މިދިޔަ 13 އަހަރު ގައުމީ ޓޭބަލް ޓެނިސް މުބާރާތުގެ އަންހެން ސިންގަލްސް ޗެމްޕިއަންކަން ހޯދި ތަޖުރިބާކާރު ކުޅުންތެރިޔާ މުއީނާ މުހައްމަދުގެ މައްޗަށް 4-2 ސެޓުން ކުރި ހޯދައި ގައުމީ ސިންގަލްސް ޗެމްޕިއަންކަން އުމުރުން 13 އަހަރުގެ އުއްމީދީ ކުޅުންތެރިޔާ އައިޝަތު ރަފާ ނާޒިމާ މިރޭ ހޯދައި ތާރީހުގެ ތެރެއަށް ވަދެއްޖެ އެވެ.
މިދިޔަ އަހަރުގެ ފައިނަލުން މުއީނާ އަތުން ހަނިގޮތަކަށް ބަލިވި ރަފާ މިރޭ މި ހޯދީ ތާރީހީ ކާމިޔާބާ އެކު، އޭނާ ވެފައިވަނީ ރާއްޖޭގެ ގައުމީ މުބާރާތެއްގެ ޗެމްޕިއަންކަން ހޯދި އެންމެ އުމުރުން ހަގު އެއް ކުޅުންތެރިޔާ އަށެވެ. ޅަ އުމުރެއްގައި، ބޮޑު ވާދަވެރި ފައިނަލެއްގައި ރާއްޖޭގައި އުފެދުނު އެންމެ މޮޅު ކުޅުންތެރިޔާ ބަލިކޮށް ރަފާ މިރޭ މި ކާމިޔާބީއާ އެކު އޭނާ އަށް ގިނަ ބަޔެއްގެ ތައުރީފު އަންނަނީ އޮހެމުންނެވެ. މުބާރާތުގެ ޑަބަލްސް ޗެމްޕިއަނަކީ ވެސް ރަފާ އެވެ. އޭނާ އާއި ލައިސާ ފަތުހުﷲގެ ޕެއާ ޑަބަލްސް ތަށި ހޯދީ މުއީނާ އާއި އައިމިނަތު ޝިއުރާ ޝަރީފުގެ މައްޗަށް ކުރި ހޯދުމަށް ފަހު އެވެ.
މިދިޔަ އަހަރުގެ އިންޑިއަން އޯޝަން އައިލެންޑް ގޭމްސްގައި ވާދަކުރި ގައުމީ ސްކޮޑުގައި ހިމެނި، ވިދަން ފެށި ރަފާ ވަނީ މި އަހަރުގެ ސައުތު އޭޝިއަން ޖޫނިއާ ޓޭބަލް ޓެނިސް ޗެމްޕިއަންޝިޕުގެ 15 އަހަރުން ދަށުގެ ޑަބަލްސް ކެޓަގަރީން ރާއްޖެ އަށް ރިހި މެޑަލް ވެސް ހޯދައިދީފަ އެވެ.
އިންޑިއަން އޯޝަން އައިލެންޑް ގޭމްސް އިން ރިހި މެޑަލް ހޯދާފައިވާ މުއީނާ ވަނީ މީގެ ކުރިން ގައުމީ ޗެމްޕިއަންކަން 15 ފަހަރު ހޯދައިފަ އެވެ. އެންމެ ފުރަތަމަ 2000 ވަނަ އަހަރާއި 2001 ވަނަ އަހަރު ހޯދިއިރު 2002 ވަނަ އަހަރު ތަށި މިލްކުކުރުމުގެ ފުރުސަތެއް ނުލިބުނެވެ. އެކަމަކު 2003 ވަނަ އަހަރު ޗެމްޕިއަންކަން ހޯދި ގޮތަށް މިރެއާ ހަމަޔަށް އޭނާ ނޫން ކުޅުންތެރިޔަކަށް ގައުމީ ތަށީގައި އަތްލެވިފައެއް ނުވެ އެވެ.
