އިންޑިއާގެ މަޝްހޫރު ކޮންސްޓްރަކްޝަން ކުންފުނި، ވަރިންދަރާ ކޮންސްޓްރަކްޝަންސް އިންޓަނޭޝަނަލް ލިމިޓެޑް (ވީސީއެލް) ގްރޫޕުން ރާއްޖޭގައި ހަދާ ލަގްޒަރީ އެޕާޓްމަންޓް ކޮމްޕްލެކްސް، ބްލޫ ލެގޫންގެ ބިންގާ އަޅައިފި އެވެ.
އެ އިމާރާތުގެ ބިންގާ އަޅުއްވައިދެއްވީ އެޗްޑީސީގެ މެނޭޖިން ޑިރެކްޓަރު، އަލީ ޒުހައިރާއި އެ ކުންފުނީގެ ޕްރޮޖެކްޓް މެނޭޖަރު އިސްމާއިލް ނާޖިތު އަހުމަދުގެ އިތުރުން ވީސީއައިއެލް ގްރޫޕުގެ ޕްރޮޖެކްޓް މެނޭޖަރު ސަމިޓް ކައުޝިކް އެވެ.
ބްލޫ ލެގޫން ރެޒިޑެންސްގެ ބިންގާ އަޅަން ބޭއްވި ރަސްމިއްޔާތުގައި އެތަނުގެ ކޮމިއުނިޓީ ޑިވެލޮޕްމަންޓް ޕްރޮގުރާމް ވަނީ ލޯންޗުކޮށްފަ އެވެ.
އެކުންފުނީގެ ހެޑް އޮފް ސޭލްސް، އަބީޖީތް ޖައްކާ ވިދާޅުވީ އެ ޕްރޮގުރާމަކީ އެތަނުން އެޕާޓްމަންޓް ގަންނަ ފަރާތްތަކަށް، އެ ތަނުގެ އިތުރު އެޕާޓްމަންޓުތައް ގަންނަން ބޭނުންވާ ފަރާތްތަކުގެ ރިފަރަލް ދިނުމަށް ހަދާފައިވާ ޕްރޮގުރާމެއް ކަމަށެވެ. އަދި މިއީ އެތަނުގައި ދިރިއުޅޭނެ ކޮމިއުނިޓީ ބިނާ ކުރުމުގައި އެތަނުގައި ދިރިއުޅޭ ރެޒިޑެންޓުން ބޭނުންވާ ފަރާތްތަކަށް ފުރުސަތު ދިނުމުގެ ގޮތުން ތައާރަފްކުރި ޕްރޮގުރާމެއް ކަމަށް ވިދާޅުވި އެވެ.
އޭނާ ވިދާޅުވި ގޮތުގައި އެ ކުންފުނިން މަސައްކަތް ކުރަމުން އަންނަނީ އެ ޕްރޮގުރާމުގެ އިތުރުން ތަނުގެ ޑިޒައިނުން ފެށިގެން ލިބެން ހުންނާނެ އެކި ހިދުމަތްތަކާއި އެކު ހަގީގީ ލަގްޒަރީ ދިރިއުޅުމެއް ބިނާ ކުރުމުގެ ފުރުސަތު ހޯދައިދިނުމަށެވެ. އަދި އެތަން ފަރުމާ ކުރުމުގައި އެންމެ ބޮޑަށް އިސްކަންދިން ކަންކަމުގެ ތެރޭގައި އެއް ކަމަކަށް ބަލާފައި ވާނީ އެތަނުގައި ދިރިއުޅޭ މީހުންނަށް ބޭނުންވާނެ ޕްރައިވެސީ ހޯދައި ދިނުމަށް ކަމަށާއި، އެ ތަނުގައި ދިރިއުޅޭ މީހުންގެ ރައްކާތެރިކަން ކަށަވަރުކުރަން މުހިންމު މަސައްކަތްތަކެއް ކޮށްފައިވާނެ ކަމަށް ވެސް ވިދާޅުވި އެވެ.
މެރީނާ ފެންނަ ގޮތަށް، ފޭސް 2ގެ ބްރިޖާ ކައިރީގައި ހަދާ ބްލޫ ލެގޫންގެ ބިންގާ އިއްޔެ އަޅާފައި ވާއިރު، އެތަނުގެ ޕާލް ޓަވަރުގެ 10 ފްލޯގެ ބުކިން އަށް މިހާރު ވަނީ ހުޅުވާލައިފަ އެވެ. އޭގެ އިތުރުން ބްލޫ ލެގޫން ރެޒިޑެންސްގެ 13, 14 އަދި 15 ވަނަ ބުރީގެ ޔުނިޓުތައް ވެސް މިހާރު ވަނީ ބުކިން އަށް ހުޅުވާލައިފަ އެވެ.
