ވައިޓް ހައުސް ކައިރީ ސިފައިންގެ ބަޔަކަށް ބަޑިން ހަމަލާދިން އަފްޣާން މީހާ އަކީ ކުރިން ސީއައިއޭގެ އެޖެންޓެއް

އެމެރިކާގެ ރިޔާސީ ގަނޑުވަރު، ވައިޓް ހައުސްއާ ކައިރި ހިސާބެއްގައި ނެޝަނަލް ގާޑްގެ ދެމީހަކަށް ހަމަލާދީ ޒަހަމްކޮށްލި މީހާ އަކީ އެމެރިކާއިން އަފްޣާނިސްތާން ހިފާފައި އޮތް އިރު އެމެރިކާގެ ސެންޓްރަލް އިންޓެލިޖެންސް އެޖެންސީ (ސީއައިއޭ) އަށް މަސައްކަތްކުރި މީހެއް ކަމަށް އެމެރިކާގެ އިދާރާތަކުން ބުނެފި އެވެ.

ވައިޓް ހައުސްގެ ކައިރީގައި ބަޑިން ހަމަލާދީ އެގައުމުގެ ނެޝަނަލް ގާޑްގެ ދެމީހުން ކަމަށްވާ ސާރާ ބެކްސްޓްރޮމް، 20، އާއި އެންޑްރޫ ވޮލްފް، 24، އަށް ހަމަލާދިނީ އަފްޣާނިސްތާނުން އެމެރިކާއަށް ވަަރަށް ފަހުން ހިޖުރަކުރި، ރަހްމާނުﷲ ލަކަންވާލް ނަމަކަށް ކިޔާ މީހެކެވެ. އޭނާގެ ހަމަލާގައި ޒަހަމްވި ދެމީހުންގެ ތެރެއިން ސާރާ ބެކްސްޓްރޮމް މިހާރު ވަނީ ޒަހަމްތަކުގެ ސަބަބުން މަރުވެފަ އެވެ.

އެމެރިކާގެ އިދާރާތަކުން މިހާރު އާއްމުކޮށްފައިވާ މައުލޫމާތުން އެނގޭ ގޮތުގައި ލަކަންވާލް އެމެރިކާއަށް ހިޖުރަކުރީ އަފްޣާނިސްތާނުގެ ވެރިރަށް ކާބުލް އަށް ތާލިބާނުން ވަނުމުން، އެމެރިކާ ސިފައިން ފައިބައިގެން ދިޔަ އިރު ހާއްސަ ހުއްދައެއްގެ ދަށުން ގެންދިޔަ މީހުންގެ ތެރޭގައި ހިމެނިގެން 2021 ވަނަ އަހަރު އެވެ.

އޭނާއަކީ އެމެރިކާ ސިފައިން އަފްޣާނިސްތާނުން ފައިބަން އަވަސް އަރުވާލައިގެން އުޅުނު އިރު ވެސް ކާބުލް އެއާޕޯޓްގައި އެ މީހުންގެ ދިފާއުގައި މަސައްކަތްކުރި މީހެކެވެ.

އަފްޣާނިސްތާނުގެ ކަންދަހާރުގައި ތާލިބާނުންނާ ދެކޮޅަށް މަސައްކަތްކުރަން "ކަންދަހާރު ސްޓްރައިކް ފޯސް" ގެ ނަމުގައި އެމެރިކާ ސިފައިން އުފެއްދި ފައުޖުގެ ޔުނިޓް-3 އަށް އޭނާ ވެއްދީ އޭގެ ނުވަ އަހަރު ކުރިންނެވެ. "ސްކޯޕިއަން ފޯސް" ގެ ނަމުގައި އަފްޣާން މީހުންނަށް އެނގޭ އެ ފައުޖު ފުރަތަމަ މަސައްކަތްކުރީ ސީދާ ސީއައިއޭގެ ދަށުންނެވެ. އޭގެ ފަހުން އެމެރިކާއިން އަފްޣާނިސްތާނުގައި އޭރު ގާއިމްކޮށްފައި އޮތް ގޮނޑިކޮއްކޮ ސަރުކާރުގެ ދަށުންނެވެ.

އޭނާއާ ބެހޭ ތަފްސީލުތައް އެކި ގޮތް ގޮތުން ހާމަވި ފަހުން އެމެރިކާގެ ތަހުގީގީ އިދާރާ އެފްބީއައި އިން ވަނީ އެކަން ކަށަވަރުކޮށްދީފަ އެވެ.