާ އާމެދު ތަފާތުކޮށް ވިސްނި ނުވަތަ ވިސްނާ އެންމެންނަށް ވުރެ އީޝަލްގެ ހިތްވަރާއި ރާއްޖެ އަށް އޭނާ ހޯދައިދީފައިވާ ރީތި ނަމުގެ ހައިބަތު މާބޮޑެވެ. މާ ޝަރަފުވެރި އެވެ. އޭގެ ޖަވާބު އޭނާ ދިނީ ވަރަށް ފުރިހަމައަށެވެ. އިންޓަނޭޝަނަލް ބެޑްމިންޓަންގައި ރާއްޖޭގެ ތާރީހް ބަދަލުކޮށްލި ތަރި އަކީ، ބައެއް މީހުން ތަފާތު ކުއްޖެ ކަމަށް ސިފަ ކުރި އީޝަލް އެވެ.

ޑިސެމްބަރު 2021 ގައި އޭޝިއާގެ ޔޫތު ޕެރަ ގޭމްސްގެ ބެޑްމިންޓަން އިވެންޓުގައި ބަންގްލަދޭޝްގެ ޝޮރްމީ މޮޒުމަޑާރް ބަލިކޮށް ޕެރަ ބެޑްމިންޓަން މުބާރާތެއްގައި ރާއްޖެ އަށް ފުރަތަމަ މޮޅު ހޯދައިދީ ކުޅިވަރުގެ މިބޮޑު އާއިލާ އަށް އުފާވެރިކަން ގެނެސް ދިނީ ބައެއް މީހުން އިނގިލި ދިއްކޮށްކޮށްފައި "ކުޑަ ކުޑަ ކުއްޖެކޭ" ބުނި، އީޝަލް އެވެ.

ބެޑްމިންޓަން ކުޅެވޭނީ، ފުދޭވަރެއްގެ އިސްކޮޅެއް ވެސް ހުރެގެންކަމަށް ތަޖުރިބާކާރުން ބުނެ އެވެ. ރާއްޖޭގެ އިސްކޮޅުން ކުރު ބައެއް އެތުލީޓުން ވެސް ބެޑްމިންޓަން ކުޅެން ޝައުގުވެރިވި އެވެ. އެކަމަކު ކުރިއަށް ނުދެވޭނެ ކަމަށް ބަލައި އެހެން ކުޅިވަރުތައް އިހްތިޔާރު ކުރީ އެވެ.

އެކަމަކު އިސްކޮޅުން ކުރުވިއަސް ބެޑްމިންޓަންގައި އީޝަލް ފަށައިފައިވާ ލެގަސީގެ ވާހަކައަކީ ދިގު ނޮވެލް އަކަށް ފެތޭ ވަރަށް ވުރެ ވެސް ދިގު ވާހަކައެކެވެ.

"އަސްލު އަޅުގަނޑު ވެސް ފުރަތަމަ ހީނުކުރަން ބެޑްމިންޓަން ކުޅެވޭނެ ކަމަކަށް. އެއީ ކުރިން ވެސް ފެނިފައި ހުރީ ވަރަށް އިސްކޮޅުން ދިގުކޮށް ހުންނަ ކުޅުންތެރިން ކުޅޭތަން،" މިދިޔަ މަހު ބޭއްވި މޯލްޑިވްސް ސްޕޯޓްސް އެވޯޑްގައި އެންމެ މޮޅު ސްޕެޝަލީ އޭބަލްޑް އެތުލީޓްގެ އެވޯޑް ހޯދި އީޝަލް ބުންޏެވެ.

"ބައްޕަ ބުނެގެން ދިޔައި ބެޑްމިންޓަން އެސޯސިއޭޝަނުން ބޭއްވި އިވެންޓަކަށް. އެ އިވެންޓަށް ގޮސް ކުޅެން އުޅެނިކޮށް އަޅުގަނޑުގެ މިހާރުގެ ކޯޗުންނަށް ފެނިގެން ގެންދިޔައީ ވައިޑީޕީ އަށް. ދެން ވައިޑީޕީން ނެޝަނަލް ޓީމަށް."

