ޗެމްޕިއަންސް ލީގު: ކްރޮއޭޝިއާގެ ޗެމްޕިއަނުން ޗެލްސީ ބަލިކޮށްފި

ޒަގްރެބް (އޮގަސްޓް 7) - ޔޫއެފާ ޗެމްޕިއަންސް ލީގުގައި ވާދަކުރާ ކްރޮއޭޝިއާގެ ޗެމްޕިއަން ޑައިނަމޯ ޒަގްރެބުން އަމިއްލަ ދަނޑުގައި ޗެލްސީއާ ވާދަކޮށް 1-0 އިން މެޗު ކާމިޔާބު ކޮށްފި އެވެ.

ޗެމްޕިއަންސް ލީގު ގުރޫޕް ސްޓޭޖުގައި ދެޓީމު ކުޅުނު ފުރަތަމަ މެޗުގައި ޒަގްރެބުން ލަނޑު ޖެހުމުގެ ކުރިން ޗެލްސީގެ ރަހީމް ސްޓާލިން އަށާއި ޕިއޭ އެމެރިކް އޮބާމެޔަންގް އަށް ވަނީ ޗެލްސީ އަށް ލީޑު ނަގައިދޭން ލިބުނު ފުރުސަތުތަކުގެ ބޭނުމެއް ނުކުރެވުނެވެ.

އޮބާމެޔަންގް ތަނަވަސްކުރި ފުރުސަތެއްގައި ސްޓާލިން ފޮނުވާލި ބޯޅަ ޒަގްރެބުގެ ޑިފެންޑަރެއް ބްލޮކް ކުރި އިރު، ކައި ހަވާޓްޒް ގޯލު ކުރިމައްޗަށް ހުރަސް ކޮށްލި ބޯޅަ އޮބާމެޔަންގް އަށް ލިބޭގޮތެއް ނުވި އެވެ. މިއީ އޮބާމެޔަންގް ޗެލްސީ އަށް ބަދަލުވެ އެޓީމުގެ ޖޯޒީގައި ކުޅުނު ފުރަތަމަ މެޗެވެ.

ޒަގްރެބުން ލަނޑު ޖެހީ މެޗުގެ 13 ވަނަ މިނިޓުގައި ލިބުނު ކައުންޓާ އެޓޭކެއްގައި މިސްލާވް އޯސިޗެވެ. ދަނޑުގެ މެދަކާ ހަމައިން އޭނާ ވަނީ ބޯޅަ ހޯދައިގެން، ޗެލްސީގެ ޑިފެންޑަރު ވެސްލީ ފޮފާނާއަށް ބޯޅަ ހޯދަން ފުރުސަތު ނުދީ މުޅިން ހުސްކޮށް އޭރިއާ ތެރެއާށް ވަދެ ގޯލުގެ ތިރީ ކަނަށް ބޯޅަ ފޮނުވާލައިފަ އެވެ. އޯސިޗަކީ ޗެމްޕިއަންސް ލީގު ކޮލިފައިންގައި އެޓީމުގައި މުހިއްމު ދައުރެއް އަދާ ކުރި ކުޅުންތެރިއެކެވެ.

އޭގެ ފަހުން އެޓީމުގެ ކެޕްޓަން އަރިޖާން އަޑޭމީ އޭރިއާ ބޭރުން ފޮނުވާލި ހަމަލާއެއް ޗެލްސީގެ ގޯލްކީޕަރު ކެޕާ އަރިޒަބަލާގާ ދިފާއު ކުރި އެވެ. މިއީ ޗެލްސީގެ ކީޕަރު ކެޕާ ވެސް މި ސީޒަނުގައި ކުޅުނު ފުރަތަމަ މެޗެވެ. އޭނާ އެންމެ ފަހުން މެޗެއް ކުޅުނީ މިދިޔަ މާޗު މަހު އެފްއޭ ކަޕުގަ އެވެ.

