އަންނަ މަހު ދައްކަންޖެހޭ 500 މިލިއަން ޑޮލަރުގެ ސުކޫކު ދައްކަން އެއްވެސް ދައްޗެއް ނެތް ކަމަށާއި، މިވަގުތު ވެސް ރިޒާވްގައި 650 މިލިއަން ޑޮލަރު އެބަހުރި ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ކޮންމެ ހޯމަ ދުވަހަކު ނޫސްވެރިންނާ ބައްދަލުކުރައްވަން ނިންމަވާފައިވާ ނިންމުމުގެ ދަށުން، ރައީސް އޮފީހުގައި މިއަދު ބޭއްވޮ ބައްދަލުވުން ފައްޓަވަމުން އެ މަނިކުފާނު ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 2021 ވަނަ އަހަރު ވިއްކި 500 މިލިއަން ޑޮލަރު (7.7 ބިލިއަން ރުފިޔާ)ގެ ސުކޫކު އަންނަ އޭޕްރީލް މަހުގެ އަށް ވަނަ ދުވަހު އަނބުރާ ދައްކަންޖެހޭ ކަމަށެވެ.
"އާދެ، 500 މިލިއަން ޑޮލަރުގެ ސުކޫކު 8 އޭޕްރިލް 2026 ގައި ސަރުކާރުން ދައްކަން ވާނީ ނިންމާފައި. އެއީ ދައްކަން ޖެހޭ ދުވަސް. 8 އޭޕްރިލް 2026 ގައި ދެއްކުމަށްޓަކައި މިހާރު އަޅުގަނޑުމެން އަތުގައި ރައްކާކޮށްފައި އެބަހުރި 650 މިލިއަން ޑޮލަރަށް ވުރެ ގިނަ ފައިސާ،" އެ މަނިކުފާނު ވިދާޅުވި އެވެ.
އެކަމުގެ ތަފްސީލް ދެއްވަމުން، ރައީސް މުއިއްޒު ވިދާޅުވި ގޮތުގައި، ރޭގެ ނިޔަލަށް ސަވަރިން ޑިވެލޮޕްމަންޓް ފަންޑު (އެސްޑީއެފް)ގައި 320 މިލިއަން ޑޮލަރު އަދި ޔޫސަބަލް ރިސާވްގައި 330 މިލިއަން ޑޮލަރު އެބަހުއްޓެވެ.
"500 މިލިއަން ޑޮލަރުގެ ސުކޫކު ދައްކާފައި ބާކީ ވެސް އެހެންވީމާ މިހާރު 150 މިލިއަން ޑޮލަރު ހުންނާނެ،" ރައީސް ވިދާޅުވި އެވެ.
ސުކޫކުގެ އިތުރުން ވެސް، ބޭރުން ނަގާފައިވާ ލޯނުތަކާ ގުޅޭގޮތުން މަޝްވަރާތައް ކުރަމުން އަންނަ ކަމަށާއި އެ މަޝްވަރާތަކަށް ރަނގަޅު ކުރިއެރުންތަކެއް ލިބިފައިވާކަން އެ މަނިކުފާނު ހާމަކުރެއްވި އެވެ.
ބޭރުގެ ދަރަނީގެ އިތުރުން، ސަރުކާރުން އަމިއްލަ ކުންފުނިތަކަށް ދައްކަންޖެހޭ ފައިސާ ވެސް ދައްކަމުން އަންނަ ކަމަށާއި އަންނަ ހަފްތާގައި އިތުރު 200 މިލިއަން ދޫކުރަން ނިންމާފައިވާ ކަމަށް ރައީސް ވިދާޅުވި އެވެ.
މިގޮތުން، އެ ހަފްތާގައި އިސްކަން ދޭނީ އެއް މިލިއަން ރުފިޔާއަށް ވުރެ މަދުން ފައިސާ ދޭންޖެހޭ ކުންފުނިތަކަށް ކަމަށް އެ މަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި، ރާއްޖޭގެ އިގުތިސާދު މި ވަގުތު އޮތީ ވަރަށް ވަރުގަދަކޮށެވެ.
"ވަރަށް ބާރަށް ފުޅާވެ ވަރުގަދަވަމުންދާ އިގްތިސާދެއް އޮތީ،" އެ މަނިކުފާނު ވިދާޅުވި އެވެ.