ސިޓީގެ އަދަބު ދަމަހައްޓަން ބާރުއަޅާކަމުގެ ތުހުމަތުތަކެއް

މެންޗެސްޓާ (މާޗް 29) - ޔޫރަޕްގެ މުބާރާތްތަކުން ކުރިއަށް އޮތް ދެ ސީޒަނަށް ސަސްޕެންޑްކޮށްފައިވާ މެންޗެސްޓާ ސިޓީގެ އިސްތިއުނާފުގެ އަޑުއެހުންތައް ކުރިއަށް ނުގެންދެވުނު ނަމަވެސް އެ ޓީމަށް ދީފައިވާ އަދަބު ދަމަހައްޓަން އިނގިރޭސި ކްލަބްތަކުން ހުށަހަޅަން ތައްޔާރުވަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.

މިދިޔަ ފެބްރުއަރީ މަހު ޔުއެފާ އިން، ކުރިއަށް އޮތް ދެ އަހަރަށް ސިޓީ ސަސްޕެންޑްކޮށް 30 މިލިއަން ޔޫރޯ އިން ޖޫރިމަނާކުރީ ފައިނޭންޝިއަލް ފެއާޕްލޭ (އެފްއެފްޕީ)ގެ އުސޫލުތަކާ ހިލާފުވެފައި ވާތީ އާއި ޔުއެފާ ކްލަބް ލައިސަންސިންގައި މަކަރު ހަދާފައި ވާތީ އެވެ.

ސިޓީން ސީއޭއެސް އަށް ހުށަހެޅި މައްސަލައިގެ ތަހުގީގުތަށް ފަށަން ތާވަލުކޮށްފައިވަނީ އަންނަ ޖޫން މަހުގަ އެވެ. އެކަމަކު ދުނިޔޭގައި މި ވަގުތު ފެތުރިފައިވާ ކޮވިޑް-19 ރޯގައިގެ ސަބަބުން ސީއޭއެސްގެ މައްސަލަތައް ބަލަން ކަނޑައަޅާފައިވާ ތާރީހުގައި އެކަން ކުރިއަށްނުދާނެ އެވެ. އެހެންކަމުން އަންނަ ސީޒަން ފެށޭއިރު ވެސް ސިޓީގެ މައްސަލައިގެ ތަހުގީގު ނުފެށޭނެކަން އޮތީ ގާތްގަނޑަކަށް ޔަގީންވެފަ އެވެ. މި ފުރުސަތުގެ ބޭނުންހިފައި ސިޓީން ވަނީ މައްސަލަ ބަލައިނިމެންދެން އެ ޓީމަށް ދީފައިވާ ސަސްޕެންޝަނަށް އަމަލުކުރުން ވަގުތީ ގޮތުން މަޑުޖައްސާލަން އެދުމަށް ހުށަހަޅަން ނިންމައިފަ އެވެ. އެ ގޮތަށް ސީއޭއެސް އިން އަންގައިފިނަމަ ޔުއެފާ އިން އަންނަ ސީޒަނުގައި ސިޓީ އަށް ޔޫރަޕްގެ މުބާރާތްތަކުން ފުރުސަތު ދޭނެ އެވެ.

ރިޕޯޓްތައް ބުނާގޮތުން ސިޓީ އަށް ލުޔެއްދިނުމާ ދެކޮޅަށް ތެދުވަން ބައެއް އިނގިރޭސި ކްލަބްތަކުން ވަނީ ނިންމައިފަ އެވެ. އިނގިރޭސި މީޑިއާ އިން ތުހުމަތުކުރާ ގޮތުގައި ސިޓީއާ ދެކޮޅަށް އެ މައްސަލަ ސިއޭއެސް އަށް ހުށަހަޅަން އިނގިރޭސި ހަ ކްލަބަކުން ބައިވެރިވެ އެވެ. އެއީ އާސެނަލާއި ޗެލްސީ، މެންޗެސްޓާ ޔުނައިޓެޑާއި ވުލްވްސް، ލިވަޕޫލް އަދި ލެސްޓާ ސިޓީ އެވެ. މި ކްލަބްތަކަކީ ވެސް މި ވަގުތު ޔޫރަޕްގެ މަގާމުތަކަށް ވާދަކުރަމުން އަންނަ ޓީމުތަކެވެ. މި ކަމުގައި ބައިވެރިވާން ބާންލީން ފުރަތަމަ އެއްބަސްވި ނަމަވެސް ފަހުން އެ ޓީމުން ވަނީ އެ ކަމަށް ދެކޮޅު ހަަދައިފަ އެވެ.

ސީއޭއެސް އަށް ހުށަހަޅާފައިވާ މައްސަލަތަކާ މެދު އަމަލުކުރާނެ ގޮތެއް އެ ކޯޓުން އަދި ރަސްމީކޮށް އާންމުކޮށްފައެއް ނުވެ އެވެ. ސިޓީން އަންނަނީ އަންނަ ސީޒަން ފެށުމުގެ ކުރިން މި މައްސަލައިގައި ގޮތެއް ނިންމަން ސީއޭއެސް އަށް ބާރުއަޅަމުންނެވެ. ސިޓީން ވަނީ އެއްވެސް ގޯހެއް ހަދާފައިނުވާނެ ކަމަށް ތަކުރާރުކޮށް ބުނަމުންނެވެ. އަދި އެ ޓީމަށް ދީފައިވާ އަދަބަކީ އިންސާފުވެރިކޮށް ކޮށްފައިވާ ކަމެއް ނޫން ކަމަށް އެ ޓީމުން ބުނެ އެވެ.

ސިޓީގެ މި މައްސަލަ ޔުއެފާގެ އިތުރުން އިނގިރޭސި ޕްރިމިއާ ލީގުން ވެސް އަންނަނީ ބަލަމުންނެވެ. ޕްރިމިއާ ލީގުން ކުރާ ތަހުގީގުގައި ސިޓީގެ މައްޗަށް ކުށް ސާބިތުވެއްޖެނަމަ އެ ޓީމު އަތުން 2014 ވަނަ އަހަރުގެ ލީގު ޗެމްޕިއަންކަން ނެގުމުގެ ފުރުސަތު އެބައޮތެވެ. އެކަމަކު މިހުރިހާ ކަމެއް ބަރޯސާވެފައި މި ވަގުތު އޮތީ ސީއޭއެސްގެ ނިންމުމަކަށެވެ.