ރަޝިޔާގެ ވެކްސިން އަންނަ ހަފުތާގައި ގިނަ ބަޔަކަށް ދޭން ޕުޓިން އަންގަވައިފި

މޮސްކޯ (ޑިސެމްބަރު 3) - ކޮރޯނާވައިރަހަށް ރަޝިޔާގައި އުފެއްދި ވެކްސިން އަންނަ ހަފުތާ އިން ފެށިގެން ގިނަ ބަޔަކަށް ދިނުމަށް ރައީސް ލަޑިމިއާ ޕުޓިން ސިއްހީ އޮފިޝަލުންނަށް އަންގަވައިފި އެވެ.

ރަޝިޔާގައި އުފެއްދި ސްޕުޓްނިކް ވީ ވެކްސިންގެ ދެ މިލިއަން ޑޯޒް މިހާރު ވަނީ އުފައްދައިފަ އެވެ.

ވެކްސިން ދިނުމަށް ރަޝިޔާގެ ރައީސް އަންގަވާފައި މި ވަނީ އެމެރިކާގެ ފައިޒާ އާއި ޖަރުމަނުގެ ބަޔޯއެންޓެކް ގުޅިގެން އުފެއްދި ވެކްސިން ބޭނުން ކުރުމުގެ ހުއްދަ އިނގިރޭސި ވިލާތުން ދީފައި ވަނިކޮށެވެ.

ރަޝިޔާ އިން މިދިޔަ ހަފުތާގައި ބުނެފައި ވަނީ ސްޕުޓްނިކް ވީ އިން ކޮރޯނާވައިރަހުން ދިފާއުވުމަށް 95 ޕަސެންޓް ރައްކާތެރިކަން ލިބޭ ކަމަށެވެ. އެކަމަކު ރަޝިޔާގެ ވެކްސިން މިހާރު ވަނީ 40،000 ވޮލަންޓިއަރުން ބޭނުންކޮށްގެން ކުރިއަށް ގެންދާ ކްލިނިކަލް ޓްރަޔަލްތަކުގެ ތިން ވަނަ އަދި ފަހު ސްޓޭޖުގަ އެވެ.

ޕުޓިން ވިދާޅުވީ އަންނަ ހަފުތާ އިން ފެށިގެން ވެކްސިން ދިނުން ކުރިއަށް ގެންދިއުމުގެ އިންތިޒާމްތައް ހަމަޖެއްސުމަށް އަންގަވާނެ ކަމަށެވެ. ވެކްސިން ފުރަތަމަ ދޭނީ ޓީޗަރުންނާއި ސިއްހީ އޮފިޝަލުންނަށްކަން ޕުޓިން ފާހަގަ ކުރެއްވި އެވެ.

ރަޝިޔާގެ ވެކްސިން ސްޕުޓްނިކް ވީގެ ދެ ޑޯޒް ދޭނީ ފުރަތަމަ ޑޯޒަށް ފަހު 21 ދުވަސް ފަހުންނެވެ. ރަޝިޔާގެ އެންމެންނަށް ވެކްސިން ދެނީ ހިލެ އެވެ. ވެކްސިން ޖެހުން ވަނީ ވޮލަންޓަރީ ކަމެއްގެ ގޮތުގައި ދޫކޮށްލައިފަ އެވެ.

ރަޝިޔާގެ ޑިފެންސް މިނިސްޓްރީން މިދިޔަ ހަފުތާގައި ވަނީ ސިފައިންނަށް ވެކްސިން ދިނުމުގެ ބޮޑު ޕްރޮގްރާމެއް ފަށާފައިވާކަން އިއުލާންކޮށްފަ އެވެ. ރަޝިޔާ އިން އުއްމީދު ކުރަނީ ހަތަރު ލައްކަ ސިފައިންނަށް ވެކްސިން ދިނުމަށެވެ. އަދި މި އަހަރު ނިމެންވާއިރަށް 80،000 ސިފައިންނަށް ވެކްސިން ދެވޭނެ ކަމަށް އުއްމީދު ކުރެވެ އެވެ.

ރަޝިޔާގެ ހެލްތު މިނިސްޓަރު މިޚައިލް މުރަޝްކޯ ބުދަ ދުވަހު ވިދާޅުވީ އެ ގައުމުގެ ވެކްސިން މިހާތަނަށް ވަނީ 100،000 މީހުންނަށް ދީފައި ކަމަށެވެ. ރަޝިޔާގެ ވެކްސިން ތައްޔާރު ކުރުމުގައި އެހީވި ރަޝިއަން ޑައިރެކްޓް އިންވެސްޓްމަންޓް ފަންޑުގެ ވެރިޔާ ކިރިލް ދިމިތުރިޔޭފް ވިދާޅުވީ ސްޕުޓްނިކް ވީ ވެކްސިން ހޯދަން 40 އަށް ވުރެ ގިނަ ގައުމުން ޝައުގުވެރިކަން ފާޅުކޮށްފައިވާ ކަމަށެވެ.