ޔުއެފާއާ ދެކޮޅަށް ސިޓީން ނުކުންނާނީ ވަރުގަދަކޮށް

މެންޗެސްޓާ (ފެބްރުއަރީ 19) - ޔޫރަޕްގެ މުބާރާތްތަކުން ކުރިއަށް އޮތް ދެ ސީޒަނަށް ސަސްޕެންޑްކޮށްފައިވާ މެންޗެސްޓާ ސިޓީން ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް)ގައި އެ މައްސަލައިގެ ތަހުގީގު އަލުން ކުރިއަށްދާއިރު ޔުއެފާއާ ދެކޮޅަށް ވަރުގަދަ އަށް ނުކުންނަން ސިޓީން ނިންމާފައިވާ ކަމަށް އިނގިރޭސި މީޑިއާ އިން ރިޕޯޓްކޮށްފި އެވެ.

ފައިނޭންޝިއަލް ފެއާޕްލޭ (އެފްއެފްޕީ)ގެ އުސޫލުތަކާ ހިލާފުވެފައި ވާތީ އާއި ޔުއެފާ ކްލަބް ލައިސަންސިންގައި މަކަރު ހަދާފައި ވާތީ ކުރިއަށް އޮތް ދެ އަހަރަށް ސިޓީ ސަސްޕެންޑްކުރުމުގެ އިތުރުން އެ ޓީމު ވަނީ 30 މިލިއަން ޔޫރޯ އިން ޖޫރިމަނާކޮށްފަ އެވެ. ސިޓީން ވަނީ ވަގުތުން މި މައްސަލަ ސީއޭއެސް އަށް ހުށަހަޅައިފަ އެވެ.

މިދިޔަ އަހަރު ލީކުވި ސިޓީގެ ލިޔެކިއުންތަކުގައިވާ ގޮތުން ސިޓީން އެފްއެފްޕީ ގަވާއިދުތަކާ ހިލާފަށް ކްލަބަށް ފައިސާ އެތެރެ ކުރުމުގައި މަކަރު ހަދާފައިވަނީ އެކި ސްޕޮންސަރުން މެދުވެރިކޮށް ކްލަބަށް ހަރަދުކޮށްގެންނެވެ. އެކަމަކު އެ ހަރަދުތަކުގެ ތަފްސީލް ސިޓީގެ ރަސްމީ އެކައުންޓްތަކުން ނުހިމަނައި ކަމަށެވެ. އެ ލިޔެކިޔުންތަކުން ދައްކާގޮތުން ގަވާއިދާ ހިލާފަށް ސިޓީގެ ސްޕޮންސަރެއް ކަމަށްވާ އިއްތިހާދު އެއާވޭސް އިން ވަނީ 2012 އިން 2016 އާ ހަމައަށް 88 މިލިއަން ޑޮލަރު ސިޓީ އަށް އިންވެސްޓްކޮށްފަ އެވެ.

ސިޓީގެ މި މައްސަލަ ޔުއެފާގެ އިތުރުން އިނގިރޭސި ޕްރިމިއާ ލީގުން ވެސް އަންނަނީ ބަލަމުންނެވެ. ޕްރިމިއާ ލީގުން ކުރާ ތަހުގީގުގައި ސިޓީގެ މައްޗަށް ކުށް ސާބިތުވެއްޖެނަމަ އެ ޓީމު އަތުން 2014 ވަނަ އަހަރުގެ ލީގު ޗެމްޕިއަންކަން ނެގުމުގެ ފުރުސަތު އެބައޮތެވެ. އެކަމަކު މިހުރިހާ ކަމެއް ބަރޯސާވެފައި މި ވަގުތު އޮތީ ސީއޭއެސްގެ ނިންމުމަކަށެވެ.

ޔުއެފާ އިން ދިން ސަސްޕެންޝަނާ ގުޅިގެން ސިޓީގެ ޗެއާމަން ކަލްދޫން އަލް މުބާރަކް އާއި ސީއީއޯ ސޮރިއާނޯ އަދި ކްލަބްގެ އިސް ވަކީލް ސައިމަން ކްލިފް ވަނީ ބައްދަލުކޮށްފަ އެވެ. އެ ބައްދަލުވުމުގައި ދެކެވުނު ވާހަކަތަކަށް ފަހު ކްލިފް ވަނީ މީޑިއާ އަށް އިންޓަވިއުއެއްދީފަ އެވެ. ކްލިފް ބުނީ ސިޓީ އޮތީ އެއްވެސް ސިފައެއްގައި ޔުއެފާ އަށް ދޫދޭގޮތަކަށް ނޫނެވެ.

"މި ވަގުތު ކޯޓުގައި މި އޮތް މައްސަލަ އަހަރެމެން ކޮޅަށް ނުނިމުނަސް މިއީ މި މައްސަލައިގެ ނިމުމެއް ނޫން. ދުނިޔޭގެ އެންމެ ވަރުގަދަ 50 ވަކީލުން ގެނެސް 30 މިިލިއަން ޑޮލަރު ހަރަދުކޮށްގެން ވިޔަސް ކުރިއަށް އޮތް 10 އަހަރު ޔުއެފާއާ ދެކޮޅަށް ގިނަ މައްސަލަތަކެއް ހުށަހަޅަން ވެސް ސިޓީ އޮތީ ތައްޔާރަށް،" ކްލިފް ބުންޏެވެ.

އިނގިރޭސި މީޑިއާތަކުން ރިޕޯޓްކުރާގޮތުގައި ދެ އަހަރަށް ޔޫރަޕްގެ މުބާރާތްތަކުން ސިޓީ ސަސްޕެންޑްވެއްޖެނަމަ އެ ޓީމަށް އެ މުއްދަތުގައި ލިބޭ ގެއްލުން 300 މިލިއަން ޑޮލަރަށް ވުރެ ބޮޑުވާނެ އެވެ. އަދި ކުޅުންތެރިންނަށް ދޭން ޖެހޭ ބޯނަސް ބޮޑުވެ، އޭޖެންޓް ފީއާ އެކު އެކަމަށް ވެސް ގާތްގަނޑަކަށް 85 މިލިއަން ޑޮލަރު ހަރަދުވުމުގެ ފުރުސަތު އެބައޮތެވެ.

މާލީ ގޮތުން ކްލަބަށް ދިމާވާ މައްސަލަތަކަށް ވުރެން ސިޓީ އަށް އޮތް ކަންބޮޑުވުމަކީ އެ ޓީމުގެ ކޯޗު ޕެޕް ގާޑިއޯލާ އާއި ޓީމުގެ ބައެއް މުހިއްމު ކުޅުންތެރިން ކްލަބް ދޫކޮށްލުމުގެ ބިރެވެ. އިނގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ވެސްޓް ހޭމް ޔުނައިޓެޑާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ގާޑިއޯލާ ބުނީ ސިޓީއާ އެކު ހަދާފައި އޮތް އެއްބަސްވުމަށް އިހުތިރާމްކުރާނެ ކަމަށާއި ކޮންމެ ޑިވިޝަނެއްގައި ސިޓީ ވާދަކުރަން ޖެހުނަސް އޭނާ ކްލަބާ އެކު ހުންނާނެ ކަމަށެވެ.

ސިޓީއާ އެކު ގާޑިއޯލާ ހަދާފައިވާ އެއްބަސްވުން ހަމަވާނީ އަންނަ އަހަރު އެވެ. ގާޑިއޯލާ ހޯދަން އިޓަލީގެ ޗެމްޕިއަން ޔުވެންޓަސް އިން އަންނަނީ މަސައްކަތްކުރަމުންނެވެ.