އިންޑިއާގެ ބިހާރު ސްޓޭޓްގެ ޕަޓްނާގައި ތިން އަހަރުގެ ކުޑަ އަންހެން ކުއްޖަކު ގޭންގް ރޭޕް ކުރި މައްސަލައެއްގައި އެ ކުއްޖާގެ ބޮޑުބޭބެއަކާއި އިތުރު ދެ މީހަކަށް ފުދަޢުވާކޮށްފި އެވެ.
މި ހާދިސާ ހިނގާފައިވަނީ މިދިޔަ ހަފުތާގެ ތެރޭގަ އެވެ. މި މައްސަލައިގައި ހިމެނޭ ތިން މީހުން ވެސް މިހާރު ވަނީ ހައްޔަރުކޮށްފައި ކަމަށް އެ ސަރަހައްދުގެ ފުލުހުން ބުންޏެވެ. ފުލުހުން ބުނިގޮތުގައި މި އަމަލު ހިންގާފައިވަނީ އެ ކުއްޖާގެ ބޮޑުބޭބެ، އޭނާގެ ރައްޓެހި ދެ މީހުންނާއެކު އެ ކުއްޖާ ރަހީނުކޮށްގެން ގެންގޮސް އެކަހެރި ތަނެއްގައެވެ.
މި މައްސަލަ ފެންމަތިވެފައިވަނީ ކުއްޖާގެ ހާލަތު ގޯސްވެ، އާއިލާއަށް އެކަން ފާހަގަކުރެވިގެން ހޮސްޕިޓަލަށް ގެންދިއުމުންނެވެ. ޑޮކްޓަރުންގެ ތަހުލީލުތަކުން އެ ކުއްޖާއަށް ޖިންސީ ގޯނާކޮށްފައިވާކަން ކަށަވަރުވުމާ އެކު ފުލުހުން ވަނީ ވަގުތުން ތަހުގީގު ފަށާފަ އެވެ.
ކުއްޖާގެ މަންމަ ކިޔައިދީފައިވާ ގޮތުގައި، މި ހާދިސާ ހިނގި ވަގުތު ކުއްޖާ އޮތީ ގޭގައި ނިދާފައި އެވެ. އުމުރުން 22 ބޮޑުބޭބެ، ނިދާފައި އޮތް ކުއްޖާ ނަގައިގެން ގާތްގަނޑަކަށް 500 މީޓަރު ދުރުގައި އޮތް ވިނަތަކެއް އޮތް ދަނޑަކަށް ގެންގޮސް ރޭޕް ކުރި ކަމަށް މަންމަ ބުންޏެވެ. އެ ކުއްޖާ ބާރުބާރަށް ރޯން ފެށުމުން އެ ސަރަހައްދުގެ މީހުންނަށް އެ އަޑު އިވިގެން އެ ދިމާލަށް އެއްވި އެވެ.
ޓއިމްސް އޮފް އިންޑިއާއިން ބުނީ އެ ސަރަހައްދުގެ މީހުންނަށް ފުރަތަމަ ހީވީ ކުޑަކުދިން ވަގަށް ނަގާ މީހަކު އެ ސަރަހައްދަށް ވަދެގެން އުޅެނީ ކަމަށެވެ. އެހެންކަމުން އެ މީހުން ބާރަށް ހަޅޭއްލަވައި އެ މީހާ އަތުލައިގަތުމަށް މަސައްކަތް ކުރި އެވެ. މި ހަލަބޮލިކަމުގެ ތެރޭގައި އެ ކުއްޖާގެ ބޮޑުބޭބެ އާއި އޭނާގެ ބައިވެރިން ކުރި މުޑުދާރު އަމަލު ފަޅާއަރުވާލި އެވެ. ފުލުހުން އެ ތިން މީހުން ހައްޔަރު ކުރީ އާންމުގެ އެހީތެރިކަމާ އެކު އެވެ.
މި މައްސަލައިގައި ހިމެނޭ ތިން މީހުންގެ މައްޗަށް ކުރަނީ ކުޑަކުދިންނަށް ކުރާ ޖިންސީ ގޯނާއިން ރައްކާތެރިކޮށްދޭ ގާނޫނާއި ގްރޫޕް ރޭޕްގެ ދަޢުވާ އެވެ. ކުއްޖާގެ ހާލު މިހާރު ކޮންމެވެސް ވަރަކަށް ރަނގަޅުވަމުން އަންނަ ޑޮކްޓަރުން ބުންޏެވެ. ނަމަވެސް އެ ކުއްޖާއަށް ލިބުނު ނަފްސާނީ އަދި ޖިސްމާނީ އަނިޔާތަކަށް ދިގު މުއްދަތުގެ ފަރުވާ ބޭނުންވާނެ ކަމަށް ޑޮކްޓަރުން ބުނެފައިވެ އެވެ.
މަސްދަރު: ޓައިމްސް އޮފް އިންޑިއާ