ބާރުގެ ބޭނުން ނަހަމަ ގޮތުގައި ހިއްޕެވުމާއި ކޮންގްރެސްގެ މަސައްކަތްތަކަށް ހުރަސް އެޅުއްވުމުގެ ކުށުގައި، އެމެރިކާގެ ރައީސް ޑޮނަލްޑް ޓްރަމްޕް، ރޭ އިމްޕީޗްކޮށްފި އެވެ. މިއީ އެމެރިކާގެ ތާރީޚުގައި، ރައީސަކު އިމްޕީޗްކުރި ތިން ވަނަ ފަހަރެވެ.
މުޅިން ވެސް ޕާޓީގެ ލައިނުން ހަ ގަޑިއިރަށް ކުރިއަށް ދިޔަ ބަހުސްތަކަށް ފަހު ދެ ކުށަށް ވަކިވަކިން ނެގި ވޯޓުގައި، ޑިމޮކްރެޓިކް މެމްބަރުން ކާމިޔާބު ހޯއްދެވީ ވެސް، ރިޕަބްލިކަން ޕާޓީގެ އެންމެ މެމްބަރެއްގެ ވެސް ވޯޓެއް ނެތި އެވެ.
އިމްޕީޗްމަންޓް ފާސްވާން ބޭނުންވަނީ ސާފު އަގުލަބިއްޔަތެވެ.
ބާރުގެ ބޭނުން ނަހަމަ ގޮތުގައި ހިފުމުގެ ކުށް
- 230: ޓްރަމްޕް އެ ކުށް ކުރިކަމަށް ދިން ވޯޓު
- 197: ޓްރަމްޕް އެ ކުށް ކުރިކަމަށް ނުފެންނަ ވޯޓު
ކޮންގްރެސްގެ މަސައްކަތަށް ހުރަސް އެޅުން
- 229: ޓްރަމްޕް، ކޮންގްރެސްއަށް ހުރަސް އެޅި ކަމަށް ދިން ވޯޓު
- 198: ޓްރަމްޕް، ކޮންގްރެސްއަށް ހުރަސް އެޅި ކަމަށް ނުފެންނަ ވޯޓު
ރައީސަށް ލިބިވަޑައިގަންނަވާ ބާރުގެ ބޭނުން ނަހަމަ ގޮތުގައި ހިއްޕެވިކަމުގެ ކުށް، ޖުޑީޝަރީ ކޮމިޓީން ފާސްކޮށް، ހައުސްގެ ތަޅުމަށް ފޮނުވީ، އެމެރިކާގެ ކުރީގެ ރައީސް ޖޯސެފް ބައިޑަންގެ ތަހުގީގެއް ހިންގަން، ޔުކްރެއިންގެ ރައީސަށް ޕްރެޝަރުކުރެއްވުމާއި، ޔުކްރެއިންއަށް ދޭން ކޮންގްރެސް އިން ފާސްކުރި 400 މިލިއަން ޑޮލަރުގެ އަސްކަރީ އެހީ، އެ ތަހުގީގުކުރާނެކަން އާންމުކޮށް އިއުލާންކުރެއްވުމުގެ ކުރިން ހިފެހެއްޓެވުމެވެ.
ކޮންގްރެސްގެ މަސައްކަތަށް ހުރަސްއެޅުއްވިކަމުގެ ކުށް، އިމްޕީޗްމަންޓްގައި ހިމެނީ، އެ ތަހުގީގަށް ބޭނުންވާ ލިއެކިއުންތަކާއި ހާޒިރުކުރަން ބޭނުންވި ބައެއް ބޭފުޅުން، ކޮންގްރެސްގެ ކޮމިޓީތަކަށް ނުފޮނުއްވުމުންނެވެ.
އެމެރިކާގައި ރައީސެއްގެ އިމްޕީޗްމަންޓް ދާ ގޮތް
ވޯޓުގައި ޑިމޮކްރެޓިކް ޕާޓީގެ ދެ މެމްބަރަކު އިމްޕީޗްމަންޓާ ދެކޮޅަށް ވޯޓު ދެއްވި އެވެ. ދެން އެ ޕާޓީގެ ހުރިހާ މެމްބަރުން، އެއީ ޓްރަމްޕަށް ތާއީދުކުރާ ދާއިރާތަކުން ހޮވިފައިވާ ބޭފުޅުން ކަމަށް ވިޔަސް، ވޯޓު ދެއްވީ އިމްޕީޗްމަންޓާ އެއްކޮޅަށެވެ.
