ސްނެޕްޗެޓުން ކޮންމެ ދުވަހަކު މިލިއަން ޑޮލަރު ހޯދުމުގެ ފުރުސަތު

އާދަޔާހިލާފު މޮޅު ކުރު ވީޑިއޯކޮޅު ތައްޔާރުކުރެވޭ ގޮތަށް ސްނެޕްޗެޓުން "ސްޕޮޓްލައިޓް" ގެ ނަމުގައި އާ ފީޗާއެއް ތައާރަފުކޮށް އޭގެ އެހީގައި ކޮންމެ ދުވަހަކު މިލިއަން ޑޮލަރު ހޯދުމުގެ ފުރުސަތު ހުޅުވާލައިފި އެވެ.

"ސްޕޮޓްލައިޓް" މި ވަގުތު ތައާރަފުކޮށްފައި ވަނީ އެމެރިކާ އާއި އާއި ކެނެޑާ އާއި އޮސްޓްރޭލިއާ އާއި ނިއު ޒީލެންޑާއި އިނގިރޭސިވިލާތާއި އަޔަލެންޑާއި ނޯވޭ އާއި ސްވިޑްން އާއި ޑެންމާކާއި ޖަރުމަނާއި ފްރާސަށެވެ. އެކަމަކު ވަރަށް އަވަހަށް އިތުރު ސަރަހައްދުތަކަށް ވެސް އެ ފީޗާ ތައާރަފުކުރާނެ އެވެ.

"ސްޕޮޓްލައިޓް" ގެ މައިގަނޑު ބޭނުމަކީ ގިނަ ބަޔަކު ޝައުގުވެރިވާ ޒާތުގެ ތަފާތު އަދި މޮޅެތި ވީޑިއޯތައް ކްރިއޭޓަރުން ލައްވައި ހަދައި، އެ ޕްލެޓްފޯމްގެ ކޮންޓެންޓް ވަރުގަދަކުރުމެވެ. އެގޮތުން ތައްޔާރުކުރާ ވީޑިއޯތައް ސީދާ "ސްޕޮޓްލައިޓް" އަށް ނުވަތަ ސްނެޕްޗެޓްގެ "އަވާ ސްޓޯރީ" އަށް ޕޯސްޓްކުރެވޭނެ އެވެ. އަދި އެ ވީޑިއޯތައް ވާން ޖެހޭނީ 13 އަހަރުން މަތީގެ މީހުންނަށް ހާއްސަ އުފެއްދުންތަކަށެވެ. ވީޑިއޯ ތައްޔާރުކުރަން ޖެހޭނީ 60 ސިކުންތު ނުވަތަ އެއް މިނިޓަށް ވުރެ ދިގު ނުވާ ގޮތަށް ވާޓިކަލްކޮށެވެ.

އަލަށް ހުޅުވާލި ފުރުސަތާ އެކު ކޮންމެ ދުވަހަކު ވެސް އެންމެ މޮޅު ވީޑިއޯއެއް އުފައްދާ ކްރިއޭޓަރަކަށް 1،000،000 ޑޮލަރު ހޯދުމުގެ ފުރުސަތު އޮންނާނެ އެވެ. އެކަމަކު އެއީ 16 އަހަރުން މަތީގެ މީހަކަށް ވާންޖެހޭނެ އެވެ. ސްނެޕްޗެޓުން ބުނި ގޮތުގައި މި ފުރުސަތު "ސްޕޮޓްލައިޓް" މިހާރު ލިބޭ ހުރިހާ ސަރަހައްދުތަކުގެ މީހުންނަށް ހިފޭނެ އެވެ.

މޮޅު ވީޑިއޯކޮޅުތައް ތައްޔާރުކޮށްގެން ކޮންމެ ދުވަހަކު މިލިއަން ޑޮލަރު ހޯދޭ ފުރުސަތު މި އަހަރު ނިމެންދެން ސްނެޕްޗެޓުން ކުރިއަށް ގެންދާނެ އެވެ. ކޮންމެ ދުވަހަކު ވެސް އިނާމު ލިބޭ ވީޑިއޯ ހޮވާނީ އެކަމަށް ހާއްސަ ގައިޑްލައިންތަކަށް ބަލައި، އެ ވީޑިއޯއަކަށް ލިބޭ މަގުބޫލު ކަމަށް ވެސް ބަލައިފަ އެވެ. އެގޮތުން ވީޑިއޯތައް ވަޒަންކުރުމުގައި ސްނެޕްޗެޓްގެ އެލޮގްރިދަމް ބޭނުންކުރާނެ އެވެ. ސްނެޕްޗެޓުން ބުނި ގޮތުގައި "ސްޕޮޓްލައިޓް" އާ އެކު އެ ޕްލެޓްފޯމަށް ކޮންމެ ދުވަހަކު އަންނަ ވީޑިއޯތަކުގެ އަދަދު ހަތަރު މިލިއަނަށް އަރާނެ ކަމަށް އުންމީދުކުރެވެ އެވެ.

ޗައިނާގެ ބައިޓްޑާންސުން ހިންގާ ޓިކްޓޮކުން ވެސް ވަނީ އުފެއްދުންތެރި މޮޅެތި ކޮންޓެންޓް ތައްޔާރުކުރާ މީހުންނަށް ފައިސާގެ އިނާމު ދޭން ނިންމައިފަ އެވެ.