މީޑިއާ ނެޓްގެ އޮރިޖިނަލް ސީރީޒް، "ލަފުޒު" ލޯންޗުކޮށްފި

މީޑިއާނެޓުގެ އޮރިޖިނަލް ސީރީޒެއް ކަމަށްވާ "ލަފުޒު" ރޭ ލޯންޗު ކޮށްފި އެވެ.

މުހައްމަދު އަބްދުﷲ (މުހަންމާ) ގެ ދެކެދެކެވެސް ޕްރޮޑަކްޝަނުން ޕްރޮޑިއުސްކޮށްފައިވާ މި ޑްރާމާ ސީރީޒް ޑައިރެކްޓް ކޮށްފައިވަނީ އަހުމަދު ނިމާލެވެ. މި ސީރީޒްގެ އިސް ރޯލުތަކުން ފެންނާނީ ޓިކްޓޮކުން ދިވެހިންގެ މެދުގައި މަޝްހޫރުވި، މަރިޔަމް ޝިފާ އާއި އަލީ އާޒިމް (ދޮން އައްޔަ) އެވެ.

މި ސީރީޒްގެ ކެމެރާ އަދި އެޑިޓިންގެ މަސައްކަތް އަލީ ރަޝީދު (ގޮޅާ) ކޮށްފައިވާއިރު ސްކްރީން ޕްލޭގެ މަސައްކަތްކުރީ މަރިޔަމް މޫސާ އެވެ. އަދި ޕްރޮޑަކްޝަން އިންޗާޖަކީ އިބްރާހިމް ހަސީބެވެ.

ސީރީޒް ލޯންޗު ކުރުމަށް ބޭއްވި ހަފްލާގައި މުހަންމާ ބުނީ މިއީ، ތަފާތު އަދި ގިނަ ބަޔަކަށް ކަމުދާނެ ސީރީޒަކަށް ވާނެ ކަމަށާއި ލީޑުންގެ އެކްޓިންއާ ދޭތެރޭ އެއްވެސް ސުވާލެއް ނުއުފެދޭ ކަމަށެވެ.

މި ސީރީޒާ އެކު ދިވެހި ފިލްމް އިންޑަސްޓްރީއަށް އާ ތަރިންތަކެއް ވެސް ތައާރަފުވާނެ ކަމަށް ވެސް މުހަންމާ ބުންޏެވެ.

"މި ޑްރާމާގައި މަސައްކަތްކުރި އެންމެނަކީ ވެސް ވަރަށް ހުނަރުވެރި ބައެއް. މި ޑްރާމާގެ އެންމެ އެޕިސޯޑަކުން ވާގޮތެއް ނޭނގޭނެ. ވާގޮތް ބަލަން މުޅި ޑްރާމާ އެއްކޮށް ބަލަން ޖެހޭނެ،" މުހަންމާ ބުންޏެވެ.

މި ސީރިޒްގެ ފުރަތަމަ ސީޒަން މިހާރު ޝޫޓްކޮށް ނިމިފައިވާއިރު މުޅި ސީޒަން ޝޫޓް ކުރީ ރ. މާކުރަތުގަ އެވެ. ފުރަތަމަ ސީޒަންގައި 15 އެޕިސޯޑް ހިމެނެ އެވެ.

މީޑިއާނެޓްގެ ވީޑިއޯ ކްލަބުން ބަލައިލެވޭ މި ސީރީޒްގެ އާ އެޕިސޯޑުތައް އަންނަނީ ކޮންމެ ހޮނިހިރު ދުވަހަކު އެވެ. މީޑީއާނެޓްގެ އެމްއެސްޓީވީ އާއި އެމްއެސް-ލައިޓް އަދި އެމްއެސް މީޑިއާނެޓް އެޕްލިކޭޝަން ބޭނުން ކުރާ މީހުންނަށް ވީޑިއޯކްލަބް ބޭނުންކުރެވޭނެ އެވެ.

މީޑިއާނެޓްގެ ވީޑިއޯ ކްލަބުން އެކި އުމުރުތަކާ ގުޅުން ހުރި ގިނަ އަދަދެއްގެ ސީރީސް އާއި ފިލްމު އަދި ދިވެހި އަމިއްލަ އުފެއްދުންތައް ބެލޭނެ އެވެ.