ތާޖުއްދީން ސްކޫލްގެ ގްރޭޑް 9 ގައި ކިޔަވަމުން އަންނަ އީޝަލް ހުރީ ސްކޫލް ނިމުމަށް ފަހު ކެރިއާއެއްގެ ގޮތުގައި ވެސް ބެޑްމިންޓަންގައި ކުރިއަށް ދާށެވެ. އެ ކުޅިވަރުގައި ގައުމަށް ރީތި ނަން ހޯދައިދޭން އޭނާ ދެމިހުންނާނެ އެވެ. ކޮންމެ ހަފުތާއަކު ހަ ދުވަހު، ކޮންމެ ދުވަހަކު ދެގަޑިއިރު އޭނާގެ ޓްރޭނިންތައް ކުރިއަށް ގެންދަނީ އެޓާގެޓަށް ވާސިލު ވުމަށެވެ.

އީޝަލްގެ ބައްޕަ އަހްމަދު ރިޔާޒު ބުނި ގޮތުގައި، އީޝަލް އަށް އޭނާގެ މަންމަ މަރިޔަމް ރަޝީދާ ބަނޑުބޮޑު އިރު ވެސް މުޅިން އާދަޔާ ހިލާފް ކަމެއް ފާހަގަ ކުރެވުނެވެ. މަރިޔަމް އަށް ވިހަން ދީފައިވާ ޑިޔު ޑޭޓް އެކިފަހަރުމަތިން ދިޔައީ ފަސްވެ ލަސްވަމުންނެވެ.

"ޑިޔުޑޭޓް ލަސް ވަމުން ދިޔަ 15 ދުވަހަށް އަދި ބައެއް ފަހަރު އެއް މަހަށް ވެސް. ދެން އެއް ދުވަހު ވަރަށް ބަނޑުގައި ރިއްސާތީ އައިޖީއެމްއެޗްގެ ޕްރެގިނެންސީ ކްލިނިކަށް ގޮސް ސްކޭން ހެދީމަ ދައްކަނީ އަނެއްކާ ވެސް ޑިޔު ޑޭޓް އިތުރު އެއް މަހަށް ލަސްވެފައި އިންތަން،" ރިޔާޒު ކިޔައިދިނެވެ.

"ދެން ބުނެފި ސްކޭން މެޝިނުގެ މައްސަލައެކޭ. އަނެއްކާ ވެސް އަންނާށޭ ބުނީމަ ދެ ގަޑިއިރު ފަހުން ދިޔައީމަ ސްކޭން ހެއްދީމަ ދެން ދައްކަނީ އޭގެ ކުރިން ހެދި ސްކޭން އަށް ވުރެ ޑިޔު ޑޭޓް ދެތިން ދުވަސް ލަސް ކަމަށް. ދެން އޭޑީކޭ އަށް ގޮސް ސްކޭން ހެއްދީމަ ވެސް މިވަނީ މިހެން."

ރިޔާޒު ބުނި ގޮތުގައި އޭޑީކޭގެ ޑޮކްޓަރު ލަފާ ދިނީ އޮޕަރޭޝަން ކުރުމަށްފަހު ދަރިފުޅު ނެގުމަށެވެ.

"އޮޕަރޭޝަނަށް ފަހު ދަރިފުޅު ނަގައިފައި ޑޮކްޓަރު ބުނި މިކަހަލަ ކުއްޖެކޭ. ފަހުން މި އެނގެނީ ޑިޔު ޑޭޓް ލަސްވަމުން ދިޔައީ ވެސް މިހެންވެގެންކަން،" ޔޫއެންޑީޕީގައި މަސައްކަތްކުރަމުން އަންނަ ރިޔާޒު ބުންޏެވެ.

އީޝަލް އުފަންވިތާ ތިން މަސްވީރު ވެސް އެސްފިޔަ ނުޖަހަ އެވެ. ރިޔާޒު ބުނީ ލޯ މެރެނީ ނިދިގެން ކަމަށެވެ.

