ބައިނަލްއަގުވާމީ އެކުވެރިކަމުގެ މެޗުން ރާއްޖޭގެ މައްޗަށް 6-0 ތަފާތު ބޮޑު ނަތީޖާއަކުން ލެބުނާނުން ކުރި ހޯދައިފި އެވެ.
ކިރްގިސްތާނުގައި ކުޅުނު މެޗު ފެށިގެން ތިންވަނަ މިނެޓުގައި ލުބުނާނުގެ ހުސައިން ޝަކްރޫން ވަނީ ލަނޑެއް ޖަހައި ލީޑް ނަގައި ދީފަ އެވެ.
ރާއްޖޭގެ ކުޅުމުގެ ރޭވުމަށް ބޮޑު ލޮޅުމެއް އަައީ 11 ވަނަ މިނެޓުގައި ޑިފެންޑަރު ކެޕްޓަން އަލީ ސަމޫހު (ސަމުއްޓޭ)، ދިވެހި ޓީމުގެ އޭރިއާ ކައިރިން ކުރި ފައުލަކާ ގުޅިގެން ސީދާ ރަތް ކާޑެއް ދައްކައި ދަނޑުން ފޮނުވާލުމުންނެވެ. މެޗުގެ ބޮޑު ބައި ރާއްޖޭން ކުޅެނީ ދިފާއީ ގޭމަށް އިސްކަންދީގެންނެވެ. ލުބުނާނަުން ވަނީ ލިބުނު ހުސްޖާގަތަކުގެ ބޭނުން ހިފައި، ނުރައްކާތެރި ހަމަލާތަކެއް ފޮނުވާލައިފަ އެވެ.
މެޗުގެ 36 ވަނަ މިނެޓާއި 42 ވަނަ މިނެޓުގައި ޖެހި ލަނޑުތަކާ އެކު ޝަކްރޫން، ފުރަތަމަ ހާފު ނިންމާލީ ހެޓްރިކް ހަދައިގެންނެވެ.
ދެވަނަ ހާފު ފެށިގެން ހަތް ވަނަ މިނެޓުގައި ރާއްޖޭގެ އަހުމަދު މައިޝް ރަޝީދު އަތުން ބައިކޮޅަށް ލަނޑެއް ވަދެ، ނަތީޖާ 4-0 އަށް ބަދަލުވެގެން ދިޔަ އެވެ.
ޓީމުން ބަދަލުތަކެއް ގެނެސް، އަމިއްލަ ހާފަށް ވުރެ ކުރިއަށް ނުކުމެ ކުޅެން މަސައްކަތް ކުރި އެވެ. ނަމަވެސް ލުބުނާނުން ވަނީ މެޗުގެ ކޮންޓްރޯލް މުޅިން އަަތުލާފައެވެ.
ލެބަނަންއިން މެޗުގެ ނަތީޖާ އިތުރަށް ފުޅާކުރީ 83 ވަނަ މިނެޓުގައި އަލީ ގައްސާސް ޖެހި ދެ ލަނޑާ އެކު އެވެ.
މި މެޗާ އެކު މިފަހަރުގެ އިންޓަނޭޝަނަލް ބްރޭކު ރާއްޖެ އަށް ނިމުނީ އެވެ. ލުބުނާންގެ އިތުރުން ޗައިނާ އާއި ކިރްގިސްތާނާ ދެކޮޅަށް ރާއްޖޭން ކުޅުނެވެ. ތިން މެޗުން ރާއްޖެ ކޮޅަށް 14 ލަނޑު ވަނެވެ. އެންމެ ލަނޑެއް ނުޖެހުނު ތާންގައި، އެކަށީގެންވާ ވަރުގެ ހަމަލާތަކެއް ވެސް އެ ތިން މެޗުގައި ދިވެހި ޓީމަކަށް ނުއުފެއްދުނެވެ.