މަޝްހޫރު ވިޔަފާރިވެރިޔާ މުހައްމަދު މޫސާ (އުއްޗު) ގެ ހާއްސަ ދައުވަތަކަށް، އޭނާގެ ކުރެއްދޫ އައިލެންޑް ރިސޯޓުގައި މިއަދު ހަވީރު ރާއްޖޭގެ ގައުމީ ފުޓުބޯޅަ ޓީމު ކުޅުނު 1.2 މިލިއަން ރުފިޔާގެ އަގުބޮޑު މެޗް ގައުމީ ޓީމު ކާމިޔާބު ކޮށްފި އެވެ.
ގައުމީ ޓީމު މިމެޗް ކާމިޔާބުކުރީ ފަސޭހަ ކަމާއެކު 7-1 ގެ ނަތީޖާއަކުންނެވެ.
ރިސޯޓު ޓީމާއެކު ރަހުމަތްތެރިކަމުގެ މެޗެއް ކުޅެން ގައުމީ ޓީމު ކުރެއްދު އަށް ފުރީ މިއަދު ހެނދުނުގެ ވަގުތެއްގަ އެވެ. މެޗުން މޮޅުވާ ޓީމަކަށް އުއްޗުގެ އިތުރުން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާއި ދިރާގު އަދި ވިލާ ޓްރެވަލްސްއިން ފައިސާގެ އިނާމެއް ހުށަހެޅި އެވެ. މީގެ އިތުރުން ލިޓަސް އާއި ސަން ފްރަންޓުން ވެސް އަގުހުރި އިނާމުތައް ހުށަހަޅައިފައި ވެއެވެ.
މި މެޗުގައި އަލީ އަޝްފާގު (ދަގަނޑޭ) ގައުމީ ޓީމަށް ތިން ލަނޑު ޖަހައި ހެޓްރިކް ހެދިއިރު އަސަދުﷲ އަބްދުﷲ (އަސަކޮ) ވަނީ ދެ ލަނޑު ޖަހައިފަ އެވެ. އަދި މުހައްމަދު އުމެއިރާއި އަލީ ފާސިރު (ސެންޓޭ) ވެސް ވަނީ މި މެޗުގައި ލަނޑު ޖަހައިފަ އެވެ.
ކުރެއްދޫން ޖެހި ހަމައެކަނި ލަނޑު އެ ޓީމަށް ކާމިޔާބު ކޮށްދިނީ ކެޕްޓަން ގުރެއިޝް އަބްދުލް ރައްޒާގެވެ. ގުރެއިޝް އަކީ މީގެ ކުރިން މާޒިޔާގެ ޒުވާން ޓީމާއެކު އެފްއޭއެމް ޔޫތު ޗެމްޕިއަންޝިޕް ކާމިޔާބު ކޮށް، މާޒިޔާގެ ސީނިއާ ޓީމަށް ވެސް ކުޅުނު މިޑްފީލްޑަރެކެވެ. މީގެ އިތުރުން ރާއްޖޭގެ ޒުވާން ގައުމީ ޓީމަށް ވެސް ކުޅެފައިވާ ގުރެއިޝް އަކީ 2012 ވަނަ އަހަރު އެފްއޭއެމް އެވޯޑް ނައިޓް ގައި ހޮވި 19 އަހަރުން ދަށުގެ އެންމެ މޮޅު ކުޅުންތެރިޔާ އެވެ.
ގައުމީ ޓީމު މެޗުން މޮޅުވުމުން އުއްޗު ވަނީ ފަސް ލައްކަ ރުފިޔާގެ ފައިސާގެ އިނާމެއް ދެއްވައިފަ އެވެ. އަދި އެސްޓީއޯ އިން ވެސް ފަސް ލައްކަ ރުފިޔާގެ ފައިސާގެ އިނާމެއް ދިނެވެ. ދިރާގު އަދި ވިލާ ޓްރެވަލްސް އިން ކޮންމެ ކުންފުންޏަކުން ވަނީ ގައުމީ ޓީމަށް އެއް ލައްކަ ރުފިޔާ ދީފަ އެވެ.
ލިޓަސް އިން ހުށަހެޅި ސައިކަލު ލިބުނީ މެޗުގެ މޮޅު ކުޅުންތެރިއަކަށް ހޮވުނު ދަގަނޑޭއަށެވެ. ސަން ފްރަންޓުން ހުށަހެޅި ބެޓެރީ ސައިކަލު ކުރެއްދޫގެ ކެޕްޓަން ގުރެއިޝް އަށް ލިބުނުއިރު، ސަންފްރަންޓުން ހުށަހެޅި ބެޓެރީ ބައިސްކަލު ލިބުނީ ކުރެއްދޫ ޓީމުގެ ކޯޗު މުހައްމަދު އަބްދުލް ޣަނީއަށެވެ.
މިއީ ރާއްޖޭގެ ފުޓުބޯޅައިގެ ތާރީހުގައި ވެސް ކުޅުނު އެންމެ އަގުބޮޑު މެޗެވެ. ރާއްޖޭގެ ދިވެހި ޕްރިމިއާ ލީގުގައި ވެސް އެއް މިލިއަން ރުފިޔާގެ ފައިސާގެ އިނާމު ގަދަ ހަ ޓީމަށް ބަހައިލާއިރު، ސީޒަން ހުޅުވަން ކުޅޭ ޗެރިޓީ ޝީލްޑް މެޗުގެ ފައިސާގެ އިނާމުގެ އަގަކީ އެއް ލައްކަ ރުފިޔާ އެވެ.
މި މެޗުގެ ކުރިން ގައުމީ ޓީމު ވަނީ ޒުވާނުންގެ ދުވަހާ ގުޅުވައިގެން، ހދ. ކުޅުދުއްފުށީ ޒިގްޒެގް ސްޓޭޑިއަމް ހުޅުވަން އެރަށުގައި ވެސް ރަށުން ހޮވާލެވުނު ޓީމަކާ އެކު ރަހުމަތްތެރިކަމުގެ މެޗެއް ކުޅެފަ އެވެ.
ގައުމީ ޓީމަށް ދެން އެންމެ އަވަހަށް އޮތީ ނޮވެމްބަރު މަހު ސްރީ ލަންކާގައި، ޕްރައިމް މިނިސްޓަރު މަހިންދަ ރާޖަޕަކްސަ ޓްރޮފީގެ ނަމުގައި ބާއްވާ ހަތަރު ގައުމު ވާދަކުރާ ރަހުމަތްތެރިކަމުގެ އިންވިޓޭޝަނަލް މުބާރާތެކެވެ. މި މުބާރާތުގައި ރާއްޖެ އާއި ލަންކާގެ އިތުރުން ދެން ހިމެނެނީ ބަންގްލަދޭޝް އާއި ސީޝެލްސް އެވެ. މުބާރާތަށް ތައްޔާރު ވާން ގައުމީ ޓީމުގެ އާ ކޯޗު، އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު މިޑްފީލްޑަރު ފްރެންޗެސްކޯ މޮރިއޭރޯގެ ބެލުމުގެ ދަށުން މިދިޔަ ހޯމަ ދުވަހުގެ ރޭ ވަނީ ޓީމުގެ ފަރިތަކުރުންތައް ފަށައިފަ އެވެ.
