ކީޕަރުގެ މޮޅު ކުޅުމާ އެކު މޮންޗެންގްލަޑްބަކުން ބެޔާން ހުއްޓުވައިފި

މިއުނިކް (އޮގަސްޓް 28) - ބޮރޫޝިއާ މޮންޗެންގްލަޑްބަކްގެ ގޯލްކީޕަރު ޔާން ސޮމާ ރެކޯޑް އަދަދަކަށް ހަމަލާ ދިފާއު ކުރި މެޗުގައި އެ ޓީމުން ޗެމްޕިއަން ބެޔާން މިއުނިކާ 1-1 އިން އެއްވަރުކޮށްފި އެވެ.

މި މެޗުގައި ސޮމާ، 33، ވަނީ ބެޔާން އިން ފޮނުވާލި 19 ހަމަލާއެއް މަތަކޮށްފަ އެވެ.

މޮންޗެންގްލަޑްބަކް އަށް ލަނޑު ޖަހައިދިނީ އެ ޓީމު ފުރަތަމަ ހާފުގައި ފޮނުވާލި ހަމައެކަނި ހަމަލާއިން، 43 ވަނަ މިނިޓުގައި ފްރާންސްގެ ފޯވާޑް މާކަސް ތުރާމް އެވެ. ބެޔާން އިން އެއްވަރުކުރީ 83 ވަނަ މިނިޓުގައި ޖަމާލް މުސިއަލާގެ އެހީތެރިކަމާ އެކު ލީރޮއީ ސާނޭ ޖަހައިދިން ގޯލުންނެވެ. ސާނޭ ގޯލު ޖަހަން ފޮނުވާލި ހަމަލާއަކީ ބެޔާން އިން މެޗުގައި ފޮނުވާލި 25 ވަނަ ހަމަލާއެވެ. އަދި އެއީ އެ ޓީމުން ގޯލާ އަމާޒުކޮށް ފޮނުވާލި 15 ވަނަ ހަމަލާ އެވެ.

ބެޔާން އަށް މެޗުން މޮޅުވާން ވެސް ފުރުސަތު ލިބުނު ނަމަވެސް، އިތުރު ވަގުތުގައި ބެންޖަމީން ޕަވާޑު ފޮނުވާލި ހަމަލާ ކީޕަރު ސޮމާ ދިފާއު ކުރި އެވެ. އެއީ އޭނާ މެޗުގައި ދިފާއުކުރި 19 ވަނަ ހަމަލާއެވެ.

މީގެ ކުރިން ބުންޑެސްލިގާ މެޗެއްގައި އެންމެ ގިނަ ހަމަލާ ދިފާއުކުރުމުގެ ރެކޯޑް އޮންނަނީ، މިއަހަރު ޖެނުއަރީ މަހު ބެޔާންއާ ދެކޮޅަށް ހާތާ ބާލިން ކުޅުނު މެޗުގައި، އެޓީމުގެ ގޯލު ބެލެހެއްޓި އަލެކްޒެންޑާ ޝްވޮލޯ އަތުގަ އެވެ. އެ މެޗުގައި 4-1 އިން ބެޔާން އަތުން ބަލިވި ނަމަވެސް ކީޕަރު ވަނީ 14 ހަމަލާ މަތަކޮށްފަ އެވެ.

މޮންޗެންގްލަޑްބަކް ލީގުގައި މިހާތަނަށް ހަތަރު މެޗު ކުޅެފައި ވާއިރު، އަދި މެޗަކުން ބައްޔެއް ނުވެ އެވެ. އަމިއްލަ ދަނޑުގައި ކުޅުނު ދެ މެޗު ވެސް ކާމިޔާބު ކޮށްފައި ވާއިރު، ރަށުން ބޭރުގައި ކުޅުނު ދެ މެޗުން އެ ޓީމުން ވަނީ ޕޮއިންޓެއް ހޯދައިފަ އެވެ.

ބުންޑެސްލިގާ ގައި ބޮރޫޝިއާ ޑޯޓްމަންޑް މިދިޔަ ހަފްތާ ކުޅުނު މެޗުގެ ފަހުވަގުތު ވަން ލަނޑުތަކުން ބަލިވި ނަމަވެސް ޓީމުން ވަނީ ރޭ ރަށުން ބޭރުގައި ހާތާ ބާލިން އަތުން 1-0 އިން މޮޅުވެފަ އެވެ. އެ ޓީމުގެ ހަމައެކަނި ލަނޑު ފުރަތަމަ ހާފުގައި ޖަހައިދިނީ މި ސީޒަނުގައި އެޓީމުން ގެނައި 34 އަހަރުގެ ފްރާންސް ފޯވާޑް އެންތަނީ މޮޑެސްޓޭ އެވެ.

ލީގުގައި ކުޅުނު ފުރަތަމަ ތިން މެޗުން ވެސް މޮޅެއް ހޯދިފައި ނުވާ އާރްބީ ލައިޕްޒިގުން ވަނީ 2-0 އިން ވުލްވްސްބާގް ބަލިކޮށް، ސީޒަނުގެ ފުރަތަމަ މޮޅު ހޯދައިފަ އެވެ. އެޓީމުގެ ދެ ލަނޑު ވެސް ޖަހައިދިނީ، މިދިޔަ ސީޒަނުގައި ލީގުގެ މޮޅު ކުޅުންތެރިޔާގެ މަގާމް ހޯދި ފްރާންސްފެ ކްރިސްޓޮފާ އެންކޫންކޫ އެވެ.