އެމްޓީސީސީގެ ތާރީހުގައި އެންމެ ބޮޑު ފައިދާއެއް މިދިޔަ އަހަރު

އެމްޓީސީސީގެ 41 އަހަރުވީ ތާރީހުގައި ނުލިބޭ ވަރުގެ ފައިދާއެއް މިދިޔަ އަހަރު އެ ކުންފުންޏަށް ލިބިފައިވާ ކަން ތަފާސްހިސާބުތަކުން ދައްކައިފި އެވެ.

މިދިޔަ އަހަރުގެ ހަތަރުވަނަ ކުއާޓަރުގެ ރިޕޯޓް ދައްކާ ގޮތުން، އަހަރު ނިމުނުއިރު 224.6 މިލިއަން ރުފިޔާގެ ސާފު ފައިދާއެއް އެމްޓީސީސީ އަށް ލިބުނެވެ. މިއީ 2020 ވަނަ އަހަރު ލިބުނު ފައިދާއާ އަޅާ ބަލާއިރު ވެސް 15 ޕަސެންޓުގެ އިތުރުވުމެކެވެ. އެ އަހަރުގެ ސާފު ފައިދާއަކީ 190.6 މިލިއަން ރުފިޔާ އެވެ.

ޓެކުހަށް ކެނޑުމުގެ ކުރިން، މިދިޔަ އަހަރު އެމްޓީސީސީ އަށް 264 މިލިއަން ރުފިޔާގެ ފައިދާއެއް ލިބުނުއިރު، 2020 ގެ އަދަދަކީ 220.75 މިލިއަން ރުފިޔާ އެވެ.

މިދިޔަ އަހަރު ނިމުނުއިރު، އެމްޓީސީސީ އަށް 1.96 ބިލިއަން ރުފިޔާގެ އާމްދަނީއެއް ވަނީ ލިބިފަ އެވެ. އޭގެ ކުރީ އަހަރުގެ މި މުއްދަތުގައި އެ ކުންފުންޏަށް ލިބުނީ 1.36 ބިލިއަން ރުފިޔާ އެވެ.

މިދިޔަ އަހަރަކީ ވެސް އެމްޓީސީސީ އަށް ރެކޯޑް އާމްދަނީ އާއި ފައިދާއެއް ލިބުނު އަހަރެކެވެ. ސަބަބަކީ އެ ކުންފުނީގެ ސީއީއޯ އާދަމް އާޒިމް ވިދާޅުވިގޮތުގައި، ރެކޯޑް އަދަދަކަށް ޕްރޮޖެކްޓްތައް ލިބުމެވެ.

އެމްޓީސީސީން އަންނަނީ ރާއްޖޭގެ ގިނަަ ރަށްރަށުގައި ތަރައްގީގެ ގިނަ މަޝްރޫއުތަކެއް ހިންގަމުންނެވެ. މީގެ ތެރޭގައި ބަނދަރުތަކާއި މަގުތަކާއި އެއާޕޯޓްތައް ހެދުމާއި ބިން ހިއްކުން ފަދަ ބޮޑެތި މަޝްރޫއުތައް ހިމެނެ އެވެ.