އިންޓަ މަޔާމީގެ ކެޕްޓަން ލިއޮނަލް މެސީ އަށް މުސާރަ އާއި، ކްލަބުގެ ހިއްސާ އަދި އެހެނިހެން އިނާޔަތްތަކާ އެކު އަހަރަކު 70 މިލިއަނާއި 80 މިލިއަން ޑޮލަރާ ދެމެދުގެ އަދަދެއް ދޭކަމަށް އެ ކްލަބުގެ ކޯ-އޯނަރު ޖޯޖް މާސް ބުނެފި އެވެ.
މާސް ބުނިގޮތުގައި މެސީ ފަދަ އަގުބޮޑު ކުޅުންތެރިން ޓީމުގައި ބޭތިއްބުމަށްޓަކައި ދުނިޔޭގެ ފެންވަރުގެ ސްޕޮންސަރުން ހޯދުމަކީ ކްލަބަށް މަޖުބޫރު ކަމެކެވެ. މެސީއަށް ކުރާ ހޭދައަކީ އޭގެ ކޮންމެ ސެންޓަކަށް ބަލާލިޔަސް ބޭކާރު ހޭދައެއް ނޫން ކަމަށް ބްލޫމްބާގަށް ދިން އިންޓަވިއުއެއްގައި މާސް ބުންޏެވެ.
ކްލަބް އާމްދަނީ އިތުރުކުރުމުގެ މަސައްކަތުގެ ދަށުން މަޔާމީން ވަނީ ބްރެޒިލްގެ ފައިނޭންޝިއަލް ކުންފުންޏެއް ކަމަށްވާ "ނޫ" އާއެކު އަގުބޮޑު އެއްބަސްވުމެއްގައި ސޮއިކޮށްފަ އެވެ. އެ ކްލަބުން އަލަށް ބިނާކުރާ 26,700 މީހުންގެ ޖާގަ ސްޓޭޑިއަމްގެ ނަމަކަށް "ނޫ ސްޓޭޑިއަމް" ކިޔަން ވަނީ ހަމަޖައްސައިފަ އެވެ. މަޔާމީ އެއާޕޯޓް ކައިރީގައި ހުންނަ މި ސްޓޭޑިއަމްގައި ކުޅޭ ފުރަތަމަ މެޗު އަންނަ މަހުގެ 4 ވަނަ ދުވަހު ބޭއްވުމަށް ވަނީ ތާވަލުކުރެވިފައެވެ.
މެސީއަކީ އެމެރިކާގެ މޭޖާ ލީގު ސޮކާގައި މިހާތަނަށް ކުޅޭ އެންމެ އަގުބޮޑު ކުޅުންތެރިޔާ އެވެ. އޭނާގެ ބޭސިކް މުސާރައަކީ 12 މިލިއަން ޑޮލަރެވެ. ނަމަވެސް، އެމްއެލްއެސް ޕްލޭޔާސް އެސޯސިއޭޝަނުން ހާމަކޮށްފައިވާ މައުލޫމާތުތަކުން އެނގޭގޮތުގައި ގެރެންޓީޑް ކޮމްޕެންސޭޝަންގެ ގޮތުގައި އޭނާއަށް އަހަރަކު 20.4 މިލިއަން ޑޮލަރު ލިބެއެވެ. މީގެ އިތުރުން، އެޑިޑާސް އާއި އެޕަލް ޓީވީ ފަދަ ބޮޑެތި ކުންފުނިތަކާއެކު ވެފައިވާ ރެވެނިއު ޝެއަރިން ނުވަތަ ފައިދާ ހިއްސާކުރުމުގެ އެގްރީމަންޓްތަކުންވެސް މެސީއަށް ބޮޑު އާމްދަނީއެއް ލިބެމުންދެއެވެ.
ޕީއެސްޖީ ދޫކޮށް 2023 ގައި އިންޓަ މަޔާމީއާ ގުޅުނު މެސީ ވަނީ މިދިޔަ އޮކްޓޯބަރު މަހު އޭނާގެ ކޮންޓްރެކްޓް 2028 ވަނަ އަހަރުގެ ނިޔަލަށް އާކޮށްފައެވެ.
ކްލަބުގެ ބިޒްނަސް އޮޕަރޭޝަންސް ރައީސް ހަވިއޭ އަސެންސީ ބުނި ގޮތުގައި، މެސީ ގެނައުމަކީ ނަސީބަކުން ކުރެވުނު ކަމެއް ނޫނެވެ. އެއީ ވަރަށް ކުރިއްސުރެ ރޭވިގެން ކުރެވުނު ބުރަ މަސައްކަތުގެ ނަތީޖާ ކަމަށް އޭނާ މިފަހުން ދިން އިންޓަވިއުއެއްގައި ބުނެފައި ވެއެވެ.