މީޑިއާ ވިލެޖާއެކު ހުޅުމާލޭގައި ފަސް ތަރީގެ ހޮޓަލެއް

އެސްޓީއޯ އިން ހުޅުމާލޭގައި އިމާރާތް ކުރަން ފަށާފައިވާ ސިޓީ ހޮޓާ އިމާރާތުގައި މީޑިއާތަކަށް ހާއްސަ މީޑިއާ ވިލެޖާ އެކު، އާ ފަސް ތަރީގެ ހޮޓަލެއް ހެދުމަށް އެޗްޑީސީން ބަޔަކާ އެކު މިރޭ އެއްބަސްވުމެއްގައި ސޮއިކޮށްފި އެވެ.

މީޑިއާތަކަށް ހާއްސަ ކޮށްގެން މީޑިއާ ވިލެޖެއް ހެދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ވެސް މެ އެވެ.

ހުޅުމާލޭގެ ސިޓީ ހޮޓާ ޕްރޮޖެކްޓް ހަވާލުކުރީ ދުބާއީގެ ޑީޕްސީފުޑް ކޮމްޕެނީން ހަދާފައިވާ ވޯލްޑް އޮފް ބިޒްނަސް ޕްރައިވެޓް ލިމިޓެޑްއާ އެވެ. "މެންހެޓަން ގްރޭންޑް ހޮޓެލް" ގެ ނަމުގައި ހަދާ ފަސް ތަރީގެ އެ ހޮޓާލުގެ އެއްބަސްވުމުގައި ސޮއިކުރީ އެޗްޑީސީގެ ފަރާތުން މެނޭޖިން ޑިރެކްޓަރު އަލީ ޒުހެއިރެވެ.

އެ އިމާރާތުގައި މީޑިއާ ވިލޭޖުގެ އިތުރުން ތަރިކަ ކޮލެޖާއި އެމްއެންޔޫ މެޑިކަލް ސްކޫލާއި ޔޫތު ސެންޓަރަށް ހާއްސަ ޖާގައެއް ކަނޑައަޅާނެ އެވެ. އެ ތަންތަން ނިންމަން ފަސް މަސް ދުވަސް ވަނީ ދީފަ އެވެ. އެ ހަތަރު ތަނަށް ދޭ ޖާގަ ހެދުމަށް ހަތް މިލިއަން ޑޮލަރު ހަރަދު ކުރާނެ އެވެ.

ހޮޓާ އެއްކޮށް ނިންމައި ހުޅުވަން ކަނޑައަޅާފައި ވަނީ ކުރިއަށް އޮތް 12 މަސް ދުވަހުގެ މުއްދަތެވެ.

ވޯލްޑް އޮފް ބިޒްނަސް ޕްރައިވެޓް ލިމިޓެޑުގެ ސީއީއޯ ފަހިޔަސް ޕަންގަޓް ވިދާޅުވީ، އެ ޕްރޮޖެކްޓްގެ ދަށުން ހަތަރު ކެޓަގަރީއެއްގެ ކޮޓަރި ހަދާނެ ކަމަށާއި އެ ހޮޓަލުން އެންމެ ޒަމާނީ ލަގްޒަރީ ހިދުމަތްތައް ލިބޭނެ ކަމަށެވެ.

އޭނާ ވިދާޅުވިގޮތުގައި، ޕްރޮޖެކްޓްގެ މަސައްކަތް ކަނޑައަޅާފައިވާ ޓައިމްލައިނާ އެއްގޮތަށް ނިންމޭނެ ކަމުގެ ފުރިހަމަ ޔަގީންކަން އެބަ އޮތެވެ.

ހުޅުމާލޭގައި ހަދާ މެންހެޓަން ގްރޭންޑް ހޮޓަލުގައި 158 ކޮޓަރި ހިމެނޭއިރު ކޮންފަރެންސާއި މަޕްޓި ޕާޕަސް ހޯލާއި ސުވިމިން ޕޫލްގެ އިތުރުން ދުނިޔޭގެ މަޝްހޫރު ބައެއް ބްރޭންޑްތަކުގެ ފުޑް އައުޓްލެޓަށް ޖާގަ ލިބޭނެ އެވެ. އަދި ޖިމާއި ސްޕާގެ ހިދުމަތް ވެސް އެ ހޮޓަލުން ލިބޭނެ އެވެ.