ދެން އޮންނާނީ އެ ދެ ކުށާ މެދު ސެނެޓްގައި ހިންގާ ޝަރީއަތެވެ. އެމެރިކާގެ އުއްތަމަފަނޑިޔާރު ރިޔާސަތުގައި އިންނަވައިގެން ކުރިއަށް ގެންދާ މި ޝަރީއަތުގައި، ސެނެޓްގެ 100 މެމްބަރުން ވޯޓު ދެއްވައިގެން، އޭގެ ތެރެއިން ތިން ބައިކުޅަ ދެ ބައި ވޯޓު، ޓްރަމްޕާ ދެކޮޅަށް ލައިފި ނަމަ، ވެރިކަމުން ދުރުކުރާނެ އެވެ. އެކަމަކު ރިޕަބްލިކަން ޕާޓީގެ އަގުލަބިއްޔަތު އޮތް ސެނެޓުން އެ އަގުލަބިއްޔަތު ލިބުން ދުރެވެ. ހާއްސަކޮށް ދެ ޕާޓީގެ ހިޔާލު އެހާ ބޮޑަށް ތަފާތުފައިވާ ދަނޑިވަޅެއްގައި ޓްރަމްޕާ ދެކޮޅަށް 67 ވޯޓު ހަމަވުން ވަރަށް ނާދިރެވެ.
ވޯޓު ނެގުމުގެ ކުރިން ހައުސްގެ ރައީސް ޕެލޯސީއަށް ޓްރަމްޕް ފޮނުއްވި ސިޓީ
ސެނެޓްގެ މެޖޯރިޓީ، ރިޕަބްލިކަން ޕާޓީއަށް ލިބެނީ 53 މެމްބަރުންނާ އެކުގަ އެވެ. ޑިމޮކްރެޓިކް ޕާޓީގައި ތިއްބެވީ 45 މެމްބަރުންނެވެ. މިނިވަން ދެ މެމްބަރަކު ތިއްބަވަ އެވެ. އެ ދެ މެމްބަރުން އާންމުކޮށް ވޯޓު ދެއްވަނީ ޑިމޮކްރެޓިކް ޕާޓީން ބޭނުންވާ ގޮތަށެވެ.
އެމެރިކާގެ ތާރީހުގައި މީގެ ކުރިން އިމްޕީޗްކުރީ ދެ ރައީސެކެވެ. އެއީ 1868 ގައި އެންޑްރޫ ޖޯންސަން އާއި 1998 ގައި ބިލް ކްލިންޓަނެވެ. އެ ދެ ބޭފުޅުން ވެސް ސެނެޓްގެ ޝަރީއަތުން ސަލާމަތްވެވަޑައިގަތެވެ. އެހެންކަމުން ރައީސްގެ މަގާމެއް ނުގެއްލެ އެވެ.
ރިޗަޑް ނިކްސަންއާ ދެކޮޅަށް އިމްޕީޗްމަންޓް ހުށައެޅުމުން، އޭނާ މަގާމުން އިސްތިއުފާ ދެއްވީ އެވެ. އެއީ އެމެރިކާގެ ތާރީޚުގައި އިސްތިއުފާ ދެއްވި ހަމައެކަނި ރައީސެވެ.
"އަޅުގަނޑު ހާހެއްނުވޭ"
ޑިމޮކްރެޓިކް ޕާޓީގެ މެމްބަރުން ވިދާޅުވާ ގޮތުގައި ގާނޫނުއަސާސީއާ ހިލާފަށް ޓްރަމްޕް ކުރައްވާ ކަންކަން ދޫކޮށެއް ނުލައްވާނެ އެވެ. ސެނެޓުން އޭނާ ސަލާމަތްވެވަޑައިގަތަސް، ހައުސަށް ލިބިގެންވާ ބާރުގެ ބޭނުން ކުރަނީ، ޑިމޮކްރެޓިކް ލީޑަޝިޕުން ބުނި ގޮތުގައި، ގާނޫނުއަސާސީން ހައުސްއަށް މަތިކޮށްފައިވާ ބާރު ދަމަހައްޓާށެވެ.
"މިދިއަ ތިން މަސް ދުވަހުގެ އަޅުގަނޑުމެންނަށް ފެނުނީ އެއާ ދެކޮޅުހެދެން ނެތް ހެކިތަކެއް، އެއީ ޔުކްރެއިންގެ އާ ރައީސަށް ޕްރެޝަރުކޮށްގެން، ޓްރަމްޕްގެ ސިޔާސީ ވާދަވެރިއެއްގެ ތަހުގީގު ފަށަން އުޅުއްވުން،" ޓްރަމްޕްގެ ތަހުގީގު ކުރިއަށް ގެންދިޔަ އިންޓެލިޖެންސް ކޮމިޓީގެ ޗެއާމަން ޑިމޮކްރެޓިކް ޕާޓީގެ އެޑަމް ޝިފް، ރޭ ވިދާޅުވި އެވެ.