"ވަރަށް ގިނަ ކުޅުންތެރިންނަށް ނުވެފައި އޮތް ކަމެއް ރަފާ މިރޭ އެ ހާސިލްކުރީ. މުއީނާ ސީދާ ބަލިކުރަން ވަރަށް ގިނަ ކުޅުންތެރިން ޓްރެއިނިން ހަދައިގެން ވެސް ނުކުތް. އެކަމަކު މިރެއާ ހަމަޔަށް އެއީ ނުވެފައި އޮތް ކަމެއް،" އިންޑިއަން އޯޝަން އައިލެންޑް ގޭމްސްގައި ގައުމީ ޓީމަށް ކޯޗުކޮށްދީފައިވާ ކުރީގެ މަޝްހޫރު ކުޅުންތެރިޔާ ހުސެއިން ރަޝީދު ބުންޏެވެ.
އޭނާ ބުނީ މިއީ ރަފާ އަށް ހައްގު ކާމިޔާބެއް ކަމަށާއި އޭނާ އަކީ ވަރަށް ހުނަރުވެރި ކުޅުންތެރިއެއް ކަމަށެވެ. އަދި މި ކާމިޔާބީއާ އެކު ރަފާ ދެން ވިސްނަންވީ ބައިނަލްއަގްވާމީ މައިދާނުގައި ރަނގަޅު ކާމިޔާބެއް ހޯދަން ކަމަށާއި އެކަން އޭނާ އަށް ކުރެވޭނެ ކަމަށް ވެސް ހުސެއިން ބުންޏެވެ.
"ވަރަށް ޒުވާން ކުޅުންތެރިއެއް ރަފާ އަކީ. ވަރަށް ގިނަ ފުރުސަތުތައް އަދި ލިބޭނެ. އޭނާގެ އެބަހުރި އެ ފުރުސަތުތަކުގެ ބޭނުން ހިފައި ރާއްޖެ އަށް ބޮޑު ކާމިޔާބެއް ހޯދައިދެވޭނެ ގާބިލްކަން،" އޮލިމްޕިކް ކޮމިޓީގެ ހަޒާންދާރުގެ މަގާމް ވެސް އަދާކުރާ ހުސެއިން ބުންޏެވެ.
މިރޭގެ މެޗުގެ ފުރަތަމަ ސެޓު މުއީނާ ވަނީ 11-8 އިން ކާމިޔާބުކޮށްފަ އެވެ. އެކަމަކު ރަފާ ވަނީ ޖެހިގެން އައި ސެޓު ބޮޑު ތަފާތަކުން 11-1 އިން ކާމިޔާބުކޮށް އިތުބާރު ހޯދައިފަ އެވެ. ޖެހިގެން އައި ސެޓުގައި މުއީނާ ރަނގަޅު ފައިޓެއް ދިން ނަމަވެސް ރަފާ ވަނީ 11-9 އިން އެ ސެޓު ކާމިޔާބުކޮށް ލީޑު ނަގައިފަ އެވެ. މުއީނާ އުއްމީދު އާކުރީ ހަތަރު ވަނަ ސެޓު 13-11 އިން ކާމިޔާބުކޮށްގެންނެވެ.
ޒުވާނުންގެ މަރުކަޒުގެ އިންޑޯ ޓީޓީ ހޯލުގައި ކުޅުނު މެޗުގައި ރަފާ އަލުން ލީޑު ނެގީ ފަސް ވަނަ ސެޓު 11-6 އިން ކާމިޔާބުކޮށްގެންނެވެ. ހަ ވަނަ ސެޓު ފަށައިގެން ރަފާ ބޮޑު ލީޑެއް ނެގި ނަމަވެސް މުއީނާ ތަޖުރިބާގެ ބޭނުން ހިފައި ތަފާތު ކުޑަކުރި އެވެ. އެ ސެޓު މުއީނާ ކާމިޔާބުކޮށް ނަތީޖާ ނެރެން އިތުރު ސެޓަކަށް ދާން ޖެހިދާނެ ކަމަށް ބެލެވުނު ނަމަވެސް ރަފާ ވަނީ 11-9 އިން ސެޓު ކާމިޔާބުކޮށް، ޗެމްޕިއަންކަން ހޯދައި ތާރީހުން ޖާގަ ހޯދައިފަ އެވެ.