ރިޔާޒް (ސެޕްޓެމްބަރު 27) - ސައުދީ އަރަބިއާގައި އަންހެނުންނަށް ވެހިކަލް ދުއްވޭ ގޮތަށް ރަސްގެފާން ސަލްމާންގެ ޚާއްސަ ގަރާރަކުން ހުއްދަ ދީފި އެވެ.
މިއީ ސައުދީގައި އަންހެނުންނަށް އެއްގަމު އުޅަނދު ދުއްވުން ހުއްދަކުރި ފުރަތަމަ ފަހަރެވެ. ސައުދީ ރަސްމީ ނޫސް އެޖެންސީން ބުނީ އަންހެނުން ކާރު ދުއްވުމާ ބެހޭ ގޮތުން އެ ގައުމުގެ ވަޒީރުން 30 ދުވަހުގެ ތެރޭގައި ރިޕޯޓެއް ތައްޔާރު ކުރާނެ އެވެ. އަދި އަންހެނުން ކާރު ދުއްވުމުގެ އަމުރު އަންނަ އަހަރުގެ ޖޫން މަހުގެ ކުރިން ތަންފީޒް ކުރާނެ އެވެ. ސައުދީ އަރަބިއާ އަކީ އަންހެނުންނަށް ކާރު ނުދެއްވޭ ހަމައެކަނި ގައުމެކެވެ.
ސައުދީ އަރަބިއާގެ އެމެރިކާ ސަފީރު ޕްރިންސް ޚާލިދު ބިން ސަލްމާން ވިދާޅުވީ މިއީ ތާރީޚީ ދުވަހެއް ކަމަށާއި ރަނގަޅު ވަގުތު ނިންމި ރަނގަޅު ނިންމުމެއް ކަމަށެވެ.
މިހާރު އޮންނަ ގޮތުން ސައުދީގައި ޑްރައިވިން ލައިސަންސް ދެނީ ހަމައެކަނި ފިރިހެނުންނަށެވެ. އަދި ކާރު ދުއްވި ބައެއް އަންހެނުން މީގެ ކުރިން ވަނީ ހައްޔަރުކޮށްފަ އެވެ. އެހެންވެ ގިނަ އާއިލާތަކުން ގެންގުޅެނީ ޕްރައިވެޓް ޑްރައިވަރުންނެވެ.
އަންހެނުން ކާރު ދުއްވުން ހުއްދަ ކުރުމަށް ސައުދީގެ އެކި ގްރޫޕްތަކުން ދިޔައީ ކެމްޕޭން ކުރަމުންނެވެ. ސައުދީގައި "ވިމެން2ޑްރައިވް" ކެމްޕޭން 2011 ގައި ހިންގި އެކްޓިވިސްޓް މަނާލް އަލް ޝަރީފް ވަނީ ސަރުކާރުގެ ނިންމުމަކަށް މަރުހަބާ ކިޔައިފަ އެވެ.
ސައުދީގައި އަންހެނުން ކާރު ދުއްވުން ހުއްދަ ކުރުމުން އެމެރިކާގެ ސްޓޭޓް ޑިޕާޓްމަންޓުން ވަނީ މަރުހަބާ ކިޔައިފަ އެވެ.
