ބާސެލޯނާ (ޖެނުއަރީ 24) – ބާސެލޯނާގައި ހަތް އަހަރާ ބައިގެ މުއްދަތެއް ހޭދަކުރުމަށް ފަހު އާޖެންޓީނާ ޑިފެންޑަރު ހަވިއާ މަޝެރާނޯ މި ފަހަރުގެ ޓްރާންސްފާ ބާޒާރުގައި އެ ކްލަބް ދޫކޮށްލާނެ އެވެ.
އޭނާ ދާނެ ކަމަށް ބެލެވެނީ ޗައިނީސް ސުޕަ ލީގުގެ ހެބެއީ ޗައިނާ ފޯޗޫންއަށެވެ. އުމުރުން 33 އަހަރުގެ މަޝެރާނޯ ބާސެލޯނާއާ ގުޅުނީ 2010 ވަނަ އަހަރު ލިވަޕޫލުން 17 މިލިއަން ޕައުންޑަށެވެ. އޭގެ ކުރިން އޭނާ ވަނީ އިންގްލެންޑުގެ ވެސްޓް ހޭމް ޔުނައިޓެޑާއި ބްރެޒިލްގެ ކޮރިންތިއަންސް އަދި އާޖެންޓީނާގެ ރިވާ ޕްލޭޓަށް ކުޅެފަ އެވެ.
ސެންޓްރަލް ޑިފެންޑަރެއްގެ އިތުރުން މެދުތެރެއަށް ވެސް ގިނަ މެޗުތައް ކުޅެފައިވާ މަޝެރާނޯ ވަނީ ބާސެލޯނާއާ އެކު 18 މުބާރާތް ކާމިޔާބުކޮށްފަ އެވެ. އޭގެ ތެރޭގައި ހަތަރު ފަހަރު ހޯދި ސްޕެނިޝް ލީގާއި ދެ ފަހަރު ހޯދި ޗެމްޕިއަންސް ލީގު ހިމެނެ އެވެ. އެ ކްލަބަށް ކުޅެދިން 334 މެޗުން އޭނާ އަށް ޖެހުނީ އެންމެ ގޯލެކެވެ.
ބާސެލޯނާ އިން މަޝެރާނޯ އަށް ބުދަ ދުވަހު ރަސްމީކޮށް އަލްވަދާއު ކިޔާނެ އެވެ.