"އުމުރުން ތިން މަހުގައި އަޅުގަނޑުމެން ދިޔައީ ބެންގަލޫރަށް. މުޅި ފެމެލީ އެއްކޮށް ދިޔައީ. ފިފްޓީ ފިފްޓީ ކަމެއް ވިއްޔާ،" އެސްފިޔަ ނުޖެހޭ މައްސަލަ އަށް ފަރުވާ ކުރުމަށް ބެންގަލޫރަށް ކުރި ދަތުރާ ބެހޭގޮތުން ރިޔާޒު ވާހަކަ ކުރިއަށް ގެންދިޔަ އެވެ.

އީޝަލްގެ ނަސީބު ވަރަށް ރަނގަޅެވެ. ބެންގަލޫރުގެ ޑޮކްޓަރުންގެ ޓީމަކުން އެ މައްސަލަ އަށް އަލަށް ފަށާ ފަރުވާގެ "ޓްރެއަލް"ގައި ތުއްތުތުއްތު އީޝަލް ބައިވެރި ކުރުމަށް ޑޮކްޓަރުން އެދުނެވެ. ރިޔާޒު އާއި މަރްޔަމް އަދި އާއިލާގެ އެހެން މެންބަރުން ވެސް އެކަމަށް އެއްބަސްވެ އެއޮޕަރޭޝަނައިގެން ކުރިއަށް ދިޔަ އެވެ.

"ޑޮކްޓަރުންގެ ޓީމުން ބުނި މިކަހަލަ ކުދިންނަށް ތިމަންނަމެން އަލަށް ދޭން ފަށާ ޓްރީޓްމެންޓަކަށް އެއްބަސް ވެއްޖެއްޔާ ޓްރެއަލް އަކަށް ހަދާނަމޭ. ސަކްސަސް ވިޔަސް ނުވިޔަސް އެއްވެސް ޗާޖެއް ނުކުރާނަމޭދެން އަޅުގަނޑުމެން ދެ މީހުން އެއްބަސްވީ ހަދަން،" ރިޔާޒު ބުންޏެވެ.

"އެ ޓްރީޓްމެންޓް ހެދިއިރު ވެސް އަޅުގަނޑު ހުރިން ކައިރީގައި. ވަރަށް ހިތަށް ވެސް އަސަރުކުރި. އެކަމަކު ﷲ އިރާދަކުރެއްވީތީ އެކަން ކާމިޔާބުވީ. އޭގެ ފަހުން އެސްފިޔަ ޖެހެން ފެށީ."

އީޝަލް އެންމެ ތުއްތު އިރު ވެސް އޭނާ ގޮވައިގެން ރިޔާޒު މެން ބޭރަށް ނުކުންނަން ފެށީ މުޖުތަމައުގެ ވިސްނުން ބަދަލުކުރުމުގެ ގޮތުންނެވެ. ދުރުގައި ތިބެ މީހުން ބަލާނެކަން އެނގެ އެވެ. ބައެއް ފަހަރު ވަރަށް ހިތްދަތި ކަންތައްތަކާ ވެސް ކުރިމަތިލާން ޖެހޭކަން ރިޔާޒު ފާހަގަ ކުރި އެވެ.

"އެންމެ ތުއްތު އިރު އީޝަލް ގޮވައިގެން އަޅުގަނޑު އަންހެނުން ބޭރަށް ނުކުމެ ޕޭމަންޓްމަތިން ހިނގަމުންދަނިކޮށް ސައިކަލްގައި ދިޔަ މީހަކު ދިޔައީ ބަލަމުން ބަލަމުން. ދެން އަންހެނުންނަށް ވެސް އެނގޭ ބަލަމުން ދިޔަކަން. އަންހެނުން އެކަމަށް ނުވިސްނާ ދިޔައީ ހިނގަމުން. އިރުކޮޅަކުން އެއްކަލަ މީހާ އެ ކޮށި ވަށާލާފައި އަނބުރާ އައިސް އަންހެނުން ކައިރީގައި ބުނަނީ ތި ކުއްޖާ ވިހޭއިރު ވެސް އޮންނަނީ ތިހެން ހެއްޔޭ. ދެން ބަލާ އަންހެނުންނަށް ކުރާނެ އަސަރު. އަންހެނުންނަށް ވަރަށް އުނދަގޫވި ދުވަހެއް އެއީ،" ރިޔާޒު ކިޔައިދިނެވެ.

