ލަންޑަން (ޖޫން 1) - ކޮރޯނާވައިރަހާ ގުޅިގެން އިނގިރޭސި ވިލާތް ލޮކްޑައުން ކުރި ފަހުން ފުރަތަމަ ފަހަރަށް ރާނީ އެލިޒަބަތު ބޭރު ތެރެއަށް ނުކުމެވަޑައިގެން އުޅުއްވަނިކޮށް ފެނިއްޖެ އެވެ.
އުމުރުން 94 އަހަރު ރާނީ ވަނީ ވިންޑްސާ ގަނޑުވަރުގެ ބަގީޗާގައި އަސް ދުއްވަން ނުކުމެވަޑައިގެންފަ އެވެ. އަސް މަތީ އެކަމަނާ އިންނެވީ ހެޑްސްކާފެއް އަޅުއްވައިގެން ހުދު އަންގީގަ އެވެ. ރާނީގެ އަސް ދުއްވަވަނިކޮށް ފޮޓޯ ނަގާފައި ވަނީ އެސޯސިއޭޓެޑް ޕްރެސް އިންނެވެ. ބުނެވޭ ގޮތުގައި ވިންޑްސާ އަކީ ރާނީ އެންމެ ހިތްހަމަޖެހިވަޑައިގަންނަވާ ގަނޑުވަރެވެ. އަދި ރާނީ އަކީ އަސް ދުއްވުމާއި އަސް ރޭހަށް ވަރަށް ޝައުގުވެރިވެވަޑައިގެންނަވާ ބޭކަނބަލެކެވެ.
ކޮރޯނާވައިރަސް ފެތުރެން ފެށުމާ އެކު ރާނީ ވަނީ ވަރަށް ބޮޑަށް މީހުންނާ އެކަހެރިވެވަޑައިގެންފަ އެވެ. އެކަމަނާ އެންމެ ފަހުން އާއްމުންނަށް ފެނިފައި ވަނީ ބަކިންހަމް ޕެލަސް އިން ބާކްޝާ ގަނޑުވަރަށް ވަޑައިގަންނަވަނިކޮށް، މާޗް 19 ގަ އެވެ.