ފައިސަލް ވެލެންސިއާ އަަށް، ޖަޒްލާން ދަ ގްރާންޑޭ އަށް

ޓްރާންސްފާ މާކެޓްގެ މުއްދަތު އިތުރުކޮށްދިން ވަގުތުގެ ތެރޭގައި ކްލަބް ވެލެންސިއާ އިން ގައުމީ ޓީމުގެ ގޯލްކީޕަރު މުހައްމަދު ފައިސަލް ސޮއިހޯދިއިރު، ދަ ގްރާންޑޭ އިން މުހައްމަދު ޖަޒްލާން (ބަބޭ) ގެންގޮސްފި އެވެ.

މިދިޔަ ސީޒަނުގައި ދަ ގްރާންޑޭގެ ގޯލު ބެލެހެއްޓީ ފައިސަލް އެވެ. އެހެން ނަމަވެސް ދަ ގްރާންޑޭގެ ޕްރީ ސީޒަން ޕްރެކްޓިހުގައި މިހާތަނަށް ފައިސަލް ބައިވެރިއެއްނުވެ އެވެ. ޓްރާންސްފާ މާކެޓްގެ މުއްދަތު މިިދިޔަ މަހުގެ ނިޔަލަށް އެންމެ ފުރަތަމަ ހަމަވި ނަމަވެސް ފަހުން ވަނީ ކްލަބްތަކުން ގިނަ ކަންތައްތައް ފުރިހަމަނުވެ ހުރުމުން މި މަހުގެ ފަސް ވަނަ ދުވަހުގެ ނިޔަލަށް އިތުރު ކޮށްދީފަ އެވެ. އެ ވަގުތުގެ ބޭނުންހިފައި ވެލެންސިއާ އިން ފައިސަލްގެ ސޮއި ހޯދީ އެވެ.

ފައިސަލް ވެލެންސިއާ އަށް ބަދަލުވުމާ އެކު ދަ ގްރާންޑޭ އިން އޭނާ ނެތްތަނަށް ގެނައި ބަބޭ އަކީ މިދިޔަ ސީޒަނުގައި ދެ ވަނަ ޑިވިޝަނުން ވެލެންސިއާ ފުރަތަމަ ޑިވިޝަނަށް ޕްރޮމޯޓްކޮށްދިނުމުގައި މުހިއްމު ދައުރެއް އަދާކުރި ކީޕަރެވެ. ވެލެންސިއާ އިން ދެ ވަނަ ޑިވިޝަނުގެ ތަށި އުފުލާލިއިރު މުބާރާތުގެ މޮޅު ކީޕަރުގެ މަގާމު ހޯދީ ބަބޭ އެވެ.

ދަ ގްރާންޑޭގެ ދެ ވަނަ ކީޕަރު އިޔާން އަބްދުލް އަލީމް (ޗިކީ) އަށް ވަނީ ޕްރީ ސީޒަން މެޗެއްގެ ތެރެއިން ސީރިއަސް އަނިޔާއެއް ވެފަ އެވެ.

އޯލްޔޫތުލިންކްއޭޖް (އޭވައިއެލް) އިން ކެރިއަރު ފެށި ފައިސަލް ވަނީ ފަހުން ވިކްޓަރީ އަށް ވެސް ކުޅެފަ އެވެ. އަދި ވެލެންސިއާގެ އިތުރުން އީގަލްސްގެ ގޯލުން ވެސް ފެނުނު ފައިސަލް ނިއު ރޭޑިއަންޓަށް ބަދަލުވީ 2017 ވަނަ އަހަރުގެ ސީޒަންގެ މެދުތެރެއިން އެ ފަހަރު ވެލެންސިއާ އަށް ދިވެހި ޕްރިމިއާ ލީގުން ފުރުސަތު ނުލިބުމުންނެވެ. މިދިޔަ ސީޒަނުގައި ދަ ގްރާންޑޭގެ ގޯލުގައި ރަނގަޅު ކުޅުމެއް ދެއްކި ފައިސަލް އަކީ 2018 ވަނަ އަހަރުގެ ސާފް ސުޒުކީ ކަޕް ރާއްޖޭން ކާމިޔާބުކުރިއިރު މުބާރާތުގެ މޮޅު ކުޅުންތެރިޔާ އެވެ.

ފުރަތަމަ ޑިވިޝަނުގައި ބަބޭ އެންމެ ފަހުން ފެނުނީ ކްލަބް ގްރީން ސްޓްރީޓްސް އިންނެވެ. އުފަން ރަށް މަހިބަދޫ ސްޕޯޓްސް ކްލަބަށް ވެސް ފުރަތަމަ ޑިވިޝަނުގައި ކުޅުނު ބަބޭ އަކީ ޒުވާން ގައުމީ ޓީމުތަކުގައި ރަނގަޅު ކުޅުމެއް ދެއްކި ކީޕަރެކެވެ. އެ ގޮތުން އޭނާ އަކީ 2012 ވަނަ އަހަރު ސްރީލަންކާގައި އޮތް މަހިންދުރަ ރާޖަޕަކްސަ މުބާރާތް ކާމިޔާބުކުރި ރާއްޖޭގެ 23 އަހަރުން ދަށުގެ ޓީމުގައި ހިމެނުނު މުހިއްމު ކުޅުންތެރިއެކެވެ. އަދި އޭނާ ވަނީ 2016 ވަނަ އަހަރު އިންޑިއާގައި އޮތް ސައުތު އޭޝިއަން ގޭމްސްގެ ފުޓްބޯޅަ އިވެންޓުގައި ރާއްޖޭގެ ގޯލު ބަލަހައްޓައިފަ އެވެ.

ބިދޭސީ ގޯލްކީޕަރުން ރާއްޖޭގެ ޓީމުތަކަށް ނުގެނެވޭ ގޮތަށް ނިންމާފައިވާ ނިންމުން ކްލަބްތަކުން ބޭނުންވެގެން ބަދަލުކޮށް ކުރިއަށް އޮތް ސީޒަނުގައި ބިދޭސީ ކީޕަރުން ބޭނުންކުރެވޭ ގޮތަށް ވަގުތީ ހުއްދައެއް އެފްއޭއެމުން ވަނީ ދީފަ އެވެ. ފުރަތަަމަ ޑިވިޝަނުގެ އަށް ޓީމުގެ ތެރެއިން ފަސް ޓީމެއް ވަނީ ބިދޭސީ ކީޕަރުން ގެނެސްފަ އެވެ.