މެޑްރިޑް (މާޗު 3) - ރެއާލް މެޑްރިޑްގެ ތަރި ކިލިއަން އެމްބާޕޭގެ ކަކުލަށް ލިބިފައިވާ އަނިޔާއަށް ފްރާންސްގެ ސްޕެޝަލިސްޓުން ޕެރިހުގައި ފަރުވާ ދެމުން އަންނައިރު، ލީގުގައި ރެއާލް މެޑްރިޑް ރޭ އަމިއްލަ ދަނޑުގައި 1-0 އިން ގެޓަފޭ އަތުން ބަލި ވެއްޖެ އެވެ.
ރެއާލް މެޑްރިޑްގެ ބެލުމުގެ ދަށޑުން ފްރާންސްގެ މެޑިކަލް ސްޕެޝަލިސްޓުން ކުރިއަށް ގެންދިޔަ ޓެސްޓުތަކުން އެމްބާޕޭގެ ވާތު ކަކުލަށް އަނިޔާވެފައި ވާކަން ހާމަވެފައިވޭ. މި ކަމަށް ވަނީ އިތުރު ފަރުވާ ދޭން ފަށައިފަ، ނަމަވެސް ފަރުވާއަށް ސާޖަރީއެއް ހަދާކަށް ނުޖެހޭ،" ރެއާލް މެޑްރިޑުން ރިޕޯޓް ކޮށްފައިވެ އެވެ.
މިދިޔަ އަހަރުގެ ފަހު ކޮޅުން ފެށިގެން އުމުރުން 27 އަހަރުގެ ފޯވާޑްގެ ވާތު ކަކުލުގެ ލިގަމެންޓަށް ވަނީ އަނިޔާވެފަ އެވެ. މިއާ ގުޅިގެން މިދިޔަ ހަފްތާގެ ޗެމްޕިއަންސް ލީގު ޕްލޭއޮފްގެ ދެވަނަ ލެގުގައި ބެންފީކާއާ ދެކޮޅަށް އޭނާ ކުޅެފައެއް ނުވެ އެވެ. އަދި މިހާރު އޭނާ އަންނަނީ ފްރާންސްގެ ޕެރިހުގައި ކަކުލަށް ފަރުވާ ހޯދަމުންނެވެ.
ރޭ ގެޓަފޭއާ ދެކޮޅަށް ރެއާލް ކުޅުނު މެޗުގައި ވެސް އެމްބާޕޭ ކުޅެފައި ނުވާއިރު، އަންނަ ހަފްތާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި މެންޗެސްޓާ ސިޓީއާ ދެކޮޅަށް އޭނާ ކުޅޭނެ ކަން އަދި މުޅިއަކުން ޔަގީނެއް ނޫނެވެ. އެމްބާޕޭ ވަނީ މި ސީޒަންގައި ރެއާލަށް މިހާތަނަށް ކުޅެދިން 33 މެޗުން 38 ގޯލު ކާމިޔާބު ކޮށްދީފަ އެވެ.
އެމްބާޕޭގެ އިތުރުން ޖޫޑް ބެލިންގްހަމް އާއި އެޑުއާޑޯ ކަމަވިންގާ އަދި އެޑާ މިލިޓާއޯ އާއި ޑެނީ ސެބާޔޯސް ވެސް ރޭގެ މެޗަށް ނެގި ޓީމުގައި ނުހިމެނެ އެވެ. ކަމަވިންގާ ޓީމުގައި ނުހިމެނުނީ އޭނާގެ ދަތަކަށް ފަރުވާ ކުރަން ޖެހިގެންނެވެ.
ރެއާލް މި ވަނީ ލީގުގައި ޖެހިޖެހިގެން ދެ މެޗުން ބަލި ވެފަ އެވެ. އަދި މިއީ އަލްވަރޯ އާބެލޮއާގެ ކޯޗު ކަމުގައި ރެއާލް މިހާތަނަށް ކުޅުނު 12 މެޗުގެ ތެރެއިން ބަލިވި ހަތަރުވަނަ މެޗެވެ.
ގެޓަފޭގެ ހަމައެކަނި ލަނޑު ޖެހީ ފުރަތަމަ ހާފު ނިމެން ފަސްވަރަކަށް މިނިޓަށް ވެފައި ވަނިކޮށް މާޓިން ސަޓްރިއާނޯ އެވެ. މެޗުގެ އިތުރު ވަގުތުގައި ރެއާލްގެ ފްރެންކޯ މަސްޓަންޓުއޯނޯ އާއި ގެޓަފޭގެ އެޑްރިއަން ލިސޯ އަށް ވަނީ ރަތް ކާޑު ދައްކައިފަ އެވެ.
މަސްޓަންޓުއޯނޯ އަށް ސީދާ ރަތް ކާޑު ދެއްކީ ރެފްރީއާ ބޭއަދަބީ ބަހުން މުހާތަބު ކޮށްގެންނެވެ. މީގެ އިތުރުން ރޭގެ މެޗުގައި ރީނދޫ ކާޑު ދެއްކި އަލްވަރޯ ކަރޭރާސް އާއި ޑީއާން ހިއުސެން ވެސް ވަނީ ލީގުގައި ދެން ކުޅެން އޮތް ސެލްޓަ ވީގޯ މެޗަށް ސަސްޕެންޑް ވެފަ އެވެ.
މި ނަތީޖާއާ އެކު ލީގު ތާވަލްގެ ދެވަނައިގައި އޮތް ރެއާލާއި އެއްވަނައިގައި އޮތް ބާސެލޯނާގެ ފަރަގު ވަނީ ހަތަރު ޕޮއިންޓަށް ފުޅާ ވެފަ އެވެ. ރެއާލަށް 26 މެޗުން 60 ޕޮއިންޓް ލިބިފައި ވާއިރު، ބާސާ ވަނީ 64 ޕޮއިންޓް ހޯދައިފަ އެވެ.
އާބެލޮއާ ބުނީ އަދި އެ ޓީމަށް ލީގު ނުގެއްލޭ ކަމަށާއި ހަތަރު ޕޮއިންޓުގެ ލީޑު ރެއާލަށް އަތުލެވޭނެ ކަމަށެވެ.
"އަދި އެބަ އޮތް 36 ޕޮއިންޓް ހޯދަން، އަހަރެމެން ފަހު ވަގުތާ ހަމައަށް މަސައްކަތް ކުރާނަން. މިއީ އެންމެ ހަތަރު ޕޮއިންޓް، އަހަރެމެންނަށް އަތުލެވިދާނެ. މިއީ ރެއާލް މެޑްރިޑް،" ލީގު ހޯދުމުގެ ފުރުސަތު ނުގެއްލޭކަން ހާމަކުރަމުން އާބެލޮއާ ބުންޏެވެ.