ދެ ޓަވަރަކަށް ބަހާލައިގެން 18 ފްލޯ އަށް ހަދާ މި އެޕާޓްމަންޓު ކޮމްޕްލެކްސްގައި 35،000 އަކަފޫޓަށް ވުރެ ބޮޑު ޖާގައެއް އޮންނާނެ އެވެ. އަދި އެ ޖާގައިގައި އެކި ވަސީލަތްތައް ގާއިމް ކުރަން ވަނީ ނިންމައިފަ އެވެ.
އެގޮތުން އެ ތަނުގައި 15،000 އަކަފޫޓުގެ ބޮޑު ކްލަބް ހައުސްއަކާއި 2،638 އަކަފޫޓުގެ ޖިމަކާއި 1،713 އަކަފޫޓުގެ ފެމިލީ އެންޓަޓެއިންމަންޓް ސެންޓަރެއް ހަދާނެ އެވެ. އަދި 1،900 އަކަފޫޓުގެ މަލްޓިޕާޕަސް ހޯލަކާއި ކުޑަކުދިންގެ ޕްލޭ އޭރިއާއެއް 2،638 އަކަފޫޓުގެ ސަރަހައްދެއްގައި އަދި 15 ސީޓުގެ ތިއޭޓަރަކާއި ޑޭ ކެއާއެއް އަދި 4،564 އަކަފޫޓުގެ ގާޑަންއެއް ވެސް ހުންނާނެ އެވެ.
ވީސީއެލް އިން ބުނި ގޮތުގައި، ބްލޫ ލެގޫންގައި ހަދާ 24،000 އަކަފޫޓުގެ ރޫފްޓޮޕް ގާޑަންގައި ޖޮގިން ޓްރެކްތަކާއި މޭވާ ބަގީޗާތަކާއި ކަބާނާތަކާއި ބީބީކިއު ޒޯންތައް ހުންނާނެ އެވެ. މި ތަނުގެ ރޫފްޓޮޕްގައި ރާއްޖޭގައި މިހާތަނަށް ހަދާ އެންމެ ބޮޑު ރޫފްޓޮޕް ސްވިމިން ޕޫލް ވެސް ގާއިމް ކުރާނެ އެވެ. މި ތަނުގައި އިލެކްޓްރިކް ވެހިކަލް ޗާޖިން ސްޓޭޝަންތަކާއި ޕްރައިވެޓް ޕާކިން ފެސިލިޓީތައް ގާއިމުކޮށް 24 ގަޑިއިރު ސަވައިލެންސް ކުރާނެ އެވެ.
"ބްލޫ ލެގޫން"ގައި ހެދުމަށް ހަމަޖެހިފައި ވަނީ 1،035 އަކަފޫޓުގެ ދެ ކޮޓަރީގެ އެޕާޓްމަންޓާއި 1،280 އަކަފޫޓުގެ ދެ ކޮޓަރީގެ އެޕާޓްމަންޓާއި 1،340 އަކަފޫޓުގެ 1+2 ކޮޓަރީގެ އެޕާޓްމަންޓާއި 1،795، 1،825 އަދި 1،875 އަކަފޫޓުގެ 3 ކޮޓަރީގެ އެޕާޓްމަންޓެވެ.
އެ އެޕާޓްމަންޓްތަކުގެ މަސައްކަތް ކުރާ ވީސީއެލް ގްރޫޕަކީ 175 އަށް ވުރެ ގިނަ ޕްރޮޖެކްޓުތައް އިންޑިއާގެ އިތުރުން މޮރިޝަސް ފަދަ އެކި ގައުމުތަކުގައި ހިންގާފައިވާ ކުންފުންޏެކެވެ. މިއީ ރާއްޖޭގައި އެފްޑީސީގެ އަމަން ދޯދި ޓަވަރުގެ 1،400 ހައުސިން ޔުނިޓްގެ މަސައްކަތް ކާމިޔާބުކަމާ އެކު ނިންމައި ދިވެހިންގެ އިތުބާރު ވެސް ހޯދާފައިވާ ކުންފުންޏެކެވެ.