މި ރޯދަމަހު ފަހު 10 އާއި ޝައްވާލަ މަހު ހަ ރޯދައިގެ ދުވަސްތަކުގައި މޯލްޑިވްސް އިސްލާމިކް ބޭންކް (އެމްއައިބީ) އިން ކަސްޓަމަރުންނަށް ހިދުމަތްދޭ ގަޑިތައް އިއުލާންކޮށްފި އެވެ.
ރޯދަމަހުގެ ފަހު 10 ގެ ދުވަސްތައް ގުނަން ފަށާނީ އަންނަ ހޯމަ ދުވަހު އެވެ.
އެމްއައިބީ އިން ބުނީ، ރޯދަމަހުގެ ފަހު 10 ގެ ފުރަތަމަ ދުވަހުން ފެށިގެން ކުޑައީދު ދުވަހުގެ ނިޔަލަށް އެ ބޭންކުގެ ބިޒްނަސް ބްރާންޗުގެ ކަސްޓަމަރުންނަށް ބިޒްނަސް ބޭންކިންގެ ހިދުމަތް ދޭނީ ހެނދުނު 11:30 އިން ފެށިގެން މެންދުރު ދޭއް ޖަހަންދެން ކަމަށެވެ. އެ މުއްދަތުގައި މާލޭގައި ހުންނަ ބިޒްނަސް ބްރާންޗުން ޓެލެގްރެފިކް ޓްރާންސްފާ ނުވަތަ ޓީޓީ ކުރުމުގެ ކަޓްއޯފް ޓައިމްގެ ގޮތުގައި ކަނޑައަޅާފައި ވަނީ ހެނދުނު 11 އިން މެންދުރު 12 އަށެވެ.
އެމްއައިބީ އިން ބުނީ، މަރުކަޒީ ބޭންކު އެމްއެމްއޭގެ އިއުލާނާ ގުޅިގެން، ރޯދަމަހުގެ ފަހު 10 ގައި ހުރިހާ ބޭންކުތަކެއް ހުޅުވާ ދެ ދުވަހަކީ މި މަހުގެ 11 އަދި 18 ވަނަ ދުވަސް ކަމަށް ވާއިރު، އެ ދެ ދުވަހު އެމްއައިބީގެ ބިޒްނަސް ބްރާންޗުގެ ކަސްޓަމަރުންނަށް ބިޒްނަސް ބޭންކިންގެ ހިދުމަތް ދޭނީ ހެނދުނު 9:30 އިން ފެށިގެން މެންދުރު ދޭއް ޖެހުމާ ހަމައަށް ކަމަށެވެ. އަދި އެ ދެ ދުވަހު ބިޒްނަސް ބްރާންޗުން ޓީޓީ ކުރުމުގެ ކަޓްއޯފް ޓައިމަކީ ހެނދުނު 9:30 އިން އިން 11 ޖަހަންދެންނެވެ.
އެމްއައިބީ އިން ބުނި ގޮތުގައި ރޯދަމަސް ނިމި، ޝައްވާލު މަހުގެ ހަ ރޯދައިގެ ތެރެއިން މި މަހުގެ 23 އިން 26 އަށް އެމްއައިބީގެ ބިޒްނަސް ބޭންކިން ހިދުމަތް ދިނުމައް ހަމަޖެހިފައި ވަނީ ހެނދުނު 9:30 އިން މެންދުރު ދޭއް ޖަހަންދެނެވެ. އަދި ޓީޓީ ކުރުމުގެ ހިދުމަތް ޝައްވާލް މަހުގެ ފުރަތަމަ ހަ ދުވަހު ދޭ ގަޑިއަކީ ހެނދުނު 9:30 އިން 11 އަށް ކަމަށް ވެސް އެމްއައިބީ އިން ބުންޏެވެ.
އެމްއައިބީގެ ބިޒްނަސް ބްރާންޗު ފިޔަވައި އެހެން ހުރިހާ ބްރާންޗުތަކެއް އަންނަ ހޯމަ ދުވަހުން ފެށިގެން އީދު ދުވަހުގެ ނިޔަލަށް ހުޅުވަން ހަމަޖެހިފައިވާ ދެ ދުވަސް ކަމަށްވާ، މާޗު މަހު 11 އަދި 18 ފިޔަވައި އެހެން ހުރިހާ ދުވަހެއްގައި ބަންދު ވާނެ އެވެ. އެ ދެ ދުވަހު ކަސްޓަމަރުންނަށް ހިދުމަތް ދިނުމަށް ހަމަޖެހިފައިވަނީ ހެނދުނު 9:30 އިން ފެށިގެން މެންދުރު 1:30 އާ ހަމައަށެވެ. އަދި ޝައްވާލް މަހުގެ ހަ ރޯދައިގެ ދުވަސްތަކުގައި ވެސް ކަސްޓަމަރުންނަށް ހިދުމަތް ދޭން ހަމަޖެހިފައިވަނީ ހަމަ އެ ގަޑިތަކުގައި ކަމަށް ބުންޏެވެ.
އެމްއައިބީއަކީ އެ ބޭންކުގެ ހުރިހާ ހިދުމަތެއް އޮންލައިންކޮށް ދޭ ބޭންކެކެވެ. ބޭންކަށް ނުގޮސް އެކައުންޓު ހުޅުވުމާއި އިންޓަނެޓް ބޭންކިން އަށް އަމިއްލަ އަށް ރަޖިސްޓާ ކުރުމާއި ފައިސާ މޮބައިލް އަދި ފައިސާ ނެޓް މެދުވެރިކޮށް ޓީޓީގެ ހިދުމަތަށް އެދުމުގެ އިތުރުން ވެސް އެމްއައިބީގެ އެޕްލައި ނައު ޕޯޓަލް މެދުވެރިކޮށް އެ ބޭންކުން ދޭ ހުރިހާ ހިދުމަތެއް ލިބޭނެ އެވެ.