އެކަމަކު ރިޔާޒު ބޭނުންވީ ދަރިފުޅަކީ ހަމަ ނޯމަލް ކުއްޖެއްކަން ވިސްނައިދޭށެވެ.

"ހަގީގަތުގައި އަޅުގަނޑު ދަރިފުޅެއް ނޫން... މި ސޮސައިޓީ ޑިސްއޭބަލްވީ."

ކުޑައިރުގެ ބައެއް ހަނދާންތަކުގެ ވާހަކަ ދައްކަމުން އީޝަލް ވެސް ބުނީ ނުފެންނަ މަންޒަރެއް ފެނިގެން ބަލަން ތިބޭހެން އޭނާ އަށް މީހުން ބަލަން ތިބޭކަން ފާހަގަވާ ކަމަށެވެ.

"ކުރިން މަގުމަތީގައި ދާއިރު މީހުން ބަލައިފަ އިނގިލި ދިއްކޮށްފައި ދެން ޖެހިގެން ހުންނަ މީހާ އަށް ދައްކަން ވެސް ދައްކައިފަ ބުނާނެ ބަލާބަލާށޭ އެހަރަ ދަނީ ހާދަ ކުޑަ ކުއްޖެކޭ ކިޔާފައި،" އީޝަލް ބުންޏެވެ.

އެކަމަކު އޭނާ އާމެދު ތަފާތުކޮށް ވިސްނި އެންމެންނަށް އޭނާގެ ހިތް ހެވެވެ.

"މިހާރު އެހާ ބޮޑަކަށް އެކަހަލަ އިންސިޑެންޓްތަކެއް ދިމާނުވޭ. އެކަމަކު ބައެއް މީހުން ތިބޭނެ ބަލަން ދެން އޮގޮތަށް ބަލާ މީހުންނަށް އަޅުގަނޑު ހީލަނީ،" ސްކޫލް ނިމުމަށްފަހު މެންޓަލް ހެލްތުގެ ދާއިރާއިން ކިޔަވަން އަޒުމު ކަނޑައަޅައިގެން ހުރި އީޝަލް ބުންޏެވެ.

ރިޔާޒު ބުނި ގޮތުގައި އީޝަލް އާމެދު އާންމުން ދެކޭ ގޮތް ބަދަލު ވެއްޖެ އެވެ. އިންޓަނޭޝަނަލް ބެޑްމިންޓަން މުބާރާތުގައި ހޯދި ކާމިޔާބާއި މޯލްޑިވްސް ސްޕޯޓްސް އެވޯޑްގައި ހޯދި އެވޯޑާއެކު އާންމުންނަށް ވެސް އީޝަލް ސިފަ ކުރެވިފައި ވަނީ "ކުޅިވަރު ފިގާ" އެއްގެ ގޮތުގަ އެވެ.

"އެކަން ބަދަލު ކުރުމަށް ވަރަށް ގިނަ މަސައްކަތްތަކެއް ކުރެވިއްޖެ،" ރިޔާޒު ބުންޏެވެ.

ކުޅިވަރުގައި އީޝަލްގެ ވެސް އޮތީ ބޮޑު އަޒުމެކެވެ. އޮލިމްޕިކްސްގެ ޕެރަ ކެޓަގަރީ ނުވަތަ ޕެރަލިމްޕިކްސް އަށް ކޮލިފައިވެގެން ރާއްޖެ ތަމްސީލު ކުރަން ދިއުމަކީ އޭނާގެ އޮތް ޓާގެޓެވެ.