ރިހި މެޑަލް ހިފައިގެން ނަބީހާ އާއި ނަބާހާ.-- ފޮޓޯ: ބީއޭއެމް
08 ޑިސެމްބަރ 2017 - 19:50
2 comments
އިންޑިއާގެ ގުވަހާޓީގައި މިއަދު ނިމުނު ދެކުނު އޭޝިއާގެ 21 އަހަރުން ދަށުގެ ބެޑްމިންޓަން މުބާރާތުގެ ވިމެން ޑަބަލްސް އިވެންޓައި ރާއްޖޭގެ ދެބެން ކަމަށްވާ ފާތިމަތު ނަބާހާ އާއި އައިމިނަތު ނަބީހާ ރިހި މެޑަލް ހޯދައިފި އެވެ. މިއީ ސަރަހައްދީ ފެންވަރުގައި އޯޕަން އިވެންޓަކުން ބެޑްމިންޓަނުގައި ރާއްޖެ އަށް ލިބުނު ފުރަތަމަ މެޑެއްޔެވެ.
މީގެ ކުރިން ގައުމީ ބެޑްމިންޓަން ޓީމުން ވަނީ 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގެ ޓީމު އިވެންޓުގެ ފިރިހެން ބައިން ރިހި މެޑަލް ހޯދައިފަ އެވެ.
މިއަދު ކުޅުނު ފައިނަލް މެޗުން ނަބީހާ އާއި ނަބާހާގެ ޕެއާ ބަލިވީ އިންޑިއާގެ ޕެއާއެއް ކަމަށްވާ އަޝްމިތާ އާއި މިތުލާގެ ޕެއާއާ ވާދަކޮށެވެ. މި މެޗުގެ ސެޓުތައް ދިޔައީ 21-07 އަދި 21-10 އިންނެވެ.
ނަބީހާ ވަނީ ދާދި ފަހުން ނިމުނު ބެޑްމިންޓަން ގައުމީ މުބާރާތުގެ ފުރަތަމަ ޑިވިޝަނުގެ ފައިނަލުގައި އެ މުބަރާތުގެ އެންމެ ފަހުގެ ޗެމްޕިއަން މައިސާ ފަތުހުﷲ ބަލިކުރުމަށް ފަހު މުބާރާތުގެ ޗެމްޕިއަންކަން ހޯދައިފަ އެވެ. އަދި ނަބާހާ އާއި ޒަޔާން ޒަކީގެ ޕެއާ އިން ވަނީ މިކްސް ޑަބަލްސް އިވެންޓުގެ ޗެމްޕިއަންކަން ހޯދައިފަ އެވެ.
ނަބާހާ އާއި ނަބީހާ ދަނީ ޖަޕާންގެ ޓޯކިޔޯގައި 2020 ވަަނަ އަހަރު އޮންނަ އޮލިމްޕިކްސް އަށް ކޮލިފައިވުމަށް ކުރިއަށްގެންދާ ތަމްރީންތަކުގައި ބައިވެރިވަމުންނެވެ. މި މުއްދަތުގެ ތެރޭގައި މި ދެ ކުޅުންތެރިންނަށް ބައިނަލްއަގްވާމީ ގިނަ މުބާރާތްތަކުން ފުރުސަތު ހޯދައިދިނުމަށް ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން އަންނަނީ މަސައްކަތް ކުރަމުންނެވެ.
މި މުބާރާތުގައި ރާއްޖެ އަށް އެންމެ ރަނގަޅު ކާމިޔާބެއް ލިބުނީ މިކްސް ޑަބަލްސް، އަންހެން ސިންގަލްސް އަދި ފިރިހެން ޑަބަލްސް އިވެންޓުންނެވެ. މިކްސް ޑަބަލްސް އިވެންޓުން ރާއްޖޭގެ މުހައްމަދު އަރްސަލާން އަލީ އާއި ނަބީހާގެ ޕެއާވަނީ މުބާރާތުގެ ސެމީ ފައިނަލުން ޖާގަ ހޯދައިފަ އެވެ. އަދި އަންހެން ސިންގަލްސް އިވެންޓުގައި ރާއްޖޭގެ ނަފްހާ ނަސްރުﷲ ވެސް ސެމީގައި ކުޅުނުއިރު، ފިރިހެން ޑަބަލްސް އިވެންޓުގައި ރާއްޖޭގެ ޝައުލާން ފަތުހީ އާއި މުހައްމަދު އާކިފް ވެސް ސެމީގައި ކުޅުނެވެ.
މިއީ ފަހަކަށް އައިސް ސަރަހައްދީ ފެންވަރުގެ މުބާރާތަކުން ބެޑްމިންޓަނަށް ލިބުނު އެންމެ ރަނގަޅު ކާމިޔާބީ އެވެ. ޖުމްލަ ގޮތެއްގައި މި މުބާރާތުގައި ވާދަކުރި ހުރިހާ ކުޅުންތެރިންގެ ފަރާތުން ކުރިއެރުން ފެނުނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޯމުންނި
09 December 2017
މިހާރު މައިސާ އާއި ނިބާލް މުޅިންވެސް ފެންނަނީ އެކުވެނި ބޭރު ގޮޑިން. މައިސާ އާއި ދެން ތިބި ކުޅުން ތެރިން ހަމަކޮށް ކުރިއަށް އެރިތަން މިފެނުނީ. އެއޮށް ގިނަފުރުސަތު ދީފަ އޮށްވާ...
ޙަސަން
08 December 2017
އިންޑިއަން އޯޝަން އައިލެންޑް ގޭމްސްގައި އެންމެ ފުރަތަމަ ރާއްޖެއިން ބައިވެރިވި ފަހަރު ފިރިހެން ޑަބަލްސްއިން ރާއްޖެއަށް ރިހި މެޑެލް ލިބުނު. ހަނދާންވާ ގޮތުގައި އެއީ 1979 ވަނަ އަހަރު. އެއަހަރު ރާއްޖެއިން ދިޔަ ފުޓްބޯޅަ ޓީމުގެ ކެޕްޓަނަކީ ހަނދާންވާ ގޮތުގައި މިނިސްޓްރީ އޮފް އެޑިޔުކޭޝަނުގެ ސީނިއަރ ޕޮލިސީ އެގްޒެކެޓިވްގެ މަގާމުގައި މިހާރު ހުންނެވި އިބްރާހީމް އިސްމާޢީލް. އޭނާ ކުރެން އަހާލުމުން އެ މަޢުލޫމާތު އޮޅުންފިލާނެ.