ހޮޓާ ނިންމަން އެއް އަހަރުގެ މުއްދަތެއް ވަނީ ކަނޑައަޅައިފަ އެވެ. އެޗްޑީސީން ބުނީ، އެ ހޮޓާ ވާނީ، ވެލާނާ އިންޓަނޭޝަނަލް އެއާޕޯޓާ ގުޅާ ލެވޭނެ ހޮޓަލަކަށް ކަމަށެވެ. އެގޮތުން 12 އެއާލައިނަކާ އެކު އެއްބަސްވުންތައް ހަދާނެ ކަމަށް ވެސް އެޗްޑީސީން ބުންޏެވެ.

އެ ޕްރޮޖެކްޓާ އެކު، އެޗްޑީސީ އަށް ބިމުގެ އަގުގެ ގޮތުގައި 11 މިލިއަން ޑޮލަރު (170 މިލިއަން ރުފިޔާ) ލިބޭނެ އެވެ. އަދި ކޮންމެ އަހަރު ކުލީގެ ގޮތުގައި 14.4 މިލިއަން ރުފިޔާ ލިބޭނެ އެވެ. ޓެކްސްގެ ގޮތުގައި ދައުލަތަށް އަހަރަކު 2.5 މިލިއަން ޑޮލަރު (39 މިލިއަން ޑޮލަރު) ލިބޭނެ ކަމަށް އެޗްޑީސީން ލަފާކުރެ އެވެ.

އެ ހޮޓާ ހަދާ އިރު ސީއެސްއާރުގެ ދަށުން ސަރުކާރަށް ދޫކުރާ ހަތަރު ތަނުގެ ފެނާއި ކަރަންޓާއި މެއިންޓަނެންސް ހަރަދު ދާއިމީ ގޮތެއްގައި ހަމަޖައްސާނީ .ވޯލްޑް އޮފް ބިޒްނަސް ޕްރައިވެޓް ލިމިޓެޑުންނެވެ.

އެސްޓީއޯ އިން ހުޅުމާލޭގައި ހޮޓަލެއް އިމާރާތް ކުރަން މީގެ 18 އަހަރު ކުރިން ނިންމީ ރާއްޖެ އަށް އެތެރެކުރާ ކާޑާއި ތެލާއި އަދި އެހެނިހެން ބާވަތްތަކުގެ މުދާ ގަންނަން ބޭނުންވާ ޑޮލަރު ހޯދުމުގެ ނިޔަތުގަ އެވެ.

އެ ޕްރޮޖެކްޓަށް ބޭނުންވާ ބިން ހުޅުމާލެ އިން 2007 ވަނަ އަހަރު ހޯދައި އެމެރިކާގެ ކާލްސަން ގުރޫޕާ އެކު 2011 ގައި ޕާޓްނާޝިޕް އެއްބަސްވުމެއް ވެސް ހެދި އެވެ. އަދި 34 މިލިއަން ޑޮލަރު ހަރަދު ކޮށްގެން 250 ކޮޓަރި ހިމެނޭ ގޮތަށް "ރެޑިސަން ބްލޫ ހޮޓެލް" ގެ ނަމުގައި އެ ތަން ތަރައްގީ ކުރަން ފެށި ނަމަވެސް އެކި ކަންކަން ކުރިމަތިވެ އެންމެ ފަހުން އެ ހޮޓާ ވިއްކާލަން 2018 ގައި އެސްޓީއޯ އިން ނިންމި އެވެ.

އެކަމަކު، އޭގެ ފަހުން ވެސް އެ ހޮޓަލާ މެދު ސަރުކާރުން ގޮތެއް ނިންމުން ދިގުލައިގެން ދިޔަ ނަމަވެސް އެސްޓީއޯއާ ނުގުޅޭ ވިޔަފާރިތަކުން ދުރަށް ދާން އެ ކުންފުނީގެ މިހާރުގެ މެނޭޖުމަންޓުން މިދިޔަ އަހަރު ނިންމުމާ އެކު، އެ ހޮޓާ ހިންގާނެ އާ ބަޔަކު ހޯދުމުގެ މަސައްކަތްތައް މި ސަރުކާރުން ފެށީ އެވެ. އޭގެ ނަތީޖާއަކީ ދުބާއީގެ ޑީޕްސީފުޑް ކޮމްޕެނީއާ ވާހަކަ ދައްކައި އަލުން މަޝްރޫއު ކުރިއަށް ގެންދަން ކަނޑައެޅުން ކަމަށް އެޗްޑީސީން ބުންޏެވެ.