ދެވަނަ ހާފު ފެށިގެން ބެން ޗިލްވެލް ޖައްސާލި ބޯޅައެއް ގޯލަށް ފޮނުވާލައިގެން އޮބާމެޔަންގް ލަނޑެއް ޖެހި ނަމަވެސް، ޗިލްވެލް އަށް ބޯޅަ ލިބުނު އިރު އޮފްސައިޑުގައި ހުރުމުން އެ ގޯލު ބަލައެއް ނުގަނެ އެވެ. ޗެލްސީ އިން ކުރިއަށް ޖެހިގެން އިތުރު ހަމަލާއެއް އުފައްދަން މަސައްކަތް ކުރަނިކޮށް ޒަގްރެބުން ވަނީ ދުރުން ފޮނުވާލި ހަމަލާއެއްގައި ޗެލްސީގެ ގޯލަށް ނުރައްކާ ކޮށްފަ އެވެ. ސްޓެފާން ރިސްޓޯވްސްކީ ފޮނުވާލި ބާރު ހަމަލާ ގޯލުގެ މަތީ ކަނަށް ވަންނަން ދަނިކޮށް ދިފާއު ކުރަން ފުންމާލި ކީޕަރު ކެޕާ އަތުގައި ޖެހުނު ނަމަވެސް ސަލާމަތްވީ ގޯލު ދަނޑީގައި ޖެހުމުންނެވެ.

މެޗުގެ ފުރިހަމަ ވަގުތު ހަމަވާން ކައިރި ވެފައި ވަނިކޮށް ގޯލު ކުރިމަތީ ހުސްކޮށް ހުރެ ހަވާޓްޒް ބޮލުން ފޮނުވާލި ބޯޅައެއް، އޭނާގެ ފަހަތުގައި ހުރި ޒަގްރެބްގެ ރޮބާޓް ލޫބިސިޗް ވަނީ ކުރިމައްޗަށް ނުކުމެ ބޮލުން ދިފާއު ކޮށްފަ އެވެ. ރީސް ޖޭމްސް ފޮނުވާލި ހަމަލާއެއް ގޯލު ކަދަނޑީގައި ޖެހުނު އިރު، މޭސަން މައުންޓް ފޮނުވާލި ހަމަލާއެއް ކީޕަރު ޑޮމިނީކް ލިވާކޮވިޗް ވަނީ ދިފާއު ކޮށްފަ އެވެ.

މެޗުގެ 75 މިނިޓާ ހަމައަށް ޗެލްސީގެ ކޯޗު ތޯމަސް ޓުޗެލް ވަނީ ފަސް ބަދަލު ކޮށްފަ އެވެ. ކެޕްޓަން ސެޒާ އަޒްޕިލިކުއެޓާ އާއި އޮބާމެޔަންގާއި ސްޓާލިން އަދި މަޓެއޯ ކޮވަސިޗާއި ބެން ޗިލްވެލްގެ ބަދަލުގައި ބެންޗުން އެރުވީ، ޖޯޖީނިއޯ އާއި ހަކީމް ޒިޔެޝް އާއި މާކް ކުކުރޭޔާ އަދި ކްރިސްޓިއަން ޕުލިސިޗްގެ އިތުރުން ޒުވާން ފޯވާޑް އާމަންޑޯ ބްރޯޔާ އެވެ. ނަމަވެސް ޒަގްރެބުން ވަނީ ޗެލްސީގެ އެޓޭކްތައް ހުއްޓުވުމުގައި ކާމިޔާބު ހޯދައިފަ އެވެ.

ޗެލްސީގެ ކޯޗު ޓުޗެލް ރެފްރީގެ ނިންމުންތަކާ ހިތްހަމަ ނުޖެހުން ފާޅުކޮށްގެން އޭނާ އަށް ވަނީ މި މެޗުގައި ރީނދޫ ކާޑެއް ވެސް ދައްކައިފަ އެވެ.

ޒަގްރެބުން ވަނީ ޔޫރަޕުގައި ލަންޑަނުގެ ކުލަބުތަކާ ދެކޮޅަށް ރަނގަޅު ނަތީޖާތަކެއް ނެރެފަ އެވެ. މިދިޔަ ސީޒަނުގެ ޔޫރޮޕާ ލީގު ގުރޫޕް ސްޓޭޖުގައި ވެސްޓޤ ހޭމް ބަލިކުރި އިރު، އޭގެ ކުރީ ސީޒަނުގައި ގަދަ 16 ގެ ދެވަނަ ލެގުގައި ތަފާތު ބޮޑުކޮން ޓޮޓެންހަމް ހޮޓްސްޕާ ބަލިކޮށް ކުއާޓާ ފައިނަލުން ޖާގަ ހޯދި އެވެ. އަދި 2015 ވަނަ އަހަރު ޗެމްޕިއަންސް ލީގު ގުރޫޕް ސްޓޭޖުގައި އާސެނަލް ވެސް ބަލިކުރި އެވެ.