"ރައީސް އާއި އޭނާގެ ބައިވެރިން ރޭވަމުން ދަނީ. ނުރައްކާ އެބަ އޮތް. އެއީ ހަގީގަތެއް. އަޅުގަނޑުމެންގެ ޑިމޮކްރަސީ މި އޮތީ ހަލާކުގެ ތެރޭގައި."
ރޭގައި ބަހުސް ކުރިއަށް ދިޔަ އިރު، ޓްރަމްޕް ކުރެއްވި ޓްވީޓެއްގައި ވިދާޅުވީ "އެއްވެސް މަސައްކަތެއް ނުކުރާ ވާތު ފިޔައިގެ ޑިމޮކްރެޓިކުން ހަމަލާ އެ ދެނީ އެމެރިކާއަށް" ކަމަށެވެ.
"އަދި އެއީ ރިޕަބްލިކަން ޕާޓީއަށް ދޭ ހަމަލާއެކެވެ،" ޓްރަމްޕްގެ ޓްވީޓްގައި ލިއުއްވި އެވެ.
ވޯޓު ނެގި އިރު އޭނާ ހުންނެވީ ސިޔާސީ އެއްވުމެއްގެ ތެރޭގަ އެވެ. ސަޕޯޓަރުންނާ ވާހަކަ ދައްކަވަމުން ފުރަތަމަ ވެސް ވިދާޅުވީ، ތަހުގީގު ފެށުމާ އެކު ތަކުރާރުކުރައްވަމުން ގެންދެވި، "އެއީ އެއްވެސް ހަގީގަތެއް ނެތް ތުހުމަތުތަކެއް" ކަމަށެވެ.
"އަޅުގަނޑު ހާހެއް ނުވޭ. އެއްވެސް ކުށެއް ނުކޮށް ހުއްޓާ އިމްޕީޗް އެކުރަނީ. އެއީ އަބަދަށް ދެމިގެންދާނެ އަމަލެއް،" ޓްރަމްޕް ވިދާޅުވި އެވެ.
އެކަމަކު ސެނެޓުން އޭނާ ސަލާމަތްކޮށްދިނުމުގެ ފުރުސަތު ބޮޑަސް އިމްޕީޗްމަންޓް ފާސްވުމަކީ ޓްރަމްޕްގެ ރައީސްކަމުގައި ޖެހުނު ނުފޮހެވޭނެ ބޮޑު ލައްގަނޑެކެވެ. އެކަމާ ކޯފާއިސްވެ، ޓްވީޓްތައް ކުރެއްވުމުގެ އިތުރުން، ސަޕޯޓަރުންގެ ކުރިމަތީގައި ވާހަކަ ދެއްކެވިޔަސް، މަގާމުގެ ބޭނުން ނަހަމަ ގޮތުގައި ހިއްޕެވިކަން، ހައުސްއިން ފާސްވުމަކީ، ރިޔާސީ އިންތިހާބަށް 10 މަހަށް ވެފަައި ވަނިކޮށް، ކުރިމަތިވެވަޑައިގެންނެވި ތާރީޚީ ވެއްޓުމެކެވެ.
ކުރީގެ ރައީސުންގެ އިސްތަށިފުޅުގައި އެޅިފައިނުވާ އެތައް ތުހުމަތުތަކެއް ޓްރަމްޕަށް ކުރެވެ އެވެ. އޭގެ ތެރޭގައި ޓެކްސްގެ ހިސާބުތައް ހާމަނުކުރެއްވުމާއި، އަމިއްލަ ފައުންޑޭޝަން ބޭނުންކުރައްވައިގެން ވަގު ހެއްދެވުމާއި ބަރަހަނާ ފިލްމު ކުޅޭ އަންހެނަކާ އެކު އޮތް ގުޅުން ފޮރުވަން، ވަކީލް މެދުވެރިކުރައްވައި، ފައިސާ ދެއްވުން ފަދަ ކަންކަން ހިމެނެ އެވެ.
އެކަމަކު އެމެރިކާގެ ސިޔާސީ ހިޔާލު ތަފާތުވުން، ދެ ޕާޓީގެ މެދުގައި އޮތްލެއް ބޮޑުކަމުން، ޓްރަމްޕްގެ މިފަދަ އެއްވެސް މައްސަލައެއްގައި ރިޕަބްލިކަން ޕާޓީގެ މެމްބަރުން ދެކޮޅަށް އަޑުއުފުއްލަވާފައެއް ނުވެ އެވެ. ބައެއް ތަޖުރިބާކާރުން ބުނާ ގޮތުގައި މިހާ ބޮޑަށް ސިޔާސީ ގޮތުން އެމެރިކާ ދެ ބައިވެފައި އޮތް ދުވަސްވަރެއް ފަހުގެ ތާރީޚެއްގައި ދިމާވެފައެއް ނުވެ އެވެ.
