ގައުމީ ޓީމުން ކްލަބްތަކަށް ފަސޭހަކޮށްދޭނެ ކަމަށް ހީނުކުރާތި: ޓުޗެލް

ކްލަބްތަކަށް ފަސޭހަކޮށް ދޭން އިންގްލެންޑްގެ ޓީމުގެ ކުޅުންތެރިން ރޮޓޭޓް ނުކުރާނެކަމަށް ކޯޗު ތޯމަސް ޓުޗެލް ބުނެފި އެވެ.

ކުރިން ކްލަބްތަކުގައި މަސައްކަތް ކުރި އިރު ޖަރުމަނު ކޯޗުގެ ވިސްނުން ތަފާތެވެ. ގައުމީ ޓީމުގެ ކޯޗުން ކްލަބްތަކަށް ވެސް އެއްބާރުލުން ދިނުމަށް އޭނާ އޭރު ވިސްނުން ގެންގުޅެ އެވެ.

އެކަމަކު ގައުމީ ޓީމާ ހަވާލުވުމަށް ފަހު އޭނާގެ ވިސްނުން ބަދަލުވެއްޖެ އެވެ. އޭނާ ބުނީ މިހާރު އޭނާގެ އިސްކަން ދޭ ކަންކަން ބަދަލުވެފައިވާ ކަމަށެވެ.

އޭނާ ބުނީ ކްލަބްތަކުން ގައުމީ ޓީމާ މެދު ނުވިސްނާ ކަމަށެވެ.

އޭނާ ބުނީ ޔުއެފާ ޗެމްޕިއަންސް ލީގުގައި އާސެނަލުން ޕީއެސްވީ އަތުން 7-1 ން މޮޅުވި ފުރަތަމަ ލެގް މެޗަށް ފަހު، އަނެއްކާ ދެން ޖެހިގެން އައި މެޗުގައި ވެސް ޑެކްލަން ރައިސް ލައްވާ ކުޅުވި ކަމަށެވެ.

އޭނާ ބުނީ އާސެނަލްއިން އެގޮތަށް ކަންތައް ކުރުމުން ގައުމީ ޓީމާ މެދު ކްލަބްތަކުން ނުވިސްނާކަމުގެ އިހިސާސް ކުރެވުނު ކަމަށެވެ.

"އަހަރެމެންނާ މެދު އެހާ ބޮޑަށް ވިސްނާ ކަމުގެ އިހުސާސެއް އަހަރެންނަށް ނުކުރެވުނު،" ޓުޗެލް ބުންޏެވެ.

އޭނާ ބުނީ ކުޅުންތެރިންގެ ސަލާމަތާ މެދު ވިސްނައި އޭނާ ފިޔަވަޅުތައް އަޅާނެ ކަމަށެވެ. އެކަމަކު ގައުމީ ޓީމުގެ މެޗު މުހިންމު ނޫން ކަމުގެ އިހުސާސް ކުޅުންތެރިންނަށް ކުރަން އޭނާ ބޭނުން ނުވާ ކަމަށް، ޖަރުމަނުގެ ގައުމީ ޓީމަށް ވެސް ކުރިން އިރުޝާދު ދިން ކޯޗު ބުންޏެވެ.

"އެކަމަކު ކުޅުންތެރިންނަށް ދެވޭ ގޯސް ސިގުނަލަކަށް ވާނީ؛ ކްލަބްގައި މާ މުހިންމު މެޗެއް އެބައޮތެއް ނޫންހޭ ބުނެ ރެސްޓްކޮށްލާށޭ ބުނުން،" ޓުޗެލް ބުންޏެވެ.

"އަހަރެމެންގެ ކުރިމަތީގައި އޮތީ ކޮލިފައިން މެޗުތައް. އަހަރެމެންނަށް އެންމެ ރަނގަޅު ވާނެ ގޮތަށް އަހަރެމެން ޖެހޭނެ ކަންތައް ކުރަން."

އޭނާ ބުނީ ކްލަބްތަކާ އެކު ގައުމީ ޓީމުން ގުޅުން ދަމަހައްޓާނެ ކަމަށެވެ. އަދި ގައުމީ ސްކޮޑްގައި ތިބި ކުޅުންތެރިންގެ ހާލަތު ކްލަބްތަކާ ހިއްސާ ކުރާނެ ކަމަށް އޭނާ ބުންޏެވެ.

"އަހަރެމެން ފަރުވާތެރި ވާނީ ގައުމީ ޓީމާ މެދު. ކްލަބްތައް ފަރުވާތެރި ވާނީ އެ ޓީމުތަކާ މެދު. އެހެންވީމަ ދެބައި މީހުން ވެސް ސަމާލުކަން ދޭން ވާނީ ކުޅުންތެރިންނަށް ފަރުވާތެރިވުމާ މެދު،" އޭނާ ބުންޏެވެ.