ރާއްޖޭގެ ތިމާވެށި ރައްކާތެރިކުރުމާއި ރާއްޖެ ފެހިކުރުމާއި މޫސުމީ ބަދަލުތަކަށް އަހުލުވެރިވުމުގެ އިތުރުން ދަނޑުވެރިކަމުގެ ދާއިރާއިން އުނގަންނައިދިނުމަށް އެއްބާރުލުން ދިނުމުގެ ގޮތުން، ބަންގްލާދޭޝް ހައި ކޮމިޝަނާއި މިއާންޒް ކޮލެޖުގެ ސުކޫލް އޮފް އެގްރިކަލްޗާއާ ދެމެދު އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގެ މައިގަނޑު މަގްސަދަކީ ބަންގްލަދޭޝްގެ މާހައުލުގައި ހެދޭ ތަފާތު ބާވަތްތަކުގެ ގަސްގަހާގެހި ރާއްޖޭގެ ފަސްގަނޑާއި މޫސުމަށް އެކަށޭނެ މިންވަރު ދެނެގަތުމަށް ދިރާސާކޮށް، އާލާކުރުމުގެ ފްރޭމްވޯކެއް ގާއިމުކުރުމެވެ. މި އިނިޝިއޭޓިވްގެ ދަށުން ފޯރުކޮށްދޭ އޮށާއި ގަސްގަހާގެހި އިންދައި، އާލާކޮށް، ބެލެހެއްޓުމުގެ މަސައްކަތް ރާއްޖޭގައި ހުންނަ ބަންގްލަދޭޝް ހައި ކޮމިޝަނުން ކުރިއަށްގެންދާނީ މިއާންޒް ކޮލެޖުގެ ނާސަރީ ފެސިލިޓީތަކުގަ އެވެ.
މިއާންޒް ކޮލެޖާއި ބަންގަލްދޭޝް ހައި ކޮމިޝަނާ ދެމެދު އެއްބަސްވުމުގައި ސޮއިކުރުމަށް ބޭއްވި ހާއްސަ ރަސްމިއްޔާތުގައި އެ ކޮލެޖުގެ ސީއީއޯ އަދި ޗެއާމަން އަހުމަދު މޮޓާކީ ވިދާޅުވި ގޮތުގައި ބަންގްލަދޭޝަކީ ދަނޑުވެރިކަމަށް މޮޅު، އެކަމާ ގުޅޭ މުހިންމު މައުލޫމާތާއި ތަޖުރިބާ ލިބިފައިވާ ގައުމެއް ކަމަށެވެ. އަދި މި އެއްބަސްވުމުގެ ސަބަބުން، ރާއްޖޭގައި ދަނޑުވެރިކަން އާލާކުރުމަށް ބޭނުންވާ މުހިންމު މައުލޫމާތުތައް ލިބޭނެކަމަށް ވިދާޅުވި އެވެ.
އޭނާ ވިދާޅުވީ ރާއްޖޭގެ ސަރުކާރަށް ހަދިޔާކުރުމަށް، އެ ގައުމުން ފޯރުކޮށްދިން އޮށްތަކަކީ، ރާއްޖެއާ އެއްފަދަ އެކި މާހައުލުތަކުގައި ހައްދާ، އާލާކުރާ ފަދަ ގަސްތައް ކަމަށެވެ. އަދި އެ ކޮލެޖުގެ ނާސަރީގައި މި އޮށްތައް އިންދައި، ގަސްތައް އާލާކޮށް، އެގަސްތައް އިންދުމާ ގުޅޭ ގޮތުން ދިރާސާކޮށް، ކިޔަވައިދޭނެ ކަމަށް ވިދާޅުވި އެވެ.
އެ ރަސްމިއްޔާތުގައި، ބަންގްލަދޭޝްގެ ފަރާތުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ޑރ. އެމްޑީ ނަޒްމުލް އިސްލާމް ވިދާޅުވީ، މިމަސައްކަތަކީ ބަންގްލަދޭޝް-މޯލްޑިވްސް ގްރީން އިނީޝިއޭޓިވްގެ ދަށުން ކުރެވޭ މުހިންމު މަސައްކަތެއް ކަމަށެވެ. އަދި މިއީ އެކި ބާވަތްތަކުގެ ގަސްތަކުން އެ ގައުމުން ހަދިޔާކުރާ ފުރަތަމަ 20،000 އޮށް ކަމަށާއި މިއީ ތިމާވެށި ހިމާޔަތްކުރުމާއި ދެމެހެއްޓެނި ތަރައްގީއަށް ކުރެވޭނެ މުހިންމު މަސައްކަތެއްކަން ފާހަގަކުރެއްވި އެވެ.
ބަންގްލަދޭޝްއިން މިއާންޒް ކޮލެޖާ ހަވާލުކުރި އޮށްތައް އިންދައި، ގަސްތައް އިންދުމަށް އެކަށީގެންވާ ވަރަށް ބޮޑުވުމުން، ގިނަވެގެން ތިން ތިން މަސްދުވަހުގެ ތެރޭގައި އެ ގަސްތައް އަނބުރާ ބަންގްލަދޭޝް ހައި ކޮމިޝަނާ ހަވާލުކުރުމަށް ވަނީ ހަމަޖެހިފަ އެވެ. އޭގެ ފަހުން ބަންގްލަދޭޝް ހައި ކޮމިޝަނުގެ ފަރާތުން އެ ގަސްތައް ދިވެހި ސަރުކާރަށް ހަދިޔާކުރާނެ އެވެ.
މިއީ ސަރުކާރުގެ ފަސް މިލިޔަން ގަސް ޕްރޮގްރާމަށް ބަންގްލަދޭޝްއިން ހަދިޔާކުރަން ހަމަޖެހިފައިވާ ގަސްތަކެކެވެ.