މިއުނިކް (އޭޕްރިލް 13) – ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުން ރޭ ރެއާލް މެޑްރިޑް އަތުން 2-1 އިން ބަލިވި ނަމަވެސް ދެ ވަނަ ލެގުގައި އެ ނަތީޖާ އަނބުރާލެވޭނެ ކަމަށް ބަޔާން މިއުނިކުގެ އާޓޫރޯ ވިޑާލް ބުނެފި އެވެ.
ރޭގެ މެޗުގައި ވިޑާލް އެ ޓީމަށް ލީޑު ނަގައިދިން އިރު އޭގެ ފަހުން ލިބުނު ޕެނަލްޓީ އޭނާ އަތުން ވަނީ ބޭކާރުވެފަ އެވެ. މެޑްރިޑް މޮޅުވީ ދެ ވަނަ ހާފުގައި ކްރިސްޓިއާނޯ ރޮނާލްޑޯ ޖެހި ދެ ލަނޑުންނެވެ.
"އަދި އެބައޮތް 90 މިނެޓު. އެހެންވީމާ އަދި ފުރުސަތެއް ނުގެއްލޭ. ޕެނަލްޓީ ބޭކާރުވުމުން ވަރަށް ހިތްހަމަނުޖެހިފައި މިހިރީ. އެކަމަކު މިއީ ފުޓްބޯޅަ. އަހަރެން ވަރަށް ބޮޑަށް އުއްމީދުކުރަން ސެމީ ފައިނަލަށް ދެވޭނެ ކަމަށް އަދި ފައިނަލުގައި ޔުވެންޓަސްއާ ވާދަކުރެވޭނެ ކަމަށް،" ވިޑާލް ބުންޏެވެ.
ޔުވެންޓަސްގެ ކުރީގެ ކުޅުންތެރިޔާ ބުނީ ޔުވެންޓަސް ފެންނަނީ ވަރަށް ވަރުގަދަކޮށް ކަމަށާއި މިއީ ބަޔާނާއި ޔުވެންޓަސްގެ ފަހަރަކަށް ވުމަށް އުއްމީދުކުރާ ކަމަށެވެ. ޔުވެންޓަސް ވަނީ ފުރަތަމަ ލެގުން ބާސެލޯނާ އަތުން 3-0 އިން މޮޅުވެފަ އެވެ.
ބަޔާން މިއުނިކުގެ ކޯޗު ކާލޯ އަންޗެލޮޓީ ވެސް ބުނީ މި މެޗުން ބަލިވިޔަސް އެ ޓީމު އަދި މަރުނުވާ ކަމަށެވެ. އަދި މިވަގުތު ފުރުސަތު ބޮޑީ މެޑްރިޑަށް ނަމަވެސް ބަޔާނަށް ވެސް ފުރުސަތު ނުގެއްލޭ ކަމަށް އޭނާ ބުންޏެވެ.
"ފުރަތަމަ ހާފުގައި އަހަރެމެން މެޗު ކޮންޓްރޯލްކުރިން. އެކަމަކު ފުރުސަތުގެ ބޭނުން ނުކުރެވުނީ. އަނެއްކާ ނަސީބު ވެސް ދެރަކޮށް ދިޔައީ. އެކަކު މަދުވުމުން އިތުރަށް އުނދަގޫވި،" އަންޗެލޮޓީ ބުންޏެވެ.