ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގައި ކުރިއަށްގެންދިޔަ ކެޓަރެކްޓް ސާޖަރީ އައި ކޭމްޕް ކާމިޔާބުކަމާ އެކު ނިންމާލައިފި އެވެ.
މިދިޔަ މަހުގެ 26 އިން 28 އަށް ކުރިއަށް ގެންދިޔަ ތިން ދުވަހުގެ އެ އައި ކޭމްޕަކީ އުމުރުން މީހުންނަށް ހާއްސަކޮށްގެން، ލޮލުގެ ފަރުވާ އާއި ކެޓަރެކްޓް ސާޖަރީގެ ހިދުމަތް ރަށުގައި ތިބެގެން ފަސޭހަކަމާ އެކު ލިބޭނެ މަގުފަހިކޮށްދިނުމުގެ މަގުސަދުގައި ބޭއްވި ކޭމްޕެކެވެ.
އޭޖްޑް ކެއާ މޯލްޑިވްސްއިން އިސްނަގައިގެން، އެޓްމޮސްފިއާ ފައުންޑޭޝަންގެ މާލީ އެހީތެރިކަމާ އެކު ހިންގި އެ ހަރަކާތުގައި އައި ކެއާ ހޮސްޕިޓަލާއި ޑރ. އަބްދުއްސަމަދު މެމޯރިއަލް ހޮސްޕިޓަލުން އަމަލީ ގޮތުން ބައިވެރިވި އެވެ. އެ ކޭމްޕުގައި އޮޕަރޭޝަންތައް ކޮށްދިނީ އައި ކެއާ ހޮސްޕިޓަލުގެ ޕީޑިއަޓްރިކް އޮފްތަލްމޮލޮޖީ އަދި ކެޓަރެކްޓް ސާޖަރީގެ ހާއްސަ ޑޮކްޓަރު، ޑރ. އަރްޖުން މައްލާ އެވެ. އަދި އެ މަސައްކަތުގައި ޑރ. އަބްދުއްސަމަދު މެމޯރިއަލް ހޮސްޕިޓަލުގެ ކްލިނިކަލް ޓީމުން ބައިވެރިވެ، ފެސިލިޓީތަކާއި އެހެނިހެން އެހީތެރިކަން ވަނީ ފޯރުކޮށްދީފަ އެވެ.
އެ ކޭމްޕުގައި، އުމުރުން ދުވަސްވީ ނުވަ މީހެއްގެ ކެޓަރެކްޓް ސާޖަރީ ކާމިޔާބުކަމާ އެކު ވަނީ ފުރިހަމަކޮށްފަ އެވެ. އޭގެ އިތުރުން ކުރިން ރަޖިސްޓްރީވި ފަރާތްތަކާއި އާންމުން ހިމެނޭހެން ޑޮކްޓަރުގެ ކޮންސަލްޓޭޝަން އަދި ލޮލުގެ ނަންބަރު ޗެކްކުރުމުގެ ހިދުމަތް ވެސް ދިނެވެ. އަދި އޮޕަރޭޝަން ކުރި މީހުންނަށް އޮޕަރޭޝަނަށް ފަހު ބޭނުންވާ އިރުޝާދުތަކާއި ބޭސް ވެސް ވަނީ ހިލޭ ފޯރުކޮށްދީފަ އެވެ.
އައި ކެއާއިން ބުނީ މި ކޭމްޕުގެ ސަބަބުން، ރަށުގައި ތިބެގެން ސާޖަރީ ހެދުމުގެ ފުރުސަތު ގިނަ ބަޔަކަށް ލިބުނު ކަމަށެވެ. އައި ކެއާ ހޮސްޕިޓަލުން ބުނި ގޮތުގައި، ލޮލުގެ ފެންވަރު ރަނގަޅު ފަރުވާ ރާއްޖޭގެ އެކި ކަންކޮޅުތަކަށް ފޯރުކޮށްދިނުމަށް އެހެން ފަރާތްތަކާ ގުޅިގެން މަސައްކަތް ކުރުމުގައި އެ ހޮސްޕިޓަލުން އަބަދުވެސް ދެމިއޮންނާނެ